Нав Исус 2 - Коми Библия 2023

Раав отсалӧ израильса кыйӧдчысьяслы

¹ Ситтимсянь Навлӧн Исус пиыс гусьӧн мӧдӧдіс кык кыйӧдчысьӧс. Налы шуис: «Ветлӧй тӧдмавны Ханаан мусӧ да Ерикон карсӧ». Найӧ мунісны [Ериконӧ] да пырисны керкаӧ, кӧні оліс Раав нима кырсалысь ань. Найӧ узьмӧдчисны сы ордӧ.

² Ерикон карса ӧксыӧдз воис юӧр, тайӧ войнас пӧ Израиль пиян пӧвстысь кодсюрӧ локтісны тӧдмавны мутӧ.

³ Ериконса ӧксы мӧдӧдіс ассьыс йӧзсӧ Раав дінӧ да тшӧктіс шуны сылы: «Петкӧд тэ ордӧ [войнас] локтысьясӧс, ӧд найӧ локтӧмаӧсь тӧдмавны тайӧ мусӧ».

⁴ Но Раав дзебис сы ордӧ локтӧм кык мортӧс, а ӧксыӧн мӧдӧдӧм йӧзыслы шуис: «Збыльысь, ме ордӧ волісны кык морт, но кытысь найӧ, ме ог тӧд.

⁵ Рытгорувнас, дзиръя пӧдлалан кадӧ, найӧ петісны ме ордысь, но кытчӧ мунісны, ме ог тӧд. Тэрмасьӧй, гашкӧ, суӧданныд на найӧс».

⁶ Збыльвылас ань нуӧдіс кыйӧдчысьясӧс керка вевт вылас да дзебис найӧс шабді кольтаяс улӧ.

⁷ Ӧксылӧн йӧзыс уськӧдчисны вӧтӧдны кыйӧдчысьясӧс Йӧрдан ю дорӧ нуӧдысь туйӧд да воисны ю вуджанінӧдз. Карысь налӧн петӧм бӧрын карса дзиръясӧ пӧдлалісны.

⁸ Кыйӧдчысьяслӧн узьны водтӧдз Раав кайис на дінӧ керка вевт вылас

⁹ да шуис: «Ме тӧда, мый тайӧ мусӧ Господь сетіс тіянлы. Ми ставӧн полам тіянысь. Тайӧ муас став олысьыс дзӧрӧ-тіралӧ тіянысь.

¹⁰ Ми кывлім, кыдзи Господь [Ен] тіян водзын косьтӧма Гӧрд саридзсӧ, кор ті петӧмныд Египетысь. Ми кывлім, мый ті вӧчӧмныд Йӧрдан ю сайын олысь аморейяслӧн Сигон да Ог ӧксыяскӧд. Ті бырӧдӧмныд найӧс,

¹¹ и тайӧс кылӧм бӧрын миянӧс полӧм босьтіс. Ӧні миян пӧвстысь некод оз лысьт сувтны тіянлы паныд, ӧд Господь, тіян Енныд, эм енэжас и му вылас ыджыдалысь Ен.

¹² Господь [асланыд Ен] водзын кыв сетӧй меным, мый лоанныд бур сьӧлӧмаӧсь батьӧйлӧн рӧдыс дінӧ, кыдзи ме вӧлі бур сьӧлӧма тіян дінӧ. Сетӧй меным эскӧдан пас,

¹³ мый ловйӧн колянныд бать-мамӧс, чой-вокӧс да налысь котырнысӧ».

¹⁴ Кыйӧдчысьяс шуисны сылы: «Вӧчам корӧмыд серти, а огӧ кӧ вӧчӧй, мед ми кулам тіян пыдди. Но миян йылысь некодлы энӧ висьталӧй. И кор Господь сетас миянлы тайӧ мусӧ, сэки ми лоам бур сьӧлӧмаӧсь тэ дінӧ да ассьыным кывнымӧс кутам».

¹⁵ Раав отсаліс кыйӧдчысьяслы ӧшиньӧд лэччыны гез кузя, ӧд сылӧн керкаыс вӧлі карса стен бердас.

¹⁶ Сійӧ шуис налы: «Мунӧй керӧсвыв муӧ, медым энӧ паныдасьӧй тіянӧс вӧтӧдысьяскӧд. Сэні куим лун чӧж дзебсясьӧй, кытчӧдз тіянӧс корсьысьяс бӧр оз мунны. Сэсся верманныд водзӧ мунны асланыд туйӧд».

¹⁷ Найӧ шуисны Раавлы: «Тэ кӧ ачыд он вӧч сідзи, кыдзи ми тшӧктам, ми кыв сетӧмнымӧс огӧ кутӧй.

¹⁸ Миян локтігкежлӧ кӧртав тайӧ югыдгӧрд кӧвсӧ ӧшиняд, кыті миянлы отсалін лэччыны. Тэнад бать-мамыд, вокъясыд да батьыдлӧн став рӧдыс мед локтасны тэ ордӧ.

¹⁹ Коді петас тэнад керкаысь ывлаӧ, ачыс лоӧ мыжа аслас кулӧмысь, а ми мынам тэныд кыв сетӧмысь. Но миян войтырысь кӧ кодкӧ кыпӧдас кисӧ тэнад керкаын олысь вылӧ, сэки ми лоам мыжаӧсь сылӧн кулӧмысь.

²⁰ Миян йылысь кӧ тэ кодлыкӧ висьталан [либӧ кодкӧ кисӧ лэптас миян вылӧ], сэки ми мынам тэныд кыв сетӧмысь».

²¹ Раав вочавидзис: «Мед лоас тіян шуӧм серти». Сэсся янсӧдчис накӧд. Налӧн мунӧм бӧраныс Раав кӧрталіс ӧшиняс югыдгӧрд кӧв.

²² Кыйӧдчысьяс мунісны керӧсвыв муӧ, сэні дзебсясисны куим лун чӧж, кытчӧдз найӧс вӧтӧдысьяс бӧр эз мунны. Вӧтӧдысьяс корсисны найӧс туй пӧлӧнысь, но эз аддзыны.

²³ Керӧсвыв муысь лэччӧм бӧраныс кыйӧдчысьяс вуджисны Йӧрдан ю да локтісны Навлӧн Исус пи дінӧ. Найӧ висьталісны сылы ставсӧ, мый накӧд вӧлі.

²⁴ «Господь [миян Енным] сетіс миян киӧ сійӧ мусӧ, – шуисны найӧ Исуслы. – Сэтчӧс олысьяс ставныс ёна полӧны миянысь».