Нав Исус 11 - Коми Библия 2023

Войвывса ӧксыясӧс вермӧм

¹ Та йылысь кылӧм бӧрын хацорса Явин ӧксы мӧдӧдіс ассьыс йӧзсӧ мадонса Иовав ӧксы дінӧ, шимронса да аксафса ӧксыяс дінӧ,

² нӧшта ӧксыяс дінӧ, кодъяс олісны войвыв керӧсъяс вылын, Йӧрдан ковтысын Киннерет тысянь лунвылын, керӧсбердса муын да рытыввыв Нафат-Дор муын.

³ Явин ӧксы ыстіс ассьыс йӧзсӧ тшӧтш асыввылын да саридз бокын олысь ханаансаяс дінӧ, керӧсвыв муын олысь аморейяс, хеттейяс, перезейяс да евуссаяс дінӧ, тшӧтш хивейяс дінӧ, кодъяс олісны Ермон бокын Миспа муын.

⁴ Став тайӧ ӧксыыс асланыс тышкайӧзкӧд петісны тышӧ. Найӧ вӧліны саридздор лыа мында, и налӧн вӧлі унасьыс-уна вӧв да тарантас.

⁵ Чукӧртчӧм бӧрын ӧксыяс сувтісны Мером ты дорӧ, медым уськӧдчыны Израиль вылӧ.

⁶ Господь шуис Исуслы: «Эн пов наысь. Аски тайӧ кадас Ме сета израильса тышкайӧзлы пасьвартны найӧс. Вӧвъясныслысь кок сӧнсӧ вундав, а тарантасъяссӧ сот».

⁷ Исус да сылӧн тышкайӧзыс локтісны Мером ты дорӧ да виччысьтӧг уськӧдчисны вӧрӧгныс вылӧ.

⁸ Господь сетіс найӧс Израиль киӧ. Израильсаяс вермисны тышын да вӧтӧдісны найӧс войвылын ыджыд Сидон карӧдз да Мисрефот-Маимӧдз, а асыввылын Мицфе ковтысӧдз. Ставнысӧ виалісны. Некод ловйӧн эз коль [и эз пышйы].

⁹ Исус вӧчис Господьлӧн тшӧктӧм серти – вӧрӧглӧн вӧвъясыслысь кок сӧнсӧ вундаліс, а тарантасъяссӧ сотіс.

¹⁰ Бӧрсӧ локтігас Исус босьтіс Хацор кар да виис шыпуртӧн хацорса ӧксыӧс. Таӧдз Хацор кар вӧлі сэтчӧс ӧксыяслӧн каръясысь медтӧдчанаыс.

¹¹ Виисны шыпуртӧн тшӧтш сэтчӧс олысьясӧс, дзикӧдз бырӧдісны став ловъя олысьсӧ. Хацор карсӧ Исус сотіс.

¹² Исус босьтіс тшӧтш мукӧд ӧксыяслысь каръяссӧ, виис шыпуртӧн став ӧксысӧ да сэтчӧс олысьясӧс. Сійӧ дзикӧдз бырӧдіс ставнысӧ, кыдзи тшӧктіс Мӧисей, Господьлӧн кесйӧг.

¹³ Но налысь керӧсвывса каръяссӧ израильсаяс эз сотны. Исус сотіс сӧмын Хацор кар.

¹⁴ Тайӧ каръясысь шедӧдӧмторсӧ да ыж-мӧссӧ Израиль пиян босьтісны аслыныс. А став йӧзсӧ виалісны шыпуртӧн, ловъя морт эз коль.

¹⁵ Кыдзи Господь тшӧктіс Аслас Мӧисей кесйӧглы, сідзи Мӧисей тшӧктіс Исуслы. Исус нинӧм эз торк сыысь, мый Господь тшӧктіс Мӧисейлы.

Муяс босьтӧм

¹⁶ Исус босьтіс тайӧ муяссӧ: керӧсвыв му, Негев да Гошен муяс, керӧсбердса му, Йӧрдан ковтыс, Израиль керӧсъяс да на бердысь му.

¹⁷ Босьтӧм муяс нюжӧдчисны Сеир керӧсвыв му дорын сулалысь Халак керӧссянь Ваал-Гад карӧдз, мый сулалӧ Ермон керӧс бердын Ливан ковтысын. Став сэтчӧс ӧксысӧ Исус босьтіс пленӧ да виис.

¹⁸ Тайӧ ӧксыясыскӧд Исус вермасис дыр кад чӧж.

¹⁹ Гаваон карын олысь хивейяс кындзи некод эз кӧртав йитӧд Израиль пиянкӧд. Став мукӧд карсӧ израильсаяс босьтісны тышӧн.

²⁰ Ӧд Господь чорзьӧдіс тайӧ войтыръяслысь сьӧлӧмсӧ да ышӧдіс найӧс уськӧдчыны Израиль войтыр вылӧ, медым израильсаяс жалиттӧг дзикӧдз бырӧдісны найӧс, кыдзи Господь тшӧктіс Мӧисейлы.

²¹ Тайӧ кадас Исус петіс енак войтырлы паныд тышӧ да пасьвартіс найӧс керӧсвывса Хеврон, Девир да Анав каръясын, Иуда да Израиль керӧсвыв муясын. Исус дзикӧдз бырӧдіс найӧс да налысь каръяссӧ.

²² Израиль муын эз коль енак войтырысь ни ӧти морт, найӧ колисны сӧмын Газаын, Гефын да Азотын.

²³ Тадзи Исус босьтіс ставнас мусӧ, кыдзи Господь висьталіс Мӧисейлы. Исус юкліс мусӧ Израильлӧн чужанкотыръяслы. Тышъяс бӧрын тайӧ муас пуксис лӧнь кад.