Матвей 13 - Коми Библия 2023

Кӧдзысь йылысь велӧданвисьт

¹ Сійӧ лунӧ керкаысь петӧм бӧрын Исус лэччис ты дорӧ да пуксис.

² Сы дінӧ чукӧртчис зэв уна йӧз, Сылы весиг ковмис пуксьыны пыжӧ, а йӧзыс сулалісны вадорас.

³ Исус висьталіс налы уна велӧданвисьт: «Морт кӧдзны петас.

⁴ Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны.

⁵ Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны.

⁶ Петас шонді, пӧжны пондас, и омӧль вужъя петасыд косьмас.

⁷ Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ.

⁸ Мукӧд кӧйдысыс усяс бур муӧ да ваяс уна тусь. Ӧтияс ваясны тусьсӧ сё пӧв, мӧдъяс – квайтымын пӧв, коймӧдъяс – комын пӧв.

⁹ Кодлӧн эм пель, мед кылӧ!»

Мыйла велӧданвисьтыс колӧ?

¹⁰ Велӧдчысьяс матыстчисны Исус дінӧ да юалісны: «Мыйла Тэ сёрнитан йӧзыскӧд велӧданвисьтъясӧн?»

¹¹ Исус вочавидзис: «Тіянлы сетӧма тӧдны Енэжвыв Юралӧмлысь гусяторъяссӧ, а налы абу.

¹² Кодлӧн эм, сылы коланасьыс унджык на сетасны. Кодлӧн абу, сылысь бӧръясӧ босьтасны.

¹³ Найӧ видзӧдӧны да оз аддзыны, кывзӧны да оз кывны и оз гӧгӧрвоны. Та вӧсна сёрнита накӧд велӧданвисьтъясӧн.

¹⁴ Исай пророклӧн шуӧмыс инӧ: – Пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.

¹⁵ Чорзьӧма тайӧ войтырыслӧн сьӧлӧмныс, найӧ сьӧкыд пеляӧсь, куньса синмаӧсь. Аддзынысӧ оз зільны, кывзынысӧ оз кӧсйыны, сьӧлӧмнаныс оз гӧгӧрвоны. Мелань бергӧдчынысӧ оз кӧсйыны, медым Ме бурдӧді найӧс.

¹⁶ Ті шудаӧсь, ӧд тіян синныд аддзӧ да пельныд кылӧ.

¹⁷ Веськыда висьтала тіянлы: уна пророк да веськыда олысь кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».

Кӧдзысь йылысь висьтсӧ гӧгӧрвоӧдӧм

¹⁸ «Кывзӧй, Ме гӧгӧрвоӧда тіянлы кӧдзысь йылысь велӧданвисьтӧс.

¹⁹ Мортыс кылӧ Енлӧн Юралӧм йылысь да оз гӧгӧрво. Сы дінӧ локтӧ омӧльыс да гусялӧ сьӧлӧмас кӧдзӧмасӧ. Тайӧс петкӧдлӧ туй бокӧ усьӧм кӧйдыс.

²⁰ Изъяинӧ усьӧм кӧйдысыс петкӧдлӧ: мортыс кылӧ Енлысь кывсӧ да дзик пыр долыдпырысь босьтӧ сійӧс сьӧлӧмас,

²¹ но вужъясьтӧмысла оз дыр эскы, Ен кыв вӧсна дзескӧдігӧн-вӧтлігӧн сійӧ эновтчӧ эскӧмсьыс.

²² Лежнӧг пӧвстӧ усьӧм кӧйдысыс петкӧдлӧ: мортыс кылӧ Енлысь кывсӧ, но быдлунъя тӧждыс да озырмыны ыштӧмыс пӧдтӧ кӧдзӧм кывсӧ, и сійӧ оз вай вотӧссӧ.

²³ Бур муӧ кӧдзӧм кӧйдысыс петкӧдлӧ: мортыс кылӧ Енлысь кывсӧ, гӧгӧрвоӧ сійӧс да вайӧ вотӧс. Ӧтияс вайӧны вотӧссӧ сё пӧв, мӧдъяс – квайтымын пӧв, коймӧдъяс – комын пӧв».

Шобді да ёг турун йылысь велӧданвисьт

²⁴ Исус висьталіс мӧд велӧданвисьт: «Енэжвыв Юралӧмыс татшӧм. Морт кӧдзас аслас муӧ бур кӧйдыс.

²⁵ Войнас узигкостіыс локтас паныд сувтысь да шобді кӧйдыс костас ёг турун кӧдзас, сэсся мунас.

²⁶ Шобді петас, кутас шептасьны, ёг турун тшӧтш мыччысяс.

²⁷ Кесйӧгъяс локтасны овмӧс кутысьныс дінӧ да шуасны: ”Ыджыдӧй, эн-ӧ бур кӧйдыс тэ кӧдзлы муад? Кытысь нӧ ёг туруныс сэтчӧ петӧма?”

²⁸ Сійӧ вочавидзас: ”Паныд сувтысь тайӧс вӧчӧма”. Кесйӧгъяс шуасны: ”Кӧсъян кӧ, ёг турунсӧ ми нетшкам”.

²⁹ Мӧдыс вочавидзас: ”Оз ков. Ёг турун сорнас шобді петассӧ тшӧтш верманныд нетшыштны.

³⁰ Кольӧй, мед быдмасны ӧтлаын вундан кадӧдзыс. Сэки ме тшӧкта вундысьяслы медводз ёг турунсӧ чукӧртны, кольтаясӧ кӧртавлыны да сотны, а сэсся шобдісӧ идравны менам йӧртӧдӧ”».

Горчица тусь да няньшом йылысь велӧданвисьтъяс

³¹ Исус висьталіс налы мӧд велӧданвисьт: «Енэжвыв Юралӧмыс муӧ кӧдзӧм горчица тусь кодь.

³² Став кӧйдыссьыс сійӧ медпосни. Сійӧ быдмӧ да лоӧ пу кодь, став пуктассьыс ыджыд, весиг енэжвыв лэбачьяс поздысьӧны вожъясас».

³³ Исус висьталіс нӧшта ӧти велӧданвисьт: «Енэжвыв Юралӧмыс няньшом кодь. Ань гудралас сэтчӧ куим шомӧс тыр пызь, кад мысти няньыс ловзяс».

³⁴ Ставсӧ тайӧс Исус висьталіс йӧзыслы велӧданвисьтъясӧн. Висьтъястӧг эз сёрнитлы накӧд,

³⁵ медым иніс пророклӧн шуӧмыс: – Ме сёрнита тіянкӧд велӧданвисьтъясӧн, му пуксьӧмсяньыс дзебӧмасӧ юӧрта.

Шобді да ёг турун йылысь висьтсӧ гӧгӧрвоӧдӧм

³⁶ Йӧзӧс ыстӧм бӧрын Исус пырис керкаӧ. Сэтчӧ локтісны велӧдчысьясыс да корисны: «Гӧгӧрвоӧд миянлы ёг турун йылысь висьттӧ».

³⁷ Исус висьталіс: «Бур кӧйдыссӧ кӧдзысьыс – Морт Пи.

³⁸ Кӧдза муыс – муюгыдыс. Бур кӧйдысыс – Енлӧн йӧзыс, ёг туруныс – омӧльлӧн йӧзыс.

³⁹ Паныд сувтысьыс, ёг турунсӧ кӧдзысьыс, – омӧль. Вундан кадыс – нэм пом, вундысьясыс – анделъяс.

⁴⁰ Кыдзи чукӧртӧм ёг турунсӧ сотӧны, тадзи лоӧ нэм помасигӧн.

⁴¹ Морт Пи Ассьыс анделъяссӧ мӧдӧдас чукӧртны Аслас Юраланінысь став ыштӧдысьсӧ да лёк вӧчысьсӧ.

⁴² Сэсся шыбитасны найӧс биӧ. Сэні лоӧ бӧрдӧм да пинь йирӧм.

⁴³ Веськыда олысьяс сэки Батьныслӧн Юраланінын шонді моз кутасны югъявны. Кодлӧн эм пель, мед кылӧ!»

Дзебӧм озырлун да дона из йылысь велӧданвисьтъяс

⁴⁴ «Енэжвыв Юралӧмыс муӧ дзебӧм озырлун кодь. Морт аддзас муысь озырлун да бӧр гуалас сійӧс. Нимкодьысла сійӧ мунас, вузалас ассьыс став овмӧссӧ да ньӧбас тайӧ мусӧ.

⁴⁵ Енэжвыв Юралӧмыс татшӧм. Дона изъясӧн вузасьысь мунас корсьны мича изъяс

⁴⁶ да аддзас донасьыс-дона из. Сійӧ мунас, вузалас ассьыс став овмӧссӧ да ньӧбас тайӧ изсӧ».

Тыв йылысь велӧданвисьт

⁴⁷ «Енэжвыв Юралӧмыс саридзӧ вӧйталӧм тыв кодь. Быдсяма чериыс сэтчӧ шедас.

⁴⁸ Тывсӧ вадорӧ лэптӧм бӧрын чери кыйысьяс бур черисӧ дозйӧ чукӧртасны, лёксӧ шыблаласны.

⁴⁹ Тадзи лоӧ нэм помасигӧн: анделъяс локтасны, торйӧдасны лёк йӧзӧс веськыда олысьясысь

⁵⁰ да биӧ шыбитасны. Сэні лоӧ бӧрдӧм да пинь йирӧм».

⁵¹ Исус юаліс: «Ставсӧ-ӧ гӧгӧрвоинныд?» Велӧдчысьяс вочавидзисны: «Гӧгӧрвоим, Господьӧй».

⁵² Исус шуис налы: «Индӧдӧ велӧдысь, коді тӧдӧ Енэжвыв Юралӧмсӧ, керка кутысь кодь, коді аслас видзанінысь выльсӧ и важсӧ петкӧдӧ».

Исусӧс ӧтдортӧм

⁵³ Тайӧ велӧданвисьтъяссӧ висьталӧм бӧрын Исус муніс сэтысь

⁵⁴ Аслас карӧ. Сэні велӧдіс йӧзсӧ синагогаын. Кывзысьяс шензьӧмӧн шуалісны: «Кытысь Сылӧн татшӧм мывкыдлуныс да татшӧм выныс?

⁵⁵ Сійӧ ӧд тшупсьысьлӧн пи! Мамыс – Мария, а вокъясыс – Яков, Иосей, Симон да Иуда.

⁵⁶ Оз-ӧ тані овны Сылӧн чойясыс? Кытысь Сылӧн татшӧм мывкыдлуныс?»

⁵⁷ Тадзи Сійӧс ӧтдортісны. Исус шуис налы: «Пророкӧс пыдди пуктӧны быдлаын, сӧмын ас карас да ас гортас оз».

⁵⁸ Йӧзыслӧн эскытӧм вӧсна Исус эз вӧч сэні уна шензьӧданатор.