Нав Исус 17 - Коми Библия 2023

Манассей чужанкотырлӧн му

¹ Водзӧ пудйыс уси Манассей чужанкотырлы. Манассей вӧлі Ӧсиплӧн медводдза пиыс, а Манассейлӧн медводдза пиыс вӧлі Макир, вына тышкасьысь да Галаадлӧн батьыс. Макирлы вӧлі водзынджык вичмӧдӧма Галаад да Васан муяс.

² Ӧні му вичмис тшӧтш Манассей чужанкотырлӧн мукӧд рӧдъяслы: Авиэзер, Хелек, Асриэл, Шекем, Хефер да Шемид рӧдъяслы. Тайӧ вӧліны Манассейлӧн, Ӧсип пилӧн, пияныс да налӧн рӧдъясыс.

³ Манассей чужанкотырысь Салпаадлӧн эз вӧв пияныс. Салпаад вӧлі Хеферлӧн пи, Хефер – Галаадлӧн, Галаад – Макирлӧн, Макир – Манассейлӧн. Салпаадлӧн вӧліны сӧмын Махла, Ноа, Хогла, Милка да Тирза нывъяс.

⁴ Нывъяс локтісны Элазар поп дінӧ, Навлӧн Исус пи да юралысьяс дінӧ да шуисны: «Господь тшӧктіс Мӧисейлы сетны миянлы му юкӧн, кыдзи миян рӧдысь айуловлы». Салпаадлӧн нывъяслы вӧлі сетӧма му батьныслӧн вокъяслы моз, кыдзи тшӧктіс Господь.

⁵ Йӧрдан сайысь вичмӧм Галаад да Васан муясысь кындзи Манассей чужанкотырлы вӧлі сетӧма нӧшта дас му юкӧн.

⁶ Ӧд Манассей чужанкотырысь нывъяслы вичмӧдӧма му пиянлы моз. Галаад му вӧлі сетӧма Манассей чужанкотырысь мукӧдыслы.

⁷ Манассей чужанкотырлӧн муыс паськӧдчӧ Асир чужанкотырлӧн мусянь Микметат карӧдз, мый сулалӧ Сикемлы воча. Сэсянь мудорыс мунӧ лунвылӧ Таппуах ва петанінӧдз.

⁸ Таппуах му вичмис Манассей чужанкотырлы, а налӧн му помын сулалысь Таппуах кар вичмис Ефрем чужанкотырлы.

⁹ Таппуахсянь Манассей чужанкотырлӧн мудорыс лэччӧ лунвылӧ Кана юӧдз. Сэтчӧс каръясыс Манассей чужанкотырлӧн муысь вичмисны Ефрем чужанкотырлы. Манассей чужанкотырлӧн мудорыс мунӧ ю войвывладорті да помасьӧ Ыджыд саридз дорын.

¹⁰ Ефрем чужанкотырлӧн муыс ю лунвывладорас, а Манассей чужанкотырлӧн – ю войвывладорас. Налӧн муясыс помасьӧны Ыджыд саридз дорын. Войвылын Манассей чужанкотырлӧн муыс нюжӧдчӧ Асир чужанкотырлӧн муӧдз, а асыввылын – Иссакар чужанкотырлӧн муӧдз.

¹¹ Иссакар да Асир чужанкотыръяслӧн муясысь Манассей чужанкотырлы вичмис Бет-Шеан, Ивлеам, Дор, Эн-Дор, Танак да Мегиддо каръяс, нагӧгӧрса сиктъяс да Нафет муысь коймӧд юкӧныс [сиктъяснас].

¹² Манассейсянь чужысьяс эз вермыны босьтны аслыныд тайӧ каръяссӧ, та вӧсна ханаансаяс кольччисны овны тайӧ муас.

¹³ Бӧрынджык, кор Израиль пиян вынсялісны, найӧ уджӧдісны ханаансаясӧс вот мынтӧм могысь, но эз вӧтлыны.

¹⁴ Ӧсипсянь чужысьяс шуисны Исуслы: «Мыйла тэ миянлы сетін сӧмын ӧти му юкӧн? Ми уна лыдаӧсь, ӧд Господь бурсиис миянӧс».

¹⁵ Исус вочавидзис налы: «Ті кӧ уна лыдаӧсь, мунӧй да кералӧй вӧрсӧ перезейяслӧн да рефаяслӧн муысь. Овмӧдчӧй сэтчӧ, тіянлы кӧ Ефрем керӧсвыв муын дзескыд».

¹⁶ Ӧсипсянь чужысьяс шуисны: «Тайӧ керӧсвыв муас миянлы дзескыд. Но ковтысын олӧны ханаансаяс, и налӧн эмӧсь тышӧ ветлан тарантасъяс Бет-Шеанын, сыгӧгӧрса сиктъясын да Изреель ковтысын».

¹⁷ Но Исус вочавидзис Ӧсипсянь чужысьяслы, Ефрем да Манассей чужанкотыръяслы: «Ті уна лыдаӧсь да вынаӧсь. Тіянлы оз сӧмын ӧти му юкӧн вичмы,

¹⁸ вичмас тшӧтш керӧсвыв муыс. Ті пӧрӧданныд сэтысь вӧрсӧ, и муыс помсянь помӧдзыс тіян лоӧ. Ті вӧтланныд [да верманныд] ханаансаясӧс, мед кӧ найӧ ёнӧсь, и налӧн эмӧсь тышӧ ветлан тарантасъяс».