Микей 6 - Коми Библия 2023

Мый Господь виччысьӧ мортсянь?

¹ Кывзӧй, мый висьталӧ Господь: – Сувт ёрд водзӧ, висьтась керӧсъяс водзын, мылькъяс мед кыласны тэнсьыд гӧлӧс шытӧ!

² Кывзӧй, керӧсъяс, Господьлысь мыжалӧмсӧ! Кывзӧй, муыслӧн вешйывтӧм подувъяс! Ӧд Господь мыжалӧ Ассьыс войтырсӧ, корӧ Израильӧс ёрд водзӧ.

³ – Войтырӧй, мый Ме тэныд вӧчи? Мыйӧн сьӧктӧді тэнӧ, вочавидз Меным!

⁴ Ме петкӧді тэнӧ Египет муысь, мезді тэнӧ нартитӧм улысь, водзвылад ысті Мӧисейӧс, Ааронӧс да Мирьямӧс.

⁵ Войтырӧй, эн вунӧд, мый мӧвпыштіс вӧчны моавса Валак ӧксы, мый сылы вочавидзис Веорлӧн Валаам пиыс, мый вӧлі тіянкӧд Ситтимсянь Галгалӧдз. Ставсӧ тайӧс уськӧд тӧд вылад, медым тӧдін Господьлысь веськыдлунсӧ.

⁶ – Мый меным вайны Господьлы, кор локта Сы водзӧ, кор копыртча енэжвывса Енлы? Гашкӧ, сотан вись вая, арӧса ӧшпиӧс вая?

⁷ Шогмана-ӧ лоӧ Господьлы, вая кӧ сюрс межӧс, вая кӧ ю моз визувтысь олив вый? Сета ӧмӧй ассьым медводдза чужысьӧс лёк вӧчӧмӧй вӧсна, сьӧлӧмувса кагаӧс – мыжӧй вӧсна?

⁸ Мортӧй, тэныд юӧртӧма, мый бурыс да мый виччысьӧ тэсянь Господь. Сійӧ кӧсйӧ, медым уджъясыд вӧліны веськыдӧсь, медым вӧлін бур сьӧлӧма да раммӧдчӧмӧн олін Ен водзын.

Господь мыждӧ Ассьыс войтырсӧ

⁹ Мывкыд морт вежавидзӧ Господьысь. Господь шыасьӧ кар дінӧ, кывзӧй Сійӧс, карса олысьяс да веськӧдлысьяс!

¹⁰ Тіян керкаясын ӧнӧдз на эм ылӧдчӧмӧн нажӧвитӧм озырлун, пӧръясьӧмӧн муртасян доз.

¹¹ Ог ӧмӧй мыжды тіянӧс ылӧдчан вескиныд да пӧръясян гираныд вӧсна?

¹² Татчӧс карса озыръяс виалӧны-дзескӧдӧны, олысьясыс пӧръясьӧны, оз сёрнитны веськыда.

¹³ Та вӧсна Ме ёна дойдала тіянӧс, мыжъясныд вӧсна кушта карнытӧ.

¹⁴ Ті сёянныд, но онӧ пӧтӧй, кынӧмныд пыр лоӧ куш. Мый чукӧртанныд, онӧ вермӧй видзнысӧ, а мый видзанныд, тыш дырйи лоӧ бырӧдӧма.

¹⁵ Ті кӧдзанныд, но онӧ вундӧй, олив тусьтӧ пычканныд, но выйнас онӧ мавтчӧй, виноград вотӧстӧ таляланныд, но винасӧ онӧ юӧй.

¹⁶ Ті вӧчанныд Омрилӧн тшӧктӧмъяс серти, оланныд Ахав рӧд моз, ветланныд налӧн лёк туйӧд. Та вӧсна Ме кушта карнытӧ, сэні олысьясӧс серамвыв лэпта. Менам войтырӧй вӧсна ті кутанныд нуны янӧдӧмсӧ.