Нав Исус 22 - Коми Библия 2023

Куим чужанкотырлӧн Йӧрдан асыввылӧ бӧр мунӧм

¹ Исус чукӧртіс Рувим да Гад чужанкотыръясӧс да Манассейлысь джын чужанкотырсӧ и шуис налы:

² «Ті вӧчинныд ставсӧ, мый тшӧктіс тіянлы Мӧисей, Господьлӧн кесйӧг. Менсьым ті тшӧтш кывзысинныд.

³ Став тайӧ кад чӧжыс ті энӧ кольӧй вокъяснытӧ, тайӧ лунӧдз вӧчинныд, кыдзи тшӧктіс тіянлы Господь, тіян Енныд.

⁴ Ӧні Господь, тіян Енныд, Аслас кӧсйысьӧм серти сетіс вокъясныдлы лӧнь олӧм. Та вӧсна ті верманныд бӧр мунны асланыд оланінӧ, асланыд муӧ, мый Йӧрдан ю сайысь сетіс тіянлы Мӧисей, Господьлӧн кесйӧг.

⁵ Сӧмын олӧй Индӧд серти, мый тіянлы юӧртіс Мӧисей, Господьлӧн кесйӧг. Радейтӧй Господьӧс, ассьыныд Ентӧ, ветлӧй Сылӧн туйясӧд, олӧй Сылӧн тшӧктӧмъяс серти, кутчысьӧй Сы дінӧ да кесъялӧй Сылы став сьӧлӧмнад да став олӧмнад».

⁶ Исус бурсиис найӧс да лэдзис мунны. И найӧ муналісны асланыс оланінъясӧ.

⁷ Манассейлӧн джын чужанкотырлы Мӧисей сетіс мусӧ Васанысь, а мӧд джыныслы мусӧ Исус сетіс Йӧрдан ю рытыввылысь вокъясыскӧд орччӧн. Кор Исус бурсиӧмӧн лэдзис мунысьясӧс,

⁸ сійӧ шуис налы: «Ыджыд озырлунӧн ті мунанныд асланыд гортӧ. Ӧні тіян эм унасьыс-уна ыж-мӧс, эзысь-зарни, кӧрт-ыргӧн да паськӧм. Вӧрӧглысь тышын босьтӧм эмбурнас юксьӧй вокъясныдкӧд».

⁹ Рувим да Гад чужанкотыръяс да Манассейлӧн джын чужанкотырыс петісны Израиль войтыр дінысь Силомысь, Ханаан муысь. Найӧ мунісны гортаныс Галаад муӧ, мый найӧ босьтісны аслыныс, кыдзи Господь тшӧктіс Мӧисей пыр.

Йӧрдан ю бокын висьпуктанін

¹⁰ Рувим да Гад чужанкотыръяс да Манассейлӧн джын чужанкотырыс воисны Йӧрдан ю дорӧ. Сэтчӧ, Ханаан муӧ, найӧ лэптісны ыджыд висьпуктанін.

¹¹ Мукӧд Израиль пиянлы кывсис, мый Рувим да Гад чужанкотыръяс да Манассейлӧн джын чужанкотырыс Ханаан муын израильсаяслӧн оланінӧ Йӧрдан ю бокӧ лэптӧмаӧсь висьпуктанін.

¹² Сэки Израиль пиян чукӧртчисны Силомӧ, медым петны тышӧ.

¹³ Найӧ мӧдӧдісны Рувим да Гад чужанкотыръяс да Манассейлӧн джын чужанкотырыс дінӧ Галаад муӧ Элазар поплысь Пинес писӧ.

¹⁴ Сыкӧд мӧдӧдісны дас юралысьӧс, быд чужанкотырысь ӧтиӧс. Ставныс найӧ вӧліны рӧдкутысьяс.

¹⁵ Найӧ воисны Рувим да Гад чужанкотыръяс да Манассейлӧн джын чужанкотырыс дінӧ Галаад муӧ да шуисны налы:

¹⁶ «Господьлӧн став войтырыс юасьӧ, мыйла ті эновтінныд [Господьӧс] Израильлысь Енсӧ. Ті бергӧдчинныд Господьысь [Израильлӧн Енмысь], кор вӧчинныд аслыныд висьпуктанін. Тадзи ті кыпӧдчинныд Господьлы паныд.

¹⁷ Этша на ӧмӧй сійӧ мыжыс, мый ми Пеор идоллы юрбитім? Та вӧсна Господьлысь войтырсӧ суис бырӧдӧм. Ӧнія лунӧдз ми эгӧ сӧстӧммӧй тайӧ мыжсьыс.

¹⁸ Талун ті бергӧдчинныд Господьысь да кыпӧдчинныд Сылы паныд, а аски Господь скӧрмас став Израиль войтыр вылӧ.

¹⁹ Ті кӧ чайтанныд, мый муыс, кытчӧ ті овмӧдчинныд, пеж, сідзкӧ, вуджӧй Господьлӧн муӧ, кӧні сулалӧ Господьлӧн вежа чомйыс, да миян пӧвстысь босьтӧй аслыныд му юкӧнсӧ. Но энӧ кыпӧдчӧй Господьлы да миянлы паныд. Миян Господь Енлӧн висьпуктанінысь ӧтдор энӧ лӧсьӧдӧй аслыныд мӧд висьпуктанін.

²⁰ Ӧд кор Зерахлӧн Акан пиыс торкис Господьлы сиӧмтор йылысь тшӧктӧм, сэки став Израиль войтыр вылӧ лэччис Господьлӧн скӧрлуныс. Аслас мыж вӧсна эз ӧтнас Акан кув».

²¹ Рувим да Гад чужанкотыръяс да Манассейлӧн джын чужанкотырыс вочавидзисны израильса рӧдкутысьяслы:

²² «Господь – енъяслӧн Ен! Господь, енъяслӧн Ен тӧдӧ, и Израиль мед тӧдас. Ми кӧ Господьлы паныд кыпӧдчам да эновтам Сійӧс, мед Сійӧ талун бырӧдас миянӧс.

²³ Господь мед Ачыс водзӧс перъяс миянлысь, ми кӧ кежим Сыысь да вӧчим висьпуктанінсӧ сотан вись, нянь вись да бурасян вись вайӧм могысь.

²⁴ Ми лэптім висьпуктанінсӧ, ӧд полам, мый тіянсянь чужысьяс коркӧ шуасны миянсянь чужысьяслы: ”Мый тіянлы колӧ Господьсянь, Израильлӧн Енсянь!

²⁵ Йӧрдан юӧн Господь торйӧдіс миянӧс Рувим да Гад чужанкотыръясысь. Господь абу тіян Ен”. Татшӧм кывъяс вӧсна вермас лоны, мый миянсянь чужысьяс дугдасны пыдди пуктыны Господьӧс.

²⁶ Дзик та вӧсна ми шуим лэптыны висьпуктанін, а эгӧ сы могысь, медым вайны сэні сотан висьяс да мукӧд висьяс.

²⁷ Мед тайӧ висьпуктаніныс лоӧ пасӧн миян да тіян костын, тшӧтш миянсянь да тіянсянь чужысьяс костын сы йылысь, мый ми кесъялам Господьлы да сӧмын Сы водзӧ ваям сотан висьяс, бурасян висьяс да мукӧд висьяс. Сэки тіянсянь чужысьяс оз шуны миянсянь чужысьяслы, Господь пӧ абу тіян Ен.

²⁸ Ми шуим, мый тайӧ кывъяссӧ кӧ локтана кадӧ шуасны миянлы да миянсянь чужысьяслы, сэки ми вочавидзам: ”Видзӧдӧй, со Господьлӧн висьпуктанін сямаӧс вӧчӧма. Сійӧс лэптісны миян батьяс, эз сотан вись да мукӧд вись вайӧм могысь, но медым тіян да миян костын [да миянсянь чужысьяс костын] сійӧ вӧлі пасӧн”.

²⁹ Мед эськӧ оз ло сідзи, мый ми кыпӧдчам Господьлы паныд, кежам Сыысь да асланым Господь Енлӧн вежа чом водзын сулалысь висьпуктанінысь ӧтдор сувтӧдам мӧд висьпуктанін, кӧні кутам вайны сотан висьяс, нянь висьяс да мукӧд висьяс».

³⁰ Пинес поп, сыкӧд локтысь войтырлӧн юралысьяс да израильса рӧдкутысьяс кор кылісны Рувимсянь, Гадсянь да Манассейсянь чужысьяслысь кывъяссӧ, шуисны, бур пӧ.

³¹ Пинес поп, Элазарлӧн пиыс, шуис Рувимсянь, Гадсянь да Манассейсянь чужысьяслы: «Талун ми тӧдмалім, мый Господь миянкӧд, и ті энӧ эновтӧй Господьӧс. Сідзкӧ, Господь оз кут мыждыны Израиль войтырӧс».

³² Пинес поп да юралысьяс бӧр локтісны Ханаан муӧ Галаад муысь, Рувим да Гад чужанкотыръяс дінысь [да Манассейлӧн джын чужанкотыр дінысь], да вайисны Израиль пиянлы юӧр.

³³ Израиль пиянлы тайӧ вӧлі бур. Найӧ ошкисны Енмӧс, а эз петны тышӧ, медым бырӧдны Рувим да Гад чужанкотыръяслысь [да Манассейлӧн джын чужанкотырлысь] каръяссӧ.

³⁴ Рувим да Гад чужанкотыръяс [да Манассейлӧн джын чужанкотырыс] висьпуктанінсӧ нимтісны Эдӧн, ӧд шуисны, мый тайӧ висьпуктаніныс лои миян костын пасӧн сы йылысь, мый Господь эм Ен.