Нав Исус 24 - Коми Библия 2023

Йитӧд выльмӧдӧм

¹ Исус чукӧртіс Израильлысь став чужанкотырсӧ Сикемӧ, корис юрнуӧдысьясӧс, юралысьясӧс, ёрдысьясӧс да веськӧдлысьясӧс. Найӧ ставныс сувтісны [Господь] Ен водзӧ.

² Став войтырыслы Исус шуис: «Господь, Израильлӧн Ен, тадзи висьталӧ: ”Важӧн тіян батьясныд олісны Ефрат ю сайын, сэні оліс тшӧтш Терах, Ӧвраамлӧн да Нахорлӧн батьыс. Найӧ кесъялісны мукӧд енъяслы,

³ но Ме петкӧді Ӧвраам батьнытӧ сэтысь, новлӧдлі сійӧс став Ханаан муӧд. Ме сеті сысянь чужны уна войтырлы. Сеті сылы Исаакӧс,

⁴ Исааклы – Яковӧс да Исавӧс. Исавлы Ме вичмӧді Сеир керӧсвыв му, а Яков пияныскӧд вуджисны Египетӧ. [Сэні найӧ лоины уна лыда, ыджыд да ён войтырӧн. Египетсаяс пондісны найӧс дзескӧдны.]

⁵ Ме сувтӧді Мӧисейӧс да Ааронӧс, дойді Египетӧс да петкӧді сэтысь тіянӧс.

⁶ Ме петкӧді батьяснытӧ Египетысь, и найӧ локтісны Гӧрд саридз дорӧдз. Египетсаяс тарантасъясӧн да верзьӧмаясӧн вӧтчисны на бӧрся сэтчӧдз.

⁷ Сэки батьясныд шыасисны отсӧгла Ме дінӧ, и Ме торйӧді найӧс египетсаясысь [кымӧрӧн да] пемыдӧн. Ме кыпӧді-бузниті саридз гыяс египетсаяс вылӧ да пӧдті найӧс. Асланыд синмӧн ті аддзылінныд ставсӧ, мый Ме вӧчи Египетын. Та бӧрын дыр кад чӧж ті олінныд овтӧминын.

⁸ Сэтысь Ме вайӧді тіянӧс аморейяслӧн муӧ, Йӧрдан ю сайӧ. Найӧ уськӧдчисны тіян вылӧ, но Ме сеті найӧс тіян киӧ. Ме бырӧді найӧс тіян водзысь, и ті босьтінныд налысь мусӧ.

⁹ Моавса Валак ӧксы, Сеппорлӧн пиыс, петіс тышӧ Израильлы паныд. Сійӧ корис Веорлысь Валаам писӧ ёрны тіянӧс.

¹⁰ Но Ме эг кут кывзыны Валаамӧс, и сійӧ бурсиис тіянӧс. Тадзи Ме мезді тіянӧс Валаклӧн киысь.

¹¹ Ті вуджинныд Йӧрдан ю да локтінныд Ерикон кар дорӧ. Ериконса олысьяс, аморейяс, перезейяс, ханаансаяс, хеттейяс, гергесейяс, хивейяс да евуссаяс тышӧ петісны тіянлы паныд, но найӧс Ме сеті тіян киӧ.

¹² Эз тіян шыпуртныд, эз тіян ньӧввужныд вӧтлы аморейяслысь кык ӧксыӧс тіян водзвылысь, а Меӧн мӧдӧдӧм гырысь зіяс.

¹³ Ме сеті тіянлы му да каръяс. Ті энӧ мырсьӧй тайӧ муас, энӧ кыпӧдлӧй каръяссӧ, кӧні ті ӧні оланныд. Ті энӧ пуктылӧй виноград да олив пуяс, но ӧні ті сёянныд сэтысь вотӧссӧ”.

¹⁴ Сідзкӧ, полӧй Господьысь да кесъялӧй Сылы сӧстӧм сьӧлӧмӧн да веськыда. Эновтчӧй енъясысь, кодъяслы кесъялісны батьясныд Ефрат ю сайын да Египетын. Кесъялӧй сӧмын Господьлы.

¹⁵ Но ті кӧ онӧ кӧсйӧй кесъявны Господьлы, бӧрйӧй талун, кутанныд-ӧ кесъявны енъяслы, кодъяслы батьясныд юрбитісны Ефрат ю сайын, либӧ аморейяслӧн енъяслы налӧн му вылын, кӧні ті ӧні оланныд. А ме аслам гортсакӧд кутам кесъявны Господьлы [ӧд Сійӧ вежа]».

¹⁶ Войтырыс вочавидзис: «Ми огӧ кежӧй Господьысь! Мукӧд енъяслы кесъявны огӧ кутӧй.

¹⁷ Ӧд Господь – миян Ен. Сійӧ петкӧдіс миянӧс да батьяснымӧс Египет муысь нартитӧм улысь. Миян син водзын Сійӧ вӧчис ыджыд индысьпасъяс, видзис миянӧс ветлан туйясын, дорйис войтыръясысь, кодъяслысь мусӧ ми вуджим.

¹⁸ Господь вӧтліс миян водзысь став войтыръяссӧ, тшӧтш аморейясӧс, кодъяс олісны тайӧ муас. Ми тшӧтш кутам кесъявны Господьлы, ӧд Сійӧ – миян Ен».

¹⁹ Исус шуис войтырыслы: «Ті онӧ вермӧй кесъявны Господьлы, ӧд Сійӧ – вежа Ен, Сійӧ – вежӧгтысь Ен. Господь оз терпит тіянлысь лёк вӧчӧмъяснытӧ да мыжъяснытӧ.

²⁰ Ті кӧ эновтанныд Господьӧс да кутанныд кесъявны мукӧд енъяслы, Сійӧ лэдзас лёксӧ тіян олӧмӧ да бырӧдас тіянӧс, мед кӧ весиг водзынсӧ Сійӧ бур вӧчис тіянлы».

²¹ Войтырыс вочавидзис Исуслы: «Ми кутам кесъявны Господьлы».

²² Исус шуис: «Ті асьныд бӧрйинныд Господьӧс да кӧсйысинныд кесъявны Сылы». Найӧ вочавидзисны: «Да, ми асьным тадзи шуим».

²³ Исус шуис: «Сідзкӧ, эновтчӧй мукӧд енъясысь да став сьӧлӧмсяньныд бергӧдчӧй Израильлӧн Господь Ен дінӧ».

²⁴ Войтырыс шуис Исуслы: «Кутам кесъявны Господьлы, асланым Енлы, да кывзысьны Сылысь».

²⁵ Сійӧ лунӧ Господь нимсянь Исус кӧрталіс войтыркӧд йитӧд. Сэні, Сикемын [Господьлӧн, Израиль Енлӧн, вежа чом водзын] сійӧ сетіс налы индӧд-тшӧктӧмъяс.

²⁶ Исус гижис тайӧ тшӧктӧмъяссӧ Енлӧн Индӧд небӧгӧ. Сэсся босьтіс ыджыд из да пуктіс сійӧс Господьлӧн вежаинӧ тупу улӧ.

²⁷ Исус шуис войтырыслы: «[Локтан кадӧ] тайӧ изйыс казьтылас, мый ті мыжаӧсь, ті кӧ соссянныд [Господьысь,] асланыд Енмысь. Ӧд тайӧ изйыс кывліс Господьлысь став кывсӧ, мый Сійӧ висьталіс миянлы [талун]».

²⁸ Исус лэдзис войтырсӧ, и быдӧн муніс аслас муӧ.

²⁹ Тайӧ лоӧмторъяс бӧрын Навлӧн Исус пиыс, Господьлӧн кесйӧг, кувсис. Сылы вӧлі сё дас арӧс.

³⁰ Сійӧс дзебисны аслас муӧ, Ефрем керӧсвывса Тимнат-Серахӧ, Гааш керӧссянь войвылӧ. [Шойыскӧд орччӧн дзебанінас пуктісны изйысь вӧчӧм пуртъяссӧ, мыйӧн Господьлӧн тшӧктӧм серти Исус вундыштіс Израиль пиянӧс Галгалын Египетысь петкӧдӧм бӧрын. Ӧнӧдз пуртъясыс сэнӧсь.]

³¹ Израиль войтыр кесъяліс Господьлы Нав Исус дырйи да сы бӧрын олысь юрнуӧдысьяс дырйи, кодъяс аддзылісны Господьлысь Израильлы вӧчӧм уджъяссӧ.

³² Ӧсиплысь лыяссӧ, мый израильсаяс петкӧдісны Египетысь, найӧ дзебисны Сикемӧ, му юкӧнӧ, мый Яков ньӧбис Хамор пиянлысь эзысь вылӧ. Хамор вӧлі Сикемлӧн бать. Тайӧ му юкӧныс пырис Ӧсипсянь чужысьяслы вичмӧдӧм муас.

³³ [Та бӧрын] Элазар [аркирей], Ааронлӧн пиыс, куліс. Сійӧс дзебисны Гива карӧ, сылӧн Пинес пиыслы Ефрем керӧсвыв муысь сетӧм карӧ.

³⁴ [Сійӧ лунӧ Израиль пиян босьтісны Енлысь кудсӧ да новлӧдлісны аскӧдныс. Пинес вӧлі Элазар батьыс бӧрся попӧн, сійӧ кесъяліс кувтӧдзыс. Сійӧс дзебӧма аслас Гива карӧ.

³⁵ Израиль пиян быдӧн муніс аслас оланінӧ, аслас карӧ.

³⁶ Кад мысти Израиль пиян пондісны кесъявны Астарталы, Астаротлы да матігӧгӧрса войтыръяслӧн мукӧд енъяслы. Та вӧсна Господь сетіс найӧс моавса Эглон ӧксы киӧ. Дас кӧкъямыс во чӧж сійӧ ыджыдаліс на вылын.]