Нав Исус 20 - Коми Библия 2023

Каръяс, кытчӧ позьӧ пышйыны

¹ Господь шуис Исуслы:

² «Висьтав Израиль пиянлы, мед торйӧдасны аслыныс каръяс, кытчӧ вермас пышйыны морт виысь. Та йылысь Ме висьтавлі тіянлы Мӧисей пыр.

³ Быдӧн, коді мӧвпышттӧг виас мортӧс, вермас пышйыны татшӧм карас водзӧс перйысь мортысь [медым морт виысьӧс войтыр водзын мыждытӧг эз вины].

⁴ Коді пышъяс татшӧм карас, мед сувтас кар дзиръя дорӧ да висьтасяс карса юрнуӧдысьяслы, мый сійӧ вӧчис. Сэсся сійӧс лэдзасны карас да сетасны оланін.

⁵ Вир кисьтӧм вӧсна вӧтӧдысь морт кӧ локтас сэтчӧ, морт виысьӧс мед оз сетны сы киӧ. Ӧд сійӧ мӧвпышттӧг виис, эз лӧгав ни эз мустӧмт мортӧс, кодӧс виис.

⁶ Мед морт виысь олас тайӧ карас, кытчӧдз оз сувт ёрд водзӧ да кытчӧдз оз кув сійӧ кадас кесъялысь аркирей. Сӧмын та бӧрын морт виысьлы позьӧ бӧр локны гортас аслас карӧ, кытысь сійӧ пышйис».

⁷ Галилеяысь, Неффалим керӧсвыв муысь, торйӧдісны Кедеш кар, Ефрем керӧсвыв муысь – Сикем кар да Иуда керӧсвыв муысь – Киръят-Арба кар, мӧд ногӧн кӧ, Хеврон кар, медым сэтчӧ вермас пышйыны морт виысь.

⁸ А Йӧрдан ю сайысь, Ерикон кар асыввылысь, торйӧдісны татшӧм каръяс: Рувим чужанкотырлӧн муысь овтӧминса вывтасінын сулалысь Бецер кар, Гад чужанкотырлӧн Галаад муысь Рамот кар да Манассей чужанкотырлӧн Васан муысь Голан кар.

⁹ Тайӧ каръясас вермис пышйыны быдӧн, коді мӧвпышттӧг виис мортӧс, Израиль пиян пӧвстысь-ӧ либӧ йӧз муысь локтысьяс пӧвстысь-ӧ сійӧ. Тадзи сійӧ вермис пышйыны водзӧс перйысь мортысь, медым сійӧс войтыр водзын мыждытӧг эз вины.