Нав Исус 18 - Коми Библия 2023

Сизим чужанкотырлы му юклӧм

¹ Став Израиль войтыр чукӧртчис Силомӧ да сувтӧдіс вежа чом. Муыс вӧлі израильсаяслӧн киын,

² но сизим чужанкотырлы мусӧ абу на вӧлі юкӧма.

³ Исус шуис Израиль пиянлы: «Дыр-ӧ на ті кутанныд нюжмасьны да онӧ мунӧй босьтны аслыныд му, мый Господь, тіян батьяслӧн Ен, сетіс тіянлы?

⁴ Торйӧдӧй быд чужанкотырысь куим мортӧс, и ме мӧдӧда найӧс видзӧдавны мусӧ. Найӧ мед кытшовтасны мусӧ да гижаласны сы йылысь ставсӧ, медым сэсся юклыны сійӧс. Та бӧрын мед локтасны ме дінӧ.

⁵ Налы колӧ юкны му сизим пельӧ. Иуда чужанкотыр мед кольччас аслас лунвыв муӧ, и Ӧсипсянь чужысьяс мед кольччасны асланыс войвыв муӧ.

⁶ А коляс мусӧ юклӧй сизим пельӧ да гижалӧй сы йылысь ставсӧ, сэсся локтӧй ме дінӧ. Ме пудъяла сійӧс тіянлы Господь Енным водзын.

⁷ Левитъяслы тіян пӧвстын муыс оз ло, ӧд налӧн пайыс – кесъявны Господьлы попъясӧн. Гад да Рувим чужанкотыръяс да Манассейлӧн джын чужанкотырыс босьтісны нин му Йӧрдан асыввылысь. Налы сійӧс сетіс Мӧисей, Господьлӧн кесйӧг».

⁸ Му видзӧдалысьяс мӧдӧдчисны мунны. Исус тшӧктіс налы гижавны муыс йылысь. Сійӧ шуис: «Мунӧй, кытшовтӧй тайӧ мусӧ да гижалӧй сы йылысь ставсӧ, сэсся бӧр локтӧй ме дінӧ. Тані, Силомын, ме пудъяла сійӧс тіянлы Господь водзын».

⁹ Найӧ кытшовтісны мусӧ, [видзӧдалісны да] гижалісны муыс да каръясыс йылысь, юкисны мусӧ сизим пельӧ. Сэсся локтісны Исус дінӧ Силомӧ чомъяс дорӧ.

¹⁰ Силомын Исус пудъяліс мусӧ Господь водзын да юкліс сійӧс Израиль чужанкотыръяслы.

Венямин чужанкотырлӧн му

¹¹ Медводдза пудйыс уси Венямин чужанкотырлӧн рӧдъяслы. Налы вичмис му Иуда чужанкотыр да Ӧсип пиянлӧн чужанкотыръяс костысь.

¹² Венямин чужанкотырлӧн войвыв мудорыс заводитчӧ Йӧрдан ю дорсянь, мунӧ Ерикон кар бокті войвывладорсяньыс, сэсся кыпӧдчӧ рытыввылӧ керӧсвыв муӧ да помасьӧ Бет-Авен овтӧминын.

¹³ Сэсянь мудорыс мунӧ Луз карӧ, мӧд ногӧн кӧ, Вефильӧ, кытшовтӧ сійӧс лунвывладорсяньыс да лэччӧ Атарот-Аддар карӧдз, Улыс Бет-Хоронсянь лунвылын сулалысь керӧс дорӧдз.

¹⁴ Тайӧ керӧссянь мудорыс бергӧдчӧ лунвылӧ. Рытыввыв мудорыс помасьӧ Иуда чужанкотырлӧн Киръят-Ваал кар дорын, мӧд ногӧн кӧ, Киръят-Ярим кар дорын.

¹⁵ Киръят-Яримсянь лунвыв мудорыс мунӧ Сола саридзлань Нефтоах ва петанінӧдз.

¹⁶ Сэсянь мудорыс лэччӧ керӧс горулӧдз, мый сулалӧ Бен-Хинном ковтыслы воча, Рефаим ковтыссянь войвылын. Водзӧ мудорыс лэччӧ Бен-Хинном ковтысӧд Евус лунвывладорті да воӧ Рогель ва петанінӧдз.

¹⁷ Сэсянь мудорыс бергӧдчӧ войвылӧ, мунӧ Шемеш ва петанінлань да водзӧ Гелилотлань, мый Адуммим керӧслы воча, сэсянь лэччӧ Рувимлӧн Боган пи серти нимтӧм из дорӧдз.

¹⁸ Водзӧ мудорыс мунӧ Йӧрдан ковтыс бокті войвылӧ, сэсся бӧр лэччӧ Йӧрдан ковтысӧ.

¹⁹ Сэсянь мудорыс мунӧ Бет-Хогла кар войвывладортіыс да помасьӧ Сола саридзлӧн войвыв куръя дорын, кытчӧ усьӧ Йӧрдан ю. Татшӧм Венямин чужанкотырлӧн лунвыв мудорыс, а асыввыв мудорыс лоӧ Йӧрдан ю.

²⁰ Тадзи мудорыс кытшовтӧ Венямин чужанкотырлы вичмӧдӧм мусӧ.

²¹ Венямин чужанкотырлӧн рӧдъяслы вичмисны Ерикон, Бет-Хогла, Эмек-Кециц,

²² Бет-Арава, Цемараим, Вефиль,

²³ Аввим, Фара, Офра,

²⁴ Кефар-Аммони, Офни да Гева каръяс – дас кык кар да нагӧгӧрса сиктъяс.

²⁵ Нӧшта вичмисны Гаваон, Рама, Берот,

²⁶ Мицфе, Кефира, Моца,

²⁷ Рекем, Ирпиэл, Тарала,

²⁸ Цела, Элеф да Евус, мӧд ногӧн кӧ, Ерусалим, Гива да Киръят каръяс – дас нёль кар да нагӧгӧрса сиктъяс. Татшӧм му вичмӧдӧма Венямин чужанкотырлӧн рӧдъяслы.