Нав Исус 13 - Коми Библия 2023

Ханаан му йылысь Господьлӧн тшӧктӧм

¹ Исус вӧлі ыджыд арлыда нин. Господь шуис сылы: «Тэ пӧрысьмин, а Израиль войтырлы уна му на колӧ босьтны аслыныс:

² филистимсаяслысь да гешурсаяслысь муяс,

³ мый пырӧны Ханаан муӧ да паськӧдчӧны Египет мудорын визувтысь Шихор юсянь войвылӧ Экрон карӧдз. Тайӧ му вылас ыджыдалӧны филистимса вит юралысь: газаса, азотса, аскалонса, гефса да экронса юралысьяс. Сэні ыджыдалӧны тшӧтш аввейяс,

⁴ кодъяс олӧны лунвылын. Ханаан муӧ пырӧ тшӧтш му сидонсаяслӧн Меарасянь Афекӧдз, аморейяслӧн оланінӧдз,

⁵ тшӧтш [филистимсаяслӧн] Гевал му да асыввыв Ливан му Ермон керӧс бокын сулалысь Ваал-Гад карсянь Лево-Хаматӧдз.

⁶ Ме вӧтла Израиль пиян водзысь керӧсвыв муын олысь сидонсаясӧс Ливансянь Мисрефот-Маимӧдз. Юк тайӧ муяссӧ Израиль войтырлы, кыдзи Ме тшӧкті тэныд.

⁷ Юк мусӧ ӧкмыс чужанкотырлы да Манассейлӧн джын чужанкотырлы [рытыввылысь мусӧ Йӧрдан юсянь Ыджыд саридзӧдз сет налы]».

Йӧрдан асыввылысь му юклӧм

⁸ Рувим да Гад чужанкотыръяслы да Манассейлӧн джын чужанкотырлы Мӧисей, Господьлӧн кесйӧг, сетіс му Йӧрдан ю асыввылысь.

⁹ Лунвылын налӧн муыс заводитчӧ Арнон ю бокын сулалысь Ароэр карсянь да Арнон ковтыс шӧрын сулалысь карсянь. Налӧн муас пырӧны Медева вывтасін Дивон карӧдз,

¹⁰ аморейяслӧн Хешбонын юралысь Сигон ӧксылӧн каръяс аммон войтырлӧн оланінӧдз,

¹¹ нӧшта Галаад, Гешур да Маака муяс, Ермон керӧс да став Васан му Салка карӧдз.

¹² Васан муыс вӧлі Ог ӧксылӧн, коді юраліс Аштарот да Эдрей каръясын. Сійӧ вӧлі рефа войтырысь медбӧръя морт. Мӧисей вермис тайӧ войтырсӧ да босьтіс налысь мусӧ.

¹³ Но израильсаяс эз вӧтлыны гешурсаясӧс да маакасаясӧс [да ханаансаясӧс], и гешурсаяс да маакасаяс ӧнӧдз олӧны израильсаяс пӧвстын.

¹⁴ Сӧмын Левий чужанкотырлы Мӧисей эз сет мусӧ. Налӧн пайыс – висьяс, мый Израиль войтыр вайӧ Господьлы, аслас Енлы. Тадзи лӧсьӧдіс Господь. [Йӧрдан сайысь, Ериконлы воча Моав ласта вылысь Мӧисей юкліс му Израиль чужанкотыръяслы тадзи:]

¹⁵ Рувим чужанкотырлӧн рӧдъяслы Мӧисей сетіс

¹⁶ му Арнон ю бокын сулалысь Ароэр карсянь да Арнон ковтыс шӧрын сулалысь карсянь войвылӧ, тшӧтш Медева вывтасін,

¹⁷ Хешбон да сы гӧгӧрысь вывтасінса каръяс – Дивон, Вамот-Ваал, Бет-Ваал-Меон,

¹⁸ Яхац, Кедемот, Мефат,

¹⁹ Киръятаим, Сивма да Церет-Шахар, мый сулалӧ ковтысса керӧс вылын.

²⁰ Мӧисей сетіс Рувим чужанкотырлы тшӧтш Бет-Пеор да Бет-Ешимот каръяс, Фасга керӧс,

²¹ мукӧд вывтасінса каръяс да аморейяслӧн Сигон ӧксылысь став мусӧ. Сигон ӧксы юраліс Хешбонын. Мӧисей пасьвартіс Сигонӧс да сылысь киподувса мадианса ӧксыясӧс. Тайӧ вӧліны Эви, Рекем, Цур, Хур да Ревай, кодъяс олісны Сигон ӧксылӧн муын.

²² Израиль пиян виисны тшӧтш Веорлысь Валаам писӧ, коді вӧлі тунасьысь.

²³ Рытыввылын Рувим чужанкотырлӧн мудорнас вӧлі Йӧрдан ю. Став тайӧ мусӧ сэтчӧс кар-сиктъяснас вичмӧдӧма Рувим чужанкотырлӧн рӧдъяслы.

²⁴ Гад чужанкотырлӧн рӧдъяслы Мӧисей сетіс

²⁵ Язер кар, Галаадысь став карсӧ да аммон войтырлысь джын мусӧ Ароэр карӧдз, мый сулалӧ Равва карсянь матын.

²⁶ Гад чужанкотырлӧн муыс нюжӧдчис Хешбон карсянь Рамат-Мицфе да Бетоним каръясӧдз, Маханаим карсянь Девирӧдз.

²⁷ Йӧрдан ковтысысь налӧн муас пырисны Бет-Харам, Бет-Нимра, Суккот да Цафон каръяс, хешбонса Сигон ӧксылӧн коляс му. Рытыввыв мудорнас вӧлі Йӧрдан ю Киннерет тыӧдз.

²⁸ Став тайӧ мусӧ сэтчӧс кар-сиктъяснас вичмӧдӧма Гад чужанкотырлӧн рӧдъяслы.

²⁹ Манассей джын чужанкотырлӧн рӧдъяслы Мӧисей сетіс

³⁰ му Маханаим карсянь войвылӧ. Сэтчӧ пырисны Васан му, кӧні юравліс Ог ӧксы, да сэтчӧс муысь Яирлӧн квайтымын сикт.

³¹ Галаад мулысь джынсӧ да Ог ӧксылысь васанса Аштарот да Эдрей каръяссӧ вӧлі сетӧма Манассейлӧн Макир пиыслӧн джын рӧдлы.

³² Тайӧ муяссӧ Мӧисей юкліс Йӧрдан асыввылысь, Ериконлы воча Моав ласта вылысь.

³³ Но Левий чужанкотырлы Мӧисей мусӧ эз сет. Налӧн пайыс – Господь, Израильлӧн Ен, кыдзи Сійӧ Ачыс шуис налы.