Нав Исус 3 - Коми Библия 2023

Йӧрдан ю вуджӧм

¹ Водз асывнас Исус да став Израиль войтыр мӧдӧдчисны Ситтимысь да воисны Йӧрдан ю дорӧ, но эз вуджны сійӧс.

² Куим лун мысти веськӧдлысьяс кытшовтісны войтырсӧ

³ да тшӧктісны: «Кор аддзанныд, мый поп-левитъяс кутасны нуны тіян Господь Енлысь Йитӧд кудсӧ, сэки ті куд бӧрсяыс тшӧтш мӧдӧдчӧй.

⁴ Тадзи ті кутанныд тӧдны мунан туйсӧ, ӧд сійӧ туйӧдыс ті энӧ на ветлӧй. Куд да тіян костын мед лоас кык сюрс гырддза кымын коласт, таысь матӧджык Йитӧд куд дорӧ энӧ матыстчӧй».

⁵ Исус шуис войтырыслы: «Вежӧдӧй-сӧстӧммӧдӧй асьнытӧ [асывводз кежлас], ӧд аски Господь тіян пӧвстын вӧчас шензьӧданаторъяс».

⁶ А попъяслы шуис: «Босьтӧй [Господьлысь] Йитӧд кудсӧ да мунӧй войтырыс водзвылын». Попъяс босьтісны [Господьлысь] Йитӧд кудсӧ да мунісны войтырыс водзвылын.

⁷ Господь шуис Исуслы: «Талун Ме нимӧда тэнӧ став Израиль войтыр водзын. Найӧ тӧдмаласны, мый Ме тэкӧд, кыдзи вӧлі и Мӧисейкӧд.

⁸ Тшӧкты Йитӧд куд нуысь попъяслы сувтны, кор сӧмын налӧн кокныс тувччас Йӧрдан юӧ».

⁹ Исус шуис Израиль пиянлы: «Матыстчӧй да кывзӧй асланыд Господь Енлысь кывсӧ».

¹⁰ Сэсся шуис: «Ӧні ті тӧдмаланныд, мый тіян пӧвстын ловъя Ен, коді вӧтлас тіян водзысь ханаансаясӧс, хеттейясӧс, хивейясӧс, перезейясӧс, гергесейясӧс, аморейясӧс да евуссаясӧс.

¹¹ Со, став му пасьтала ыджыдалысь Господьлӧн Йитӧд кудйыс вуджас Йӧрдан ю вомӧн тіян водзвылын.

¹² Торйӧдӧй дас кык мортӧс, Израильлӧн быд чужанкотырысь ӧтиӧс.

¹³ Став му пасьтала ыджыдалысь Господьлысь Йитӧд куд нуысь попъяс кор тувччасны Йӧрдан юӧ, сэки ваыс дугдас визувтны да сувтас стенӧн».

¹⁴ Израиль войтыр мӧдӧдчис Йӧрдан юлань, медым вуджны сійӧс. Попъяс нуисны [Господьлысь] Йитӧд кудсӧ войтырыс водзвылын.

¹⁵ Вӧлі нянь вундан кад. Йӧрдан ю сэки ойдлӧ. Но кор [Господьлысь Йитӧд] куд нуысь попъяс тувччисны Йӧрдан юӧ,

¹⁶ ваыс дугдіс визувтны да сувтіс стенӧн ылӧ, Адам кар дорӧ, мый Цартан карсянь матын. А визувтысь ваыс лэччис ковтысса Сола саридзӧ да бырис.

¹⁷ Войтырыс вуджис Йӧрдан юсӧ Ерикон кар весьтӧд. Господьлысь Йитӧд куд нуысь попъяс сулалісны Йӧрдан ю шӧрын косінас, кытчӧдз Израиль пиян эз вуджны Йӧрдан юсӧ косінті.