Нав Исус 16 - Коми Библия 2023

Ефрем чужанкотырлӧн му

¹ Пудъясьӧм бӧрын Ӧсипсянь чужысьяслы вичмис му, мый заводитчӧ Йӧрдан юсянь, Ериконсянь матын, кӧні асыввылын ва петанінъяс. Сэтысянь налӧн мудорыс мунӧ овтӧминӧд да кыпӧдчӧ керӧсъяс вылӧ Вефильӧ.

² Вефильсянь мудорыс мунӧ Лузӧдз, сэсся – аркияслӧн оланін дорті Атаротӧдз.

³ Сэсянь мудорыс лэччӧ рытыввылӧ яфлетъяслӧн оланін дорті Улыс Бет-Хоронӧдз да Гезерӧдз и помасьӧ Ыджыд саридз дорын.

⁴ Татшӧм му вичмис Ӧсипсянь чужысьяслы, Манассей да Ефрем чужанкотыръяслы.

⁵ Ефрем чужанкотырлӧн рӧдъяслы вичмӧдӧма татшӧм му. Налӧн лунвыв мудорыс заводитчӧ асыввылын Атарот-Аддар карсянь, сэсянь мунӧ Вылыс Бет-Хоронӧдз [да Газараӧдз],

⁶ водзӧ Ыджыд саридз дорӧдз. Войвыв мудорнас лоӧ Микметат кар. Сэсянь мудорыс бергӧдчӧ асыввылӧ Таанат-Шилолань, кытшовтӧ сійӧс асыввывладорсяньыс да мунӧ Янох карӧдз.

⁷ Янохсянь мудорыс лэччӧ Атаротӧ да Наараӧ, мунӧ Ерикон дорті да воӧ Йӧрдан юӧдз.

⁸ Таппуахсянь войвыв мудорыс мунӧ рытыввылӧ Кана юӧд да помасьӧ Ыджыд саридз дорын. Татшӧм му вичмӧдӧма Ефрем чужанкотырлӧн рӧдъяслы.

⁹ Налы нӧшта на торйӧдӧма каръяс да нагӧгӧрса сиктъяс Манассей чужанкотырлӧн муысь.

¹⁰ Ефремсянь чужысьяс эз вӧтлыны Гезерын олысь ханаансаясӧс, та вӧсна ӧнӧдз ханаансаяс олӧны Ефрем чужанкотыр пӧвстын да уджалӧмнас мынтӧны налы вот. [Бӧрынджык фараон, египетса ӧксы, босьтіс Гезер кар да сотіс сійӧс. Сэтысь виалісны ханаансаясӧс, перезейясӧс да мукӧд олысьясӧс. Фараон сетіс карсӧ аслас нывлы козин пыдди.]