Матвей 14 - Коми Библия 2023

Пыртысь Иоанлӧн кулӧм

¹ Сійӧ кадас Ирӧд ӧксы кыліс Исус йылысь.

² Аслас кесъялысьяслы Ирӧд шуис: «Тайӧ Пыртысь Иоан, сійӧ ловзьӧма, та вӧсна вермӧ вӧчны шензьӧданаторъяс».

³ Филип вокыслӧн Ирӧдиада гӧтырыс вӧсна Ирӧд тшӧктіс босьтны Иоанӧс да дорӧмӧн пуксьӧдны дзескыдінӧ.

⁴ Ӧд Иоан ӧлӧдліс Ирӧдӧс: «Вок гӧтырыдкӧд тэныд оз позь овнытӧ».

⁵ Ирӧд кӧсйис вины Иоанӧс, но поліс йӧзсьыс, ӧд найӧ Иоанӧс пророкӧ пуктісны.

⁶ Ирӧд чужан лунӧ Ирӧдиадалӧн нылыс йӧктіс гажӧдчысьяс водзын. Тайӧ воис Ирӧдлы сьӧлӧм вылас.

⁷ Сійӧ кыв сетӧмӧн кӧсйысис нывлы: «Сета тэныд, мый коран».

⁸ Мамыс велӧдӧм серти ныв шуис: «Вай меным тасьтіын Пыртысь Иоанлысь юрсӧ».

⁹ Ӧксы шогӧ усис, но гажӧдчысьяс водзын сетӧм кывйыс вӧсна тшӧктіс вӧчны нывлӧн корӧм серти.

¹⁰ Ирӧд ыстіс ассьыс йӧзсӧ дзескыдінӧ керыштны Иоанлысь юрсӧ.

¹¹ Сэсся тасьтіын вайисны сылысь юрсӧ да сетісны нывлы, а нылыс нуис сійӧс мамыслы.

¹² Иоанлӧн велӧдчысьясыс локтісны шойысла да дзебисны сійӧс. Сэсся мунісны да юӧртісны лоӧмтор йывсьыс Исуслы.

Вит сюрсӧс вердӧм

¹³ Тайӧс кылӧм бӧрын Исус ӧтнас пыжӧн мӧдіс овтӧминӧ. Йӧзыс тӧдмалісны та йылысь да подӧн мунісны каръяссьыныс Сы бӧрся.

¹⁴ Пыжысь чеччигӧн Исус аддзис уна йӧзӧс. Сылӧн сьӧлӧмыс нормис на вӧсна, и Сійӧ бурдӧдіс висьысьясӧс.

¹⁵ Рытнас матыстчисны Исус дінӧ велӧдчысьясыс да шуисны: «Тані овтӧмин, и кадыс сёр нин. Ысты йӧзсӧ сиктъясӧ сёянтор ньӧбны».

¹⁶ Исус шуис: «Оз ков налы муннысӧ. Ті сетӧй налы сёянсӧ».

¹⁷ Велӧдчысьяс воча шуисны: «Миян сьӧраным сӧмын вит нянь да кык чери».

¹⁸ Исус шуис: «Вайӧй меным татчӧ».

¹⁹ Сійӧ тшӧктіс йӧзыслы пуксявны турун вылӧ. Ачыс босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегъяліс няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.

²⁰ Ставныс пӧттӧдзныс сёйисны, а сёян коляссӧ дас кык куд тыр чукӧртісны.

²¹ Аньясысь да челядьысь ӧтдор сёйысьыс вӧлі вит сюрс гӧгӧр.

Исус мунӧ ва вывті

²² Та бӧрын Исус тшӧктіс велӧдчысьясыслы пуксьыны пыжӧ да вуджны ты мӧдлапӧлӧ. Ачыс кольччис да мӧдӧдаліс йӧзсӧ.

²³ Йӧзӧс ыстӧм бӧрын Исус кайис керӧсӧ кевмысьны да рытсӧ сэні вӧлі ӧтнас.

²⁴ Сійӧ кадас пыжаяс вӧліны ты шӧрын, вермасисны гыяскӧд да паныда тӧвкӧд.

²⁵ Асъядорыс Исус мӧдӧдчис ва вывті велӧдчысьяс дінас.

²⁶ Кор найӧ аддзисны ва вывті восьлалысь Исусӧс, повзьӧмнысла горӧдісны: «Тайӧ орт!»

²⁷ Исус шуис: «Лӧньӧй, тайӧ Ме. Энӧ полӧй».

²⁸ Сэки Петыр шуис: «Господьӧй, тайӧ кӧ Тэ, тшӧкты меным ва вывті локны Тэ дінӧ».

²⁹ Исус шуис: «Лок». Пыжсьыс воськовтӧмӧн Петыр мӧдӧдчис ва вывті Исус дінӧ.

³⁰ Ыджыд тӧвнырысь Петырӧс полӧм босьтіс. Сійӧ пондіс вӧйны да горзыны: «Господьӧй, мезды менӧ!»

³¹ Исус дзик пыр нюжӧдіс кисӧ Петырлы, кутіс сійӧс да шуис: «Этша эскысьӧй, мыйла падъялан?»

³² Пыжӧ пуксиганыс тӧлыс лӧнис.

³³ Пыжын пукалысьяс копыртчисны Исус водзӧ да шуисны: «Тэ збыльысь Ен Пи».

³⁴ Тысӧ вуджӧм бӧрын найӧ воисны Генесарет муӧ.

³⁵ Сэтчӧс йӧзыс тӧдмалісны Исусӧс да юӧртісны та йылысь матігӧгӧрас олысьяслы. Найӧ вайӧдісны Исус дінӧ став висьысьсӧ

³⁶ да корисны Исусӧс, мед висьысьяслы лэдзас инмӧдчывны паськӧм дорышас. Инмӧдчылысьяс ставныс бурдісны.