Нав Исус 19 - Коми Библия 2023

Симеон чужанкотырлӧн му

¹ Мӧд пудйыс уси Симеон чужанкотырлӧн рӧдъяслы. Налы вичмис му юкӧн Иуда чужанкотырлӧн муысь.

² Налы вичмӧдӧма Бер-Шева, Шема, Молада,

³ Хацар-Шуал, Вала, Эцем,

⁴ Элтолад, Бетул, Хорма,

⁵ Сиклаг, Бет-Маркавот, Хацар-Суса,

⁶ Бет-Леваот да Шарухен каръяс – дас куим кар да нагӧгӧрса сиктъяс.

⁷ Нӧшта вичмӧдӧма Айн, Риммон, Этер да Ашан каръяс – нёль кар да нагӧгӧрса сиктъяс

⁸ Баалат-Берӧдз, мӧд ногӧн кӧ, лунвыв Рамаӧдз. Татшӧм му вичмӧдӧма Симеон чужанкотырлӧн рӧдъяслы.

⁹ Мусӧ налы торйӧдӧма Иуда чужанкотырлӧн муысь, ӧд тайӧ муыс вӧлі вывті ыджыд.

Завулон чужанкотырлӧн му

¹⁰ Коймӧд пудйыс уси Завулон чужанкотырлӧн рӧдъяслы. Налы вичмӧдӧм муыс паськӧдчӧ Сарид карӧдз.

¹¹ Сарид карсянь рытыввывлань мудорыс мунӧ Марала карӧ, воӧ Дабешетӧдз да Иокнеамлы паныда юӧдз.

¹² Сарид карсянь асыввывлань, шонді петанінлань, мудорыс мунӧ Кислот-Тавор кар, водзӧ мунӧ Даврат карӧ, а сэсся кыпӧдчӧ Яфия карӧ.

¹³ Сэсянь мудорыс мунӧ асыввылӧ Гат-Хеферӧ, водзӧ Эт-Кацинӧ, сэсся мунӧ Риммонӧдз да бергӧдчӧ Неалань.

¹⁴ Сэсянь войвыв мудорыс мунӧ Ханнатонлань да помасьӧ Иптах-Эл ковтысын.

¹⁵ Завулон чужанкотырлы вичмисны Каттат, Нахалал, Шимрон, Идеала да Виплием каръяс. Ставнас налы вичмисны дас кык кар да нагӧгӧрса сиктъяс.

¹⁶ Татшӧм му сэтчӧс каръясӧн да нагӧгӧрса сиктъясӧн вичмӧдӧма Завулон чужанкотырлӧн рӧдъяслы.

Иссакар чужанкотырлӧн му

¹⁷ Нёльӧд пудйыс уси Иссакар чужанкотырлӧн рӧдъяслы.

¹⁸ Налы вичмисны Изреель, Кесуллот, Шунем,

¹⁹ Хафараим, Шион, Анахарат,

²⁰ Раввит, Кишион, Эвец,

²¹ Ремет, Эн-Ганним, Эн-Хадда да Бет-Пацец каръяс.

²² Мудорыс мунӧ Тавор, Шагацим да Бет-Шемеш каръяс дорті да помасьӧ Йӧрдан ю дорын. Ставнас налы вичмисны дас квайт кар да нагӧгӧрса сиктъяс.

²³ Татшӧм му сэтчӧс каръясӧн да нагӧгӧрса сиктъясӧн вичмӧдӧма Иссакар чужанкотырлӧн рӧдъяслы.

Асир чужанкотырлӧн му

²⁴ Витӧд пудйыс уси Асир чужанкотырлӧн рӧдъяслы.

²⁵ Налы вичмисны Хелкат, Хали, Бетен, Аксаф,

²⁶ Аламелек, Амад да Мишал каръяс. Рытыввылын налӧн муыс нюжӧдчӧ Кармил керӧсӧдз да Шихор-Ливнат дорӧдз.

²⁷ Асыввылын мудорыс мунӧ Бет-Дагонӧ, воӧ Завулон чужанкотырлӧн му дорӧдз, водзӧ мунӧ Иптах-Эл ковтыс войвывладорӧдз [да воӧ Асафаӧ]. Налы вичмисны Бет-Эмек да Нейэл каръяс, войвылысь Кавул кар,

²⁸ тшӧтш Эврон, Рехов, Хаммон да Кана каръяс. Мудорыс мунӧ ыджыд Сидон карӧдз,

²⁹ сэсянь бергӧдчӧ да воӧ Рама карӧ, водзӧ мунӧ да воӧ Тир изкарӧ, бара бергӧдчӧ да мунӧ Хоса карӧ. Мудорыс помасьӧ Ыджыд саридз дорын. Нӧшта налы вичмисны Акзив,

³⁰ Умма, Афек да Рехов каръяс. Ставнас налы вичмисны кызь кык кар да нагӧгӧрса сиктъяс.

³¹ Татшӧм му сэтчӧс каръясӧн да нагӧгӧрса сиктъясӧн вичмӧдӧма Асир чужанкотырлӧн рӧдъяслы.

Неффалим чужанкотырлӧн му

³² Квайтӧд пудйыс уси Неффалим чужанкотырлӧн рӧдъяслы.

³³ Налӧн мудорыс заводитчӧ Хелефсянь, цананнимса тупу рассянь, мунӧ Адами-Некевӧ, сэсянь Явнеэлӧ да Лаккумӧ и помасьӧ Йӧрдан ю дорын.

³⁴ Рытыввыв мудорыс мунӧ Азнот-Таворӧ, а сэтысянь – Хукокӧ. Лунвылын Неффалим чужанкотырлӧн муыс нюжӧдчӧ Завулон чужанкотырлӧн муӧдз, рытыввылын – Асир чужанкотырлӧн муӧдз, а асыввылын – Йӧрдан юбокса Иуда карӧдз.

³⁵ Неффалим чужанкотырлы вичмисны татшӧм изкаръяс: Циддим, Цер, Хаммат, Раккат, Киннерет,

³⁶ Адама, Рама, Хацор,

³⁷ Кедеш, Эдрей, Эн-Хацор,

³⁸ Иреон, Мигдал-Эл, Хорем, Бет-Анат да Бет-Шемеш. Ставнас налы вичмисны дас ӧкмыс кар да нагӧгӧрса сиктъяс.

³⁹ Татшӧм му сэтчӧс каръясӧн да нагӧгӧрса сиктъясӧн вичмӧдӧма Неффалим чужанкотырлӧн рӧдъяслы.

Дан чужанкотырлӧн му

⁴⁰ Сизимӧд пудйыс уси Дан чужанкотырлӧн рӧдъяслы.

⁴¹ Налы вичмисны Цора, Эштаол, Ир-Шемеш,

⁴² Шаалабин, Аялон, Итла,

⁴³ Элон, Тимна, Экрон,

⁴⁴ Элтеке, Гиббетон, Баалат,

⁴⁵ Ехуд, Бене-Берак, Гат-Риммон,

⁴⁶ Ме-Яркон да Ракон каръяс, а сідзжӧ Иоппия да сыгӧгӧрса сиктъяс. Но Дансянь чужысьяс воштісны ассьыныс мусӧ.

⁴⁷ Найӧ петісны тышӧ, уськӧдчисны Лешем кар вылӧ да виалісны шыпуртӧн сэтчӧс олысьясӧс. Найӧ босьтісны карсӧ аслыныс да овмӧдчисны сэтчӧ. Лешем карлы сетісны асланыс батьлысь Дан ним. [Аморейяс кольччисны овны Еломӧ да Саламинӧ. Но найӧс вермис Ефрем чужанкотыр, и аморейяс кутісны вот мынтӧм могысь уджавны Ефрем чужанкотырлы.]

⁴⁸ Татшӧм му сэтчӧс каръясӧн да нагӧгӧрса сиктъясӧн вичмӧдӧма Дан чужанкотырлӧн рӧдъяслы. [Дансянь чужысьяс эз бырӧдны аморейясӧс, кодъяс дзескӧдісны найӧс керӧс вылын. Аморейяс эз сетны налы петны ковтысӧ, мырддисны налысь мусӧ.]

⁴⁹ Му юклӧм бӧрын Израиль пиян сетісны Навлӧн Исус пилы

⁵⁰ Ефрем керӧсвыв муысь Тимнат-Серах кар, мый сійӧ ачыс корис. Тадзи вӧчисны Господьлӧн тшӧктӧм серти. Исус дзоньталіс-лэптіс тайӧ карсӧ да овмӧдчис сэтчӧ.

⁵¹ Элазар поп, Навлӧн Исус пиыс да Израиль чужанкотыръяслӧн рӧдкутысьяс пудъясьӧмӧн юклісны ставнас мусӧ Господь водзын Силомын, вежа чом пыранін дорын.