Нав Исус 4 - Коми Библия 2023

Дас кык из

¹ Кор став войтырыс вуджис Йӧрдан ю вомӧн, Господь шуис Исуслы:

² «Бӧрйӧй войтыр пӧвстсьыныд дас кык мортӧс, быд чужанкотырысь ӧтиӧс.

³ Тшӧктӧй налы Йӧрдан ю шӧрысь, кӧні сулалӧны попъяс, босьтны дас кык из. Тайӧ изъяссӧ мед найӧ аскӧдныс нуасны да пуктасны сэтчӧ, кытчӧ тавой узьмӧдчасны».

⁴ Исус бӧрйис Израиль пиян пӧвстысь дас кык мортӧс, быд чужанкотырысь ӧтиӧс. Сійӧ корис найӧс

⁵ да шуис: «Мунӧй асланыд Господь Енлӧн куд дорӧ Йӧрдан ю шӧрӧ да босьтӧй сэтысь Израиль чужанкотыръяслӧн лыд серти дас кык из. Быдӧн мед ваяс пельпом вылас ӧти из.

⁶ Тайӧ изъясыс мед [пыр] лоӧны тіянлы казьтыланпасӧн. Воас кад, кор тіян пиянныд юаласны: ”Мыйла тайӧ изъясыс?”

⁷ Сэки ті висьталӧй налы: ”Тайӧ изъясыс казьтывлӧны сы йылысь, мый [став му пасьтала ыджыдалысь] Господьлӧн Йитӧд куд водзын Йӧрдан юын ваыс шӧри потіс. Йӧрдан ю вомӧн кудсӧ вуджӧдігӧн ваыс вешйис”. Тайӧ изъясыс лоӧны Израиль пиянлы пыр кежлӧ казьтыланпасӧн».

⁸ Израиль пиян ставсӧ вӧчисны Исуслӧн тшӧктӧм серти. Израиль пиянлӧн чужанкотыр лыд серти Йӧрдан шӧрысь босьтісны дас кык из, кыдзи Господь висьталіс Исуслы. Изъяссӧ нуисны узьмӧдчанінӧ да пуктісны сэтчӧ.

⁹ Нӧшта дас кык из Исус сувтӧдіс Йӧрдан ю шӧрӧ, кӧні сулалісны [Господьлысь] Йитӧд куд нуысь попъяс. Ӧнӧдз тайӧ изъясыс сэнӧсь.

¹⁰ [Господьлысь] Йитӧд куд нуысь попъяс сулалісны Йӧрдан ю шӧрын, кытчӧдз эз вӧв вӧчӧма ставсӧ, мый Господь тшӧктіс Исус пыр войтырыслы. Исус вӧчис ставсӧ сідзи, кыдзи тшӧктіс Мӧисей. Войтырыс тэрмасьӧмӧн вуджис юсӧ.

¹¹ Став войтырыслӧн вуджӧм бӧрын Господьлысь [Йитӧд] куд нуысь попъяс вуджисны да бара сувтісны мунны войтырыс водзвылын.

¹² Рувим да Гад чужанкотыръясысь да Манассейлӧн джын чужанкотырысь тышкайӧз мунісны Израиль пиян водзвылын, кыдзи тшӧктыліс налы Мӧисей.

¹³ Нелямын сюрс гӧгӧр тышкаморт восьлалісны Господьлӧн куд водзвылын Ерикон ковтыслань, медым петны тышӧ.

¹⁴ Тайӧ лунӧ Господь нимӧдіс Исусӧс став Израильлӧн син водзын. Мӧисейӧс моз войтырыс пыдди пуктіс Исусӧс став сылӧн олан лунъяс чӧжыс.

¹⁵ Господь шуис Исуслы:

¹⁶ «Тшӧкты Йитӧд куд нуысь попъяслы петны Йӧрдан юысь».

¹⁷ Исус тшӧктіс попъяслы петны Йӧрдан юысь.

¹⁸ Господьлысь Йитӧд куд нуысь попъяс петісны Йӧрдан юысь. Налӧн кокныс сӧмын тувччис Йӧрдан ю берегас, юын ваыс важ мозыс кутіс ёна визувтны.

¹⁹ Медводдза тӧлысьлӧн дасӧд лунӧ Израиль войтыр вуджис Йӧрдан ю да сувтіс Галгалӧ. Сэтчӧ, Ериконсянь асыввылӧ, найӧ сувтӧдісны чомъяснысӧ.

²⁰ Йӧрдан юысь босьтӧм дас кык изсӧ Исус сувтӧдіс Галгалӧ.

²¹ Израиль войтырлы сійӧ шуис: «Воас кад, кор тіян пиянныд юаласны: ”Мыйла тайӧ изъясыс?”

²² Сэки ті висьталӧй налы, мый Израиль войтыр вуджис Йӧрдан юсӧ косінті,

²³ ӧд Господь, тіян Енныд, косьтіс Йӧрдан ю тіян водзысь, кытчӧдз ставныд энӧ вуджӧй сійӧс. Тадзи Господь, тіян Енныд, вӧчис тшӧтш Гӧрд саридзкӧд. Сійӧ косьтіс саридзсӧ миян водзысь, кытчӧдз ми эгӧ вуджӧй сійӧс.

²⁴ Господь вӧчис тадзи, медым му вылын олысь войтыръяс тӧдмалісны, мый Сылӧн киыс вына, и медым ті став олан лунъяс чӧжныд полінныд Господьысь, асланыд Енмысь».