Нав Исус 10 - Коми Библия 2023

Аморейяскӧд тыш дырйи шонді сувтӧдӧм

¹ Ерусалимса Адони-Седек ӧксылы кывсис, мый Исус босьтӧма да дзикӧдз бырӧдӧма Гай карсӧ да сэтчӧс ӧксыӧс, кыдзи бырӧдӧма Ерикон карсӧ да сэтчӧс ӧксыӧс. Нӧшта кывсис, мый гаваонса олысьяс кӧрталӧмаӧсь йитӧд [Исускӧд да] израильсаяскӧд да кольччӧмаӧсь овны на пӧвстӧ.

² Адони-Седек ёна повзис, ӧд Гаваон кар вӧлі ӧксыяслӧн юралан каръяс кодь ыджыд. Сійӧ вӧлі Гай карысь на ыджыд, и сэтчӧс айуловыс вӧліны вына тышкасьысьяс.

³ Та вӧсна ерусалимса Адони-Седек ӧксы мӧдӧдаліс ассьыс йӧзсӧ хевронса Гогам ӧксы дінӧ, ярмутса Фирам ӧксы дінӧ, лакишса Яфий ӧксы дінӧ да эглонса Девир ӧксы дінӧ висьтавны:

⁴ «Локтӧй ме дінӧ, отсалӧй пасьвартны Гаваон кар, ӧд сэтчӧс олысьяс кӧрталӧмаӧсь йитӧд Исускӧд да Израиль пиянкӧд».

⁵ Аморейяслӧн витнан ӧксыыс – ерусалимса, хевронса, ярмутса, лакишса да эглонса ӧксыяс – асланыс тышкайӧзкӧд чукӧртчисны Гаваон кар дорӧ, медым уськӧдчыны сы вылӧ.

⁶ Гаваонса олысьяс мӧдӧдісны мортӧс Исус дінӧ Галгалӧ, кӧні сулалісны израильсаяслӧн чомъясыс, медым шуны: «Ми – тэнад кесйӧгъяс. Эн коль миянӧс, лок ӧдйӧджык миянлы отсӧг вылӧ. Мезды миянӧс, ӧд керӧсвыв муын олысь аморейяслӧн став ӧксыыс чукӧртчисны, медым уськӧдчыны миян вылӧ».

⁷ Тайӧс кылӧм бӧрын Исус мӧдӧдчис Галгалысь аслас тышкайӧзкӧд, код пӧвстын вӧліны медбур тышкасьысьяс.

⁸ Господь шуис Исуслы: «Эн пов аморейясысь, Ме сета найӧс тэнад киӧ. На пӧвстысь некод оз вермы водзсасьны тэкӧд».

⁹ Галгалысь петӧм бӧрын Исус муніс войбыд. Сійӧ уськӧдчис аморейяс вылӧ буретш сэки, кор найӧ эз виччысьны тайӧс.

¹⁰ Господь шӧйӧвоштіс аморейясӧс израильса тышкайӧзлӧн син водзын. Гаваон дорын израильсаяс пасьвартісны аморейясӧс. Сэсся Бет-Хоронӧ кайысь туйӧд Азека да Македа каръясӧдз вӧтчисны пышйысьяс бӧрся да бырӧдісны найӧс.

¹¹ Кор найӧ израильса тышкайӧзысь пышйигӧн лэччисны Бет-Хорон керӧс вылысь, Господь шыблаліс на вылӧ енэжсянь гырысь йиа шер. Тадзи вӧлі Азека карӧдз став туй чӧжныс, и унаӧн кулісны. Унджыкыс кулісны эз израильсаяслӧн шыпурт помысь, а гырысь йиа шер улӧ веськалӧмысь.

¹² Сійӧ лунӧ, кор Господь [Ен] сетіс аморейясӧс Израиль пиянлӧн киӧ, Исус шыасис Господь дінӧ израильсаяс водзын. Сійӧ шуис: – Шонді, сувт Гаваон весьтӧ! Тӧлысь, сулав Аялон ковтыс весьтын!

¹³ Шондіыс сувтіс, и тӧлысьыс сулаліс, кытчӧдз Израиль войтыр эз перйы водзӧс вӧрӧглысь. Тадзи гижӧма Веськыда олысьлӧн небӧгын. Шондіыс лунтыр сулаліс енэж шӧрас, эз тэрмась лэччыны рытыввылӧ.

¹⁴ Татшӧм луныс, кор Господь тадзи вӧчис мортлӧн корӧм серти, таӧдз ни та бӧрын эз вӧвлы. Ачыс Господь тышкасис Израиль вӧсна.

¹⁵ Та бӧрын Исус да став израильса тышкайӧзыс бӧр локтісны Галгалӧ асланыс чомъясӧ.

¹⁶ А витнан ӧксыыс пышйисны Македаӧ да дзебсисны кырта горсйӧ.

¹⁷ Кор Исусӧдз воис юӧр, мый витнан ӧксыыс сюрӧмаӧсь, и мый найӧ дзебсясьӧны Македа кырта горсйын,

¹⁸ сійӧ шуис: «Кырта горс вомсӧ тупкӧй ыджыд изъясӧн да сувтӧдӧй видзысьясӧс.

¹⁹ А ті водзӧ вӧтӧдӧй вӧрӧгтӧ. Виалӧй ставнысӧ, энӧ лэдзӧй налы пышйыны асланыс каръясӧ. Господь, тіян Енныд, сетас найӧс тіян киӧ».

²⁰ Исус да Израиль пиян дзикӧдз пасьвартісны вӧрӧгӧс. Коли сӧмын лыда морт, кодъяс вермисны пышйыны асланыс изкаръясӧ.

²¹ Став израильса тышкайӧзыс дзоньвидзаӧн бӧр локтісны Македаӧ сувтӧдӧм чомъясӧ Исус дінӧ. Израиль пиян вылӧ некод эз лысьт весиг вомсӧ восьтны.

²² Исус шуис: «Кырта горсйысь витнан ӧксысӧ вайӧдӧй ме дінӧ».

²³ Вӧчисны Исуслӧн тшӧктӧм серти, петкӧдісны кырта горсйысь ерусалимса, хевронса, ярмутса, лакишса да эглонса ӧксыясӧс.

²⁴ Ӧксыясӧс вайӧдӧм бӧрын Исус чукӧртіс Израиль войтырӧс да шуис тышкайӧзӧн веськӧдлысьяслы, кодъяс ветлісны сыкӧд тышӧ: «Матыстчӧй, тувччӧй кокнаныд ӧксыяслы голя выланыс». Найӧ сідзи и вӧчисны.

²⁵ Исус шуис аслас йӧзлы: «Энӧ полӧй да энӧ тіралӧй! Лоӧй зумыдӧсь да повтӧмӧсь! Господь тадзи вӧчас став вӧрӧгныдкӧд, кодъяскӧд кутанныд тышкасьны».

²⁶ Сэсся Исус виис ӧксыясӧс да ӧшӧдіс шойяссӧ вит пу вылӧ. Сэні найӧ ӧшалісны рытӧдзыс.

²⁷ Шонді пуксигӧн Исус тшӧктіс лэдзны шойяссӧ пуяс вылысь да шыбитны кырта горсйӧ, кӧні ӧксыясыс дзебсясисны. Кырта горс пыранінсӧ тупкисны ыджыд изъясӧн. Тайӧ изъясыс ӧнӧдз сэнӧсь.

Ханаан муысь лунвыв каръяс босьтӧм

²⁸ Тайӧ лунӧ Исус босьтіс Македа кар, шыпуртӧн виис сэтчӧс олысьясӧс да налысь ӧксысӧ. Дзикӧдз бырӧдіс став ловъя олысьсӧ. Некод ловйӧн эз коль [и эз пышйы]. Македаса ӧксылы Исус вӧчис ериконса ӧксылы моз.

²⁹ Македа карысь Исус мӧдӧдчис израильса тышкайӧзкӧд Ливна карӧ да уськӧдчис сы вылӧ.

³⁰ Господь сетіс Ливна кар да сэтчӧс ӧксыӧс израильсаяслӧн киӧ [и найӧ босьтісны сійӧс аслыныс]. Исус бырӧдіс карсӧ да виис шыпуртӧн сэтчӧс став ловъя олысьсӧ. Некод ловйӧн эз коль [и эз пышйы]. Ливнаса ӧксылы Исус вӧчис ериконса ӧксылы моз.

³¹ Ливна карысь Исус мӧдӧдчис израильса тышкайӧзкӧд Лакиш карӧ. Найӧ сувтісны карыслы воча да уськӧдчисны сы вылӧ.

³² Мӧд луннас Господь сетіс Лакиш кар израильсаяслӧн киӧ. Ливна карӧс моз найӧ босьтісны Лакиш кар, бырӧдісны сійӧс да виисны шыпуртӧн сэтчӧс став ловъя олысьсӧ.

³³ Тыш дырйи Лакиш карлы отсӧг вылӧ локтіс гезерса Хорам ӧксы. Но Исус вермис сійӧс да сылысь войтырсӧ [шыпуртӧн], ставнысӧ ӧтитӧг виис. Некод ловйӧн эз коль [и эз пышйы].

³⁴ Лакиш карысь Исус мӧдӧдчис израильса тышкайӧзкӧд Эглон карӧ. Найӧ сувтісны карыслы воча да уськӧдчисны сы вылӧ.

³⁵ [Господь сетіс Эглон карӧс израильсаяслӧн киӧ.] Сійӧ жӧ лунӧ найӧ босьтісны карсӧ да виисны шыпуртӧн сэтчӧс став ловъя олысьсӧ. Лакиш карӧс моз найӧ дзикӧдз бырӧдісны Эглон кар.

³⁶ Эглон карысь Исус мӧдӧдчис израильса тышкайӧзкӧд Хеврон карӧ да уськӧдчис сы вылӧ.

³⁷ Найӧ босьтісны Хеврон кар да бырӧдісны сійӧс, виисны шыпуртӧн сэтчӧс олысьясӧс да налысь ӧксысӧ, бырӧдісны сэтчӧс став кар-сиктсӧ да став ловъя олысьсӧ. Эглон карӧс моз Исус дзикӧдз бырӧдіс Хеврон кар да сэтчӧс став ловъя олысьсӧ.

³⁸ Сэсся Исус израильса тышкайӧзкӧд бергӧдчис Девир карлань да уськӧдчис сы вылӧ.

³⁹ Найӧ босьтісны Девир кар да сэтчӧс став кар-сиктсӧ. Виалісны шыпуртӧн ӧксыӧс да сэтчӧс став ловъя олысьсӧ. Хеврон да Ливна каръясӧс да сэтчӧс ӧксыясӧс моз Исус дзикӧдз бырӧдіс Девир кар да сэтчӧс ӧксыӧс.

⁴⁰ Исус босьтіс керӧсвыв му, Негев му, нӧшта рытыввыв да асыввыв керӧсбердса муяс, виис сэтчӧс ӧксыясӧс да олысьясӧс. Исус дзикӧдз бырӧдіс став ловъя олысьсӧ, кыдзи тшӧктіс Господь, Израильлӧн Ен.

⁴¹ Исус босьтіс Кадеш-Варнисянь Газаӧдз став мусӧ да Гаваонӧдз Гошен му.

⁴² Ӧтчыдысь уськӧдчӧмӧн сійӧ пасьвартіс тайӧ муяссӧ да налысь ӧксыяссӧ, ӧд Господь, Израильлӧн Ен, тышкасис Израиль вӧсна.

⁴³ Сэсся Исус аслас тышкайӧзкӧд бӧр локтіс Галгалӧ сувтӧдӧм чомъясӧ.