Матвей 19 - Коми Библия 2023

Гӧтырӧс эновтӧм йылысь

¹ Тайӧс висьталӧм бӧрын Исус петіс Галилея муысь да муніс Йӧрдан ю мӧдлапӧлӧд Иудея муӧ.

² Зэв уна йӧз вӧтчис Сы бӧрся, и Сійӧ бурдӧдаліс найӧс.

³ Исус дінӧ матыстчисны фарисейяс да Сійӧс кыйӧм могысь юалісны: «Быд помка вӧсна-ӧ морт вермас юксьыны гӧтырыскӧд?»

⁴ Исус вочавидзис: «Энӧ ӧмӧй лыддьылӧй, мый медводз Ен вӧчис аймортӧс да аньӧс?

⁵ Ен шуис: ”Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧ ӧти вир-яй”.

⁶ Сідзкӧ, найӧ абу нин кык, а ӧти вир-яй. Мый Енмыс йитӧма, морт мед оз торйӧд».

⁷ Фарисейяс шуисны: «Мыйла нӧ Мӧисей тшӧктіс гӧтыртӧ эновтігӧн сетны сылы торйӧдчан гижӧд?»

⁸ Исус вочавидзис: «Чорыд сьӧлӧмныд вӧсна Мӧисей лэдзис тіянлы эновтны гӧтыръяснытӧ. Водзынсӧ эз вӧв тадзи.

⁹ Ме шуа тіянлы: верӧсыс кӧ эновтӧ гӧтырсӧ, а гӧтырыс оз кырсав, да гӧтрасьӧ мӧдкӧд, сійӧ гозъякост олӧм пежалӧ. Юксьӧм аньӧс гӧтырӧ босьтысь тшӧтш пежалӧ».

¹⁰ Велӧдчысьясыс шуисны: «Бурджык, сідзкӧ, гӧтрасьтӧг овны».

¹¹ Исус шуис: «Оз быдӧн вермы тадзи овнысӧ, сӧмын кодлы тайӧс сетӧма.

¹² Уна помка вӧсна морт оз вермы гӧтрасьны: ӧтияс мам кынӧмсяньыс нин татшӧмӧсь, мӧдъясӧс вӧчисны татшӧмъясӧн, коймӧдъяс Енлы кесъялӧм вӧсна гӧтрасьтӧг олӧны. Верман кӧ тадзи овны, ов».

Челядьӧс бурсиӧм

¹³ Исус дінӧ вайӧдісны челядьӧс, медым Сійӧ кисӧ пуктылӧмӧн кевмысис. Велӧдчысьяс шуасисны вайӧдысьяс вылӧ.

¹⁴ Исус шуис: «Лэдзӧй челядьсӧ. Энӧ кутӧй найӧс Ме дінӧ локтӧмысь. Енэжвыв Юраланінсӧ ӧд на коддьӧмлы лӧсьӧдӧма».

¹⁵ Исус пуктыліс на вылӧ кисӧ, сэсся муніс сэтысь.

Озырлы сьӧкыд пырны Енлӧн Юраланінӧ

¹⁶ Ӧти морт локтіс Исус дінӧ да юаліс: «Бур Велӧдысьӧй, кутшӧм буртор меным колӧ вӧчны, мед менам вӧлі помтӧм олӧм?»

¹⁷ Исус вочавидзис: «Мыйла тэ шуан Менӧ бурӧн? Некод абу бурыс, сӧмын Енмыс бур. Кӧсъян кӧ пырны помтӧм олӧмӧ, ов тшӧктӧмъяс серти».

¹⁸ Мортыс юаліс: «Кутшӧм тшӧктӧмъяс серти?» Исус вочавидзис: «Эн ви, гозъякост олӧм эн пежав, эн гусясь, эн пӧръясь,

¹⁹ пыдди пукты ассьыд бать-мамтӧ, радейт матыссатӧ асьтӧ моз».

²⁰ Том морт шуис: «Ме ола тайӧ тшӧктӧмъяс сертиыс. Мый нӧшта оз тырмы?»

²¹ Исус шуис: «Кӧсъян кӧ тырвыйӧ бурӧн лоны, мун, овмӧстӧ вузав, а сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся».

²² Тайӧ кывъяссӧ кылӧм бӧрын том морт жугыля муніс, ӧд сылӧн озырлуныс вӧлі уна.

²³ Велӧдчысьясыслы Исус шуис: «Веськыда висьтала тіянлы: озырлы сьӧкыд пырны Енэжвыв Юраланінӧ.

²⁴ Нӧшта шуа: озырлы Енлӧн Юраланінӧ пырӧм дорысь верблюдлы кокньыдджык пырны ем пысӧд».

²⁵ Велӧдчысьясӧс тайӧ чуймӧдіс, и найӧ юалісны: «Коді нӧ, сідзкӧ, вермас мездмынысӧ?»

²⁶ На вылӧ видзӧдлӧмӧн Исус шуис: «Мортлы тайӧ вермытӧмтор, но Енмыслы ставыс вермана».

²⁷ Сэки Петыр шуис: «Ми ставсӧ эновтім да мунім Тэ бӧрся. Мый миянлы вичмас таысь?»

²⁸ Исус шуис: «Веськыда висьтала тіянлы: выль олӧмын Морт Пи пуксяс дзирдлуныслӧн юралан пуклӧсӧ. Тшӧтш ті, Ме бӧрся мунысьяс, пуксянныд дас кык юралан пуклӧсӧ мыждыны израильса дас кык чужанкотырӧс.

²⁹ Коді Менам ним вӧсна коляс керкасӧ, чой-воксӧ, бать-мамсӧ, гӧтырсӧ, ныв-писӧ да видз-мусӧ, сылы сё пӧвстӧн бӧр воас, нӧшта помтӧм олӧм сылы вичмас.

³⁰ Воддзаясысь унаӧн лоӧны бӧръяӧн, бӧръяясысь – воддзаӧн».