Наум 1 - Коми Библия 2023

¹ Ниневия йылысь водзвыв висьталӧм. Элкошысь Наумлы Енсянь восьтӧм йылысь небӧг.

Господь – водзӧс перйысь Ен

² Господь – вежӧгтысь Ен, Сійӧ – водзӧс перйысь Ен. Господь водзӧс перйӧ, Сійӧ тырӧма скӧрлунӧн. Господь мынтысьӧ Сійӧс мустӧмтысьяслы, Сійӧ дугдывтӧг скӧралӧ паныд сувтысьяс вылӧ.

³ Господь дыр терпитӧ, Сылӧн выныс помтӧм-дортӧм, Сійӧ оз коль лёксӧ мыждытӧг. Господь локтӧ тӧвныр да бушков моз, Сылӧн воськовъясысь бус моз кыпӧдчӧны кымӧръяс.

⁴ Сійӧ тшӧктӧ, и саридзыс косьмӧ, юяс косьмӧны, Васан ыб да Кармил керӧс вылысь быдмӧгъяс нярмӧны, нярмӧны ливанса дзоридзьяс.

⁵ Сы водзын дзӧрӧны керӧсъяс, тіралӧны мылькъяс. Муыс тіралӧ Сы водзын, дзӧрӧны муюгыдыс да став сэні олысьыс.

⁶ Коді вермас паныд сувтны Сылӧн лӧглунлы, коді вермас ловйӧн кольны Сылӧн ыпъялан скӧрлунысь? Сылӧн скӧрлуныс би моз разалӧ, Сы водзын потласьӧны-жугалӧны изкыртаяс.

⁷ Господь – бур, Сійӧ дорйӧ сьӧкыд кадӧ, Сійӧ тӧдӧ Сы вылӧ лача кутысьясӧс.

⁸ Ыджыд ытваӧн Сійӧ подулӧдзыс жугӧдас Ниневия кар, Ассьыс вӧрӧгсӧ Сійӧ вӧтлас пемыдінӧ.

Иудалы да Ниневиялы водзвыв висьталӧмъяс

⁹ Мыйла ті мӧвпаланныд кыпӧдчыны Господьлы паныд? Сійӧ бырӧдас паныд сувтысьясӧс, и сьӧкыд кадыс сэсся оз нин ло.

¹⁰ Найӧ коддзӧм морт кодьӧсь, дзугсьӧмаӧсь бытшкасьысь турун пӧвстӧ, найӧ сотчасны кос идзас моз.

¹¹ Ниневия карысь петіс Господьлы паныд кыпӧдчысь, лёксӧ-шогмытӧмсӧ вӧчны мӧвпалысь.

¹² Господь тадзи висьталӧ: – Вӧрӧглӧн лыдыс лыдтӧм-тшӧттӧм, найӧ вынаӧсь, но найӧс кераласны, и найӧ бырасны. Иуда, тэныд Ме мӧдӧдлі уна сьӧкыдлун, но водзӧ ог кут сьӧктӧдны тэнӧ.

¹³ Ӧні Ме босьта тэнад сьылі вылысь налысь сийӧссӧ да жугӧда сійӧс, орӧда тэнсьыд чепъястӧ.

¹⁴ Ниневия кар йылысь Господь тадзи шуӧ: – Тэнад нимыд бырас, водзӧ чужысьясыд оз лоны. Тэнад крамысь Ме жугла идолъястӧ да бӧлбанъястӧ, дасьта тэнӧ гуаланін, ӧд тэ нинӧм кодь.

¹⁵ Со, керӧсъяс вывті локтӧ бур юӧр вайысь. Сійӧ лӧнь олӧм йылысь юӧртӧ: – Иуда, пасйы гажӧдчан лунъястӧ, вай кыв сетан висьястӧ. Лёк йӧз оз нин мунны тэнад муӧд, найӧс дзикӧдз бырӧдӧма!