Нав Исус 1 - Коми Библия 2023

Нав Исус – войтырӧс нуӧдысь

¹ Кор Мӧисей, Господьлӧн кесйӧг, куліс, Господь шуис Навлӧн Исус пилы, Мӧисейлӧн отсасьысьлы:

² «Менам Мӧисей кесйӧгӧй куліс. Ӧні тэ вуджӧд Израиль войтырӧс Йӧрдан ю сайӧ сійӧ муас, мый Ме сета налы.

³ Кытчӧ сувтас тіян кокныд, сійӧ мусӧ Ме сета тіянлы, кыдзи Ме кӧсйыси Мӧисейлы.

⁴ Овтӧминсянь Ливанӧдз да ыджыд Ефрат юсянь рытыввыв Ыджыд саридзӧдз хеттейяслӧн став муыс лоӧ тіян.

⁵ Тэныд паныд сувтны некод оз вермы став тэнад олан лунъяс чӧжыд. Ме лоа тэкӧд, кыдзи вӧлі Мӧисейкӧд. Ог эновт да ог коль тэнӧ.

⁶ Ло зумыд да повтӧм! Тэ юклан Израиль войтырлы мусӧ, мый Ме кыв сетӧмӧн кӧсйыси сетны налӧн батьяслы.

⁷ Ло зумыд да повтӧм! Ов став Индӧдыс серти, кыдзи тшӧктіс тэныд Мӧисей, Менам кесйӧгӧй. Эн кеж Индӧдысь веськыдвылӧ ни шуйгавылӧ. Сэки тэнад ставыс артмас.

⁸ Тайӧ Индӧд небӧгысь кывъясыс мед пыр лоӧны тэнад вомын. Лун и вой велӧдчы, медым ставсӧ вӧчны стӧча, мый сэні гижӧма. Сэки тэнад ставыс артмас.

⁹ Ме тшӧкта тэныд: ло зумыд да повтӧм! Эн тірав да эн пов, ӧд Господь, тэнад Енмыд, лоӧ тэкӧд быдлаын, кытчӧ тэ мунан».

¹⁰ Исус тшӧктіс войтырӧн веськӧдлысьяслы

¹¹ кытшовтны чомъяссӧ да висьтавны войтырыслы: «Дасьтӧй сёян, ӧд куим лун мысти ті вуджанныд Йӧрдан ю сайӧ, медым босьтны аслыныд му, мый Господь, тіян [батьяслӧн] Ен, сетас тіянлы пыр кежлӧ».

¹² Рувим да Гад чужанкотыръяслы да Манассейлӧн джын чужанкотырлы Исус шуис:

¹³ «Энӧ вунӧдӧй, мый тшӧктіс тіянлы Мӧисей, Господьлӧн кесйӧг. Сійӧ ӧд шуис, мый Господь, тіян Енныд, сетас тіянлы тайӧ мусӧ, кӧні ті кутанныд лӧня овны.

¹⁴ Ӧні тіян гӧтырныд, ныв-пиныд да ыж-мӧсныд мед кольччасны тайӧ муас, мый Мӧисей сетіс тіянлы Йӧрдан таладорысь. А ті, кодъяс верманныд петны тышӧ, босьтӧй шыпуртнытӧ, да вокъясныд водзвылын вуджӧй Йӧрдан ю сайӧ. Отсалӧй вокъясныдлы,

¹⁵ кытчӧдз Господь, тіян Енныд, оз сет налы сійӧ мусӧ, кӧні найӧ кутасны тіян моз лӧня овны. Кор найӧ босьтасны аслыныс сійӧ мусӧ, ті верманныд бӧр локны асланыд муӧ, мый Мӧисей, Господьлӧн кесйӧг, сетіс тіянлы Йӧрдан ю таладорысь, асыввыв муысь».

¹⁶ Найӧ вочавидзисны Исуслы: «Ми вӧчам ставсӧ, мый тшӧктан. Кытчӧ миянӧс мӧдӧдан, сэтчӧ ми и мунам.

¹⁷ Ми кутам кывзысьны тэнсьыд, кыдзи кывзысим Мӧисейлысь. Сӧмын мед Господь, тэнад Енмыд, лоас тэкӧд, кыдзи Сійӧ вӧлі Мӧисейкӧд.

¹⁸ Мед лоӧ виӧма быдӧнӧс, коді кыпӧдчас тэныд паныд да оз кывзы тэнсьыд тшӧктӧмтӧ. Ло зумыд да повтӧм!»