Нав Исус 8 - Коми Библия 2023

Гай кар босьтӧм да бырӧдӧм

¹ Господь шуис Исуслы: «Эн пов да эн тірав. Босьт аскӧдыд тышӧ петны вермысьясӧс да мун Гайӧ. Ме сета тэнад киӧ сэтчӧс ӧксыӧс да сылысь войтырсӧ, карсӧ да ставнас мусӧ.

² Вӧч Гай карыскӧд да сэтчӧс ӧксыкӧд сійӧ, мый вӧчин Ерикон каркӧд да сэтчӧс ӧксыкӧд. Но сэтысь ті верманныд босьтны аслыныд тышын шедӧдӧм эмбур да ыж-мӧскӧс. Кар саяс сувтӧд кыйӧдчысьясӧс».

³ Исус став аслас тышкайӧзкӧд дасьтысис уськӧдчыны Гай кар вылӧ. Сійӧ бӧрйис комын сюрс медбур тышкамортӧс да войнас мӧдӧдіс найӧс.

⁴ Сійӧ тшӧктіс налы: «Мунӧй кар саяс да сувтӧй кыйӧдчыны. Лоӧй дасьӧсь!

⁵ Мукӧдыскӧд ме матыстча кар дорас. Гайын олысьяс воддза мозыс уськӧдчасны миян вылӧ, а ми пышъям наысь.

⁶ Найӧ вӧтчасны миян бӧрся, и ми нуӧдам найӧс кар дорсьыс ылӧджык. Найӧ чайтасны, мый ми воддза мозыс наысь пышъям. Миян пышйигӧн

⁷ ті петанныд кыйӧдчанінсьыд да босьтанныд карсӧ. Господь, тіян Енныд, сетас сійӧс тіян киӧ.

⁸ Карсӧ босьтӧм бӧрын сотӧй сійӧс Господьлӧн шуӧм серти. Тайӧ менам тшӧктӧм тіянлы».

⁹ Исус тшӧктіс мунны налы. Найӧ сувтісны кыйӧдчыны Вефиль да Гай костӧ, Гайсянь рытыввылӧ. Исус тайӧ войсӧ узис тышкайӧзыс пӧвстын.

¹⁰ Водз асывнас Исус кытшовтіс тышкайӧзсӧ, сэсся израильса юрнуӧдысьяскӧд сувтіс тышкайӧз водзвылӧ, и найӧ мӧдӧдчисны Гайлань.

¹¹ Исус тышкайӧзыскӧд матыстчис карлань [асыввывсяньыс, а кыйӧдчаніныс вӧлі кар рытыввылын].

¹² Найӧ сувтісны Гай кар войвывладорӧ. Карсьыс найӧс торйӧдіс ковтыс. Гайсянь рытыввылӧ, Вефиль да Гай костӧ, Исус пуксьӧдіс кыйӧдчыны вит сюрс мортӧс.

¹³ Тадзи медшӧр тышкайӧзыс сулаліс войвылын, а ӧти котырыс – рытыввылын. Войнас Исус петіс ковтыс шӧрас.

¹⁴ Кор гайса ӧксы водз асывнас аддзис израильсаясӧс, сійӧ дзик пыр петіс став аслас тышкайӧзкӧд индӧм местаӧ Йӧрдан ковтыслань, медым уськӧдчыны израильсаяс вылӧ. Сійӧ эз тӧд, мый кар сайын эмӧсь кыйӧдчысьяс.

¹⁵ Исус аслас йӧзкӧд пышйис овтӧминлань, татшӧм ногӧн кӧсйис петкӧдлыны, быттьӧ вермисны сійӧс.

¹⁶ Гай карса став айуловсӧ чукӧстісны, медым вӧтӧдны израильсаясӧс. Исус бӧрся вӧтчигӧн найӧ ылыстчисны карсьыс.

¹⁷ Гайын да Вефильын эз вӧв сэтшӧм мортыс, коді эськӧ эз вӧтӧд израильсаясӧс. Израильсаясӧс вӧтӧдігкості карныс вӧлі восьса.

¹⁸ Сэки Господь шуис Исуслы: «Лэптӧм шытӧ веськӧд Гайлань, ӧд Ме сета сійӧс тэнад киӧ. [Тэнад кыйӧдчысьясыд мед дзик пыр петасны кыйӧдчанінсьыс.]» Исус лэптіс шысӧ карлань.

¹⁹ Кыйӧдчысьясыс мыйӧн аддзисны Исуслысь ки лэптӧмсӧ, уськӧдчисны кар вылӧ, босьтісны сійӧс да дзик пыр сотісны.

²⁰ Гайса айулов видзӧдлісны карлань да аддзисны, мый карныс сотчӧ, енэжӧ пуркйӧ тшын. Налы некытчӧ вӧлі муннысӧ, ӧд овтӧминлань пышйысь израильсаяс бергӧдчисны налы паныд.

²¹ Исус да израильса тышкайӧз кор аддзисны, мый кыйӧдчысьяс босьтісны карсӧ, и мый сэтысь тшын кайӧ, найӧ бӧр бергӧдчисны, медым уськӧдчыны гайса айулов вылӧ.

²² Карсӧ сотӧм бӧрын израильса кыйӧдчысьяс тшӧтш уськӧдчисны гайса айулов вылӧ. Тадзи израильсаяс кыкнанладорсяньыс топӧдісны найӧс да виалісны ставнысӧ. Некод ловйӧн эз коль, некод эз вермы пышйыны.

²³ Сӧмын гайса ӧксыӧс босьтісны ловйӧн да вайӧдісны Исус дінӧ.

²⁴ Гайса айуловӧс овтӧминын шыпуртӧн виалӧм бӧрын израильсаяс бергӧдчисны Гай карӧ да сэтысь виалісны шыпуртӧн быдӧнӧс.

²⁵ Сійӧ лунӧ Гайысь вӧлі виӧма став олысьсӧ – дас кык сюрс айловӧс да аньӧс.

²⁶ Исус эз лэдз кисьыс лэптӧм шысӧ, кытчӧдз израильсаяс эз бырӧдны Гайысь став олысьсӧ.

²⁷ Ыж-мӧссӧ да шедӧдӧм эмбурсӧ израильсаяс босьтісны аслыныс, кыдзи Господь тшӧктіс Исуслы.

²⁸ Гай карсӧ Исус сотіс. Тайӧ карыс пыр кежлӧ овтӧмӧн колис, ӧнӧдз сійӧ татшӧм.

²⁹ Гайса ӧксыӧс Исус ӧшӧдіс пу вылӧ, сійӧ ӧшаліс сэні рытӧдзыс. Шонді лэччӧм бӧрын Исуслӧн тшӧктӧм серти шойсӧ лэдзисны сэтысь, шыбитісны карса дзиръя дорӧ да тыртісны изъясӧн. Ӧнӧдз на сэні эм ыджыд из чукӧрыс.

Исус лыддьӧ войтырыслы Индӧд

³⁰ Эвал керӧс вылӧ Исус лэптіс висьпуктанін Господьлы, Израильлӧн Енлы.

³¹ Висьпуктанінсӧ вӧчис керавтӧм-шыльӧдтӧм изъясысь, кыдзи Мӧисей, Господьлӧн кесйӧг, тшӧктіс Израиль пиянлы. Та йылысь гижӧма Мӧисейлӧн Индӧд небӧгӧ. Тайӧ висьпуктанін вылас Израиль войтыр вайисны Господьлы сотан да бурасян висьяс.

³² Израиль войтырлӧн син водзын Исус гижис изъяс вылас Мӧисейлысь Индӧдсӧ.

³³ Став Израиль войтыр да йӧз муысь локтысьяс, войтырлӧн юрнуӧдысьяс, веськӧдлысьяс да ёрдысьяс сувтісны Господьлӧн Йитӧд куд кыкнанладорас, а на водзын сулалісны Левий чужанкотырысь куд новлӧдлысь попъяс. Войтырлӧн ӧтар джынйыс видзӧдіс Гаризим керӧслань, а мӧд джынйыс видзӧдіс Эвал керӧслань. Тадзи Мӧисей, Господьлӧн кесйӧг, коркӧ тшӧктіс бурсины Израиль войтырӧс.

³⁴ Та бӧрын Исус лыддис Индӧдысь бурсиӧмсӧ да ёрӧмсӧ – ставсӧ, мый вӧлі гижӧма Индӧд небӧгас.

³⁵ Кор Исус ставсӧ лыддис Израиль войтырлы, сійӧс кывзісны айулов, аньяс да челядь, тшӧтш на пӧвстын олысь йӧз муысь локтысьяс. Ставсьыс, мый Мӧисей тшӧктіс, весиг ӧти кыв эз коль лыддьытӧг.