Нав Исус 23 - Коми Библия 2023

Исуслӧн медбӧръя сёрни

¹ Дыр кад чӧж Господь [Ен] сетіс Израиль войтырлы лӧня овны да видзис найӧс вӧрӧгысь. Кор Исус вӧлі ыджыд арлыда нин,

² сійӧ чукӧртіс Израиль войтырӧс, юрнуӧдысьясӧс, юралысьясӧс, ёрдысьясӧс да веськӧдлысьясӧс. Исус шуис налы: «Ме ёна нин пӧрысьми.

³ Ті аддзылінныд ставсӧ, мый Господь, тіян Енныд, вӧчис тайӧ муас олысь войтыръяслы. Господь, тіян Енныд, Ачыс тышкасис тіян вӧсна.

⁴ Ме пудъясьӧмӧн юклі тіян чужанкотыръяслы мусӧ, мый босьтім тані олысь войтыръяслысь да сійӧ войтыръяслысь, кодъясӧс ме бырӧді Йӧрдан ю рытыввывсянь Ыджыд саридзӧдз.

⁵ Господь, тіян Енныд, Ачыс вӧтлас тіян пӧвстӧ кольӧм войтыръясӧс [кытчӧдз найӧ оз бырны. Господь мӧдӧдас зверъясӧс на вылӧ, кытчӧдз тіян водзысь оз бырӧд найӧс да налысь ӧксыяссӧ]. Сійӧ бырӧдас найӧс тіян водзысь, и налӧн муыс вичмас тіянлы, кыдзи кӧсйысис тіянлы Господь, тіян Енныд.

⁶ Лоӧй зумыдӧсь да кутчысьӧй став тшӧктӧмас, мый гижӧма Мӧисейлӧн Индӧд небӧгын, энӧ кежӧй сэтысь веськыдвылӧ ни шуйгавылӧ.

⁷ Энӧ сорласьӧй тіян пӧвстын олысь войтыръяскӧд. Энӧ казьтывлӧй налӧн енъяслысь нимъяссӧ да энӧ сетӧй кывнытӧ на водзын, энӧ кесъялӧй да энӧ юрбитӧй налӧн енъяслы.

⁸ Кутчысьӧй Господь Енныд дінӧ, кыдзи вӧчинныд талунъя лунӧдз.

⁹ Господь вӧтліс тіян водзысь ён да уна лыда войтыръясӧс. Некод эз вермы паныд сувтны тіянлы.

¹⁰ Тіян ӧти морт вӧтлас сюрс мортӧс, ӧд Ачыс Господь, тіян Енныд, вермасьӧ тіян вӧсна, кыдзи и кӧсйысис тіянлы.

¹¹ Сідзкӧ, став сьӧлӧмсяньныд радейтӧй Господьӧс, ассьыныд Ентӧ.

¹² Но кежанныд кӧ Сыысь да ӧтувтчанныд тіян пӧвстӧ кольӧм войтыръяскӧд, кутанныд рӧдвужасьны да сорласьны накӧд,

¹³ сэки тӧдӧй, мый Господь, тіян Енныд, оз кут вӧтлыны тіян водзысь тайӧ войтыръяссӧ. Найӧ лоӧны тіянлы лэчкӧн да тывйӧн, тіянлысь мышкутӧ нӧйтысь орсӧн да синманыд пырысь ёгӧн, кытчӧдз онӧ бырӧй тайӧ бур му вывсьыс, мый сетіс тіянлы Господь, тіян Енныд.

¹⁴ Меным воис кад мунны сэтчӧ, кытчӧ мунӧ мувывса быд олысь. Ас пытшканыд, асланыд сьӧлӧманыд, ті тӧданныд, мый Господь Енныдлӧн тіянлы кӧсйысьӧм кывйысь нинӧм збыльмытӧг эз коль, ставыс иніс.

¹⁵ Кыдзи збыльмис тіянлы Господь Енныдлӧн быд бурсиӧмыс, сідзи Сійӧ збыльмӧдас став ёрӧмсӧ, кытчӧдз оз бырӧд тіянӧс тайӧ бур му вывсьыс, мый сетіс тіянлы.

¹⁶ Ті кӧ торканныд асланыд Господь Енлысь йитӧдсӧ, мый Сійӧ кӧрталіс тіянкӧд, да кутанныд кесъявны-юрбитны мукӧд енъяслы, сэки Господьлӧн скӧрлуныс ӧзъяс тіян вылӧ, и регыдъя кадӧн ті быранныд тайӧ бур му вывсьыс, мый Господь сетіс тіянлы».