Нав Исус 6 - Коми Библия 2023

¹ Господь шуис Исуслы: «Ме сета тэнад киӧ Ерикон кар, сэтчӧс ӧксыӧс да сылысь вына тышкайӧзсӧ.

² Аслад став тышкайӧзкӧд ӧтчыдысь луннас кытшовтӧй кар гӧгӧрыс. Тадзи вӧчӧй квайт лун чӧж.

³ Йитӧд куд водзвылын мед мунасны сизим поп. Быдӧн мед босьтас буксан. Сизимӧд луннас кар гӧгӧрыс кытшовтӧй сизимысь, а попъяс мед буксасны буксанӧн.

⁴ Кор ті кыланныд буксан шы, став войтырыс мед гораа горӧдас. Сэки карса стенмыс подулӧдзыс киссяс. Быдӧн мед [уськӧдчӧмӧн] пырас карас сэтысянь, кӧні сулалӧ».

⁵ Навлӧн Исус пиыс корис [израильса] попъясӧс да шуис налы: «Босьтӧй да нуӧй Йитӧд кудсӧ. Сизим поп мед мунасны буксанъясӧн Господьлӧн куд водзвылас».

⁶ Сэсся Исус шуис [попъяслы, медым найӧ висьталасны] войтырыслы: «Мунӧй да кытшовтӧй кар гӧгӧрыс. Шыпуртаяс мед мунасны Господьлӧн куд водзвылас».

⁷ Кор Исус ставсӧ висьталіс войтырыслы, сизим поп буксанъясӧн мӧдӧдчисны мунны Господьлӧн куд водзвылас. Муніганыс попъяс буксісны буксанӧн. Господьлысь Йитӧд кудсӧ нуисны на бӧрся.

⁸ Шыпуртаяс мунісны буксанӧн буксысь попъяс водзвылын, а [Господьлӧн Йитӧд] куд бӧрся мунісны мукӧд тышкайӧз. Мунігчӧжныс дугдывтӧг буксісны буксанӧн.

⁹ Войтырыслы Исус тшӧктіс: «Энӧ горзӧй! Тіянсянь мед весиг шы оз кыв, вомсьыныд мед кыв оз пет, кытчӧдз ме ог тшӧкты тіянлы горӧдны. Сэки горзӧй!»

¹⁰ Господьлысь [Йитӧд] кудсӧ ӧтчыдысь кытшовтӧдісны кар гӧгӧрыс. Вой кежлас ставныс бӧр локтісны асланыс чомъясӧ.

¹¹ Мӧд луннас Исус чеччис водз асывнас. Попъяс бара босьтісны нуны Господьлысь [Йитӧд] кудсӧ.

¹² Господьлӧн куд водзвылас мунісны сизим поп да буксісны буксанӧн. Попъяс водзвылын мунісны шыпуртаяс, а Господьлӧн [Йитӧд] куд бӧрся мунісны мукӧд тышкайӧз. Мунігчӧжныс дугдывтӧг буксісны буксанӧн.

¹³ Медводдза луннас моз мӧд луннас тшӧтш кытшовтісны карсӧ ӧтчыдысь. Та бӧрын локтісны асланыс чомъясӧ. Тадзи вӧчисны квайт лун чӧж.

¹⁴ Но сизимӧд луннас чеччисны кыа петігӧн да кытшовтісны кар гӧгӧрыс сизимысь. Сӧмын тайӧ лунӧ карсӧ кытшовтісны сизимысь.

¹⁵ Кар гӧгӧрыс сизимӧдысь кытшовтігӧн да попъяслӧн буксанӧн буксігӧн Исус тшӧктіс войтырыслы: «Горӧдӧй! Господь сетіс тіянлы карсӧ.

¹⁶ Карсӧ да ставсӧ, мый сэні эм, сиӧма Господьлы [Саваофлы]. Сӧмын Раавӧс, кырсалысь аньӧс, да быдӧнӧс, коді лоӧ сылӧн керкаын, ловйӧн кольӧй, ӧд сійӧ дзебис миянлысь кыйӧдчысьясӧс.

¹⁷ Видзчысьӧй, Господьлы сиӧмаысь нинӧм энӧ босьтӧй аслыныд. Босьтанныд кӧ, веськаланныд бырӧдӧм улӧ, и шогыс да бырӧдӧмыс суас став Израиль войтырӧс.

¹⁸ Став эзысь-зарнисӧ, ыргӧн да кӧрта кӧлуйсӧ колӧ вежӧдны-торйӧдны Господьлы да вайны Сылы озырлун видзанінӧ».

¹⁹ Попъяс букӧстісны буксанӧн. И кор Израиль войтыр кыліс тайӧ шысӧ, найӧ кутісны гораа горзыны. Карса стенмыс подулӧдзыс киссис. Войтырыс пырис карас сэтысянь, кӧні коді сулаліс. Карсӧ вӧлі босьтӧма.

²⁰ Найӧ дзикӧдз бырӧдісны карсьыс став айуловсӧ и аньсӧ, томӧс и пӧрысьӧс. Бырӧдісны тшӧтш налысь ыж-мӧссӧ да осёлъяссӧ. Найӧс ставнысӧ виалісны шыпуртӧн.

²¹ Тайӧ муас кыйӧдчыны волысь кык мортлы Исус шуис: «Мунӧй кырсалысь аньлӧн керкаӧ да кыв сетӧм сертиныд петкӧдӧй сійӧс да став сылысь гортсасӧ».

²² Кыйӧдчыны волысь том зонъяс мунісны [Раавлӧн керкаӧ] да петкӧдісны Раавӧс, сылысь бать-мамсӧ, вокъяссӧ, став гортсасӧ да рӧдвужсӧ. Найӧс нуӧдісны Израильлӧн чомъясысь ылӧджык.

²³ Карсӧ да ставсӧ, мый сэні вӧлі, израильсаяс сотісны. Сӧмын эзысь-зарни, ыргӧн да кӧрта кӧлуй вайисны Господьлы озырлун видзанінӧ.

²⁴ Раавӧс, кырсалысь аньӧс, сылысь став гортсасӧ да батьыслысь рӧдсӧ Исус ловйӧн колис. Раавлӧн рӧдыс ӧнӧдз олӧ израильсаяс пӧвстын, ӧд сійӧ дзебліс ас ордас Ерикон карӧ кыйӧдчыны волысьясӧс, кодъясӧс мӧдӧдліс Исус.

²⁵ Ерикон кар бырӧдӧм бӧрын Исус кыв сетӧмӧн шуис: «Господь водзын ёрӧма сійӧс, коді выльысь лэптас Ерикон кар. Карыслы подув пуктӧм вӧсна сійӧ воштас медводдза писӧ, а карса дзиръя сувтӧдӧм вӧсна – медічӧт писӧ. [Карыслы подув пуктӧм вӧсна Вефильысь Азан воштіс ассьыс медводдза писӧ, Авирамӧс, а карса дзиръя сувтӧдӧм вӧсна сійӧ воштіс медічӧт писӧ.]»

²⁶ Исус нималіс став му пасьталаыс, ӧд Господь вӧлі сыкӧд.