Матвей 11 - Коми Библия 2023

Пыртысь Иоанлӧн юалӧм

¹ Дас кыкнан велӧдчысьсӧ велӧдӧм-туйдӧдӧм бӧрын Исус муніс юӧртны да велӧдны мукӧд каръясӧ.

² Дзескыдінын пукалігас Иоан кывліс Кристослӧн уджъяс йылысь. Сійӧ мӧдӧдіс ассьыс кык велӧдчысьсӧ

³ юавны Исуслысь, збыльысь-ӧ Исус сійӧ, кодлы колӧ локнысӧ, али налы мӧдӧс виччысьны.

⁴ Исус вочавидзис: «Мунӧй, висьталӧй Иоанлы, мый кыланныд да аддзанныд:

⁵ – Синтӧмъяс аддзӧны, коктӧмъяс ветлӧны, проказаысь сӧстӧммӧны, пельтӧмъяс кылӧны, кулӧмаяс ловзьӧны, коньӧръяслы Бур Юӧр висьталӧны.

⁶ Шуда сійӧ, коді оз ӧтдортчы Меысь».

Исус висьталӧ Иоан йылысь

⁷ Кор Иоанлӧн велӧдчысьясыс мунісны, Исус пондіс висьтавны йӧзыслы Иоан йылысь: «Мый видзӧдны ветлінныд овтӧминас? Тӧлӧн вӧрӧдан идзас-ӧ?

⁸ Мый видзӧдны ветлінныд? Мича да озыр паськӧма мортӧс-ӧ? Татшӧм паськӧма йӧзыс олӧны ӧксы оланінъясын.

⁹ Кодӧс видзӧдны ветлінныд? Пророкӧс-ӧ? Шуа тіянлы: ті аддзылінныд пророкысь ыджыдӧс.

¹⁰ Сы йылысь гижӧма: – Ыста Ассьым юӧртысьӧс Тэ водзвылын, сійӧ Тэныд туй дасьтас.

¹¹ Веськыда висьтала тіянлы: му вылын чужысьясысь эз вӧвлы Пыртысь Иоанысь ыджыдджыкыс, но Енэжвыв Юраланінын медічӧтыс сы дорысь ыджыдджык.

¹² Пыртысь Иоан лунъяссянь да ӧнӧдз Енэжвыв Юралӧмсӧ дзескӧдӧны, и паныд сувтысьяс зільӧны мырддьыны сійӧс.

¹³ Став пророкыс да Индӧдыс Иоанӧдз на юӧртлісны Енлӧн Юралӧм йылысь.

¹⁴ Кӧсъянныд кӧ тӧдны, сійӧ буретш Илля, кодлы колӧ вӧлі локны.

¹⁵ Кодлӧн эм пель, мед кылӧ!

¹⁶ Кодкӧд Ме ӧткодяла ӧнія олысьясӧс? Найӧ изэрд вылын пукалысь челядь кодьӧсь, кодъяс ёртъясыслы

¹⁷ шуалӧны: ”Ми ворсім тіянлы пӧлянӧн, а ті энӧ йӧктӧй. Ми сьылім тіянлы бӧрдӧдчанкывъяс, а ті энӧ бӧрдӧй”.

¹⁸ Иоан локтіс, оз сёй, вина оз ю, и шуӧны, сы пытшкын пӧ пеж лов.

¹⁹ Морт Пи локтіс, сёйӧ-юӧ, Сы йылысь шуӧны, рушку тыртысь да вина юысь пӧ, вот перйысьяскӧд да мыжаяскӧд ёртасьысь пӧ. Мывкыдлунсӧ пыдди пуктӧны мывкыдлуныслӧн челядь».

Эскытӧмъясӧс мыжалӧм

²⁰ Сэсся Исус пондіс мыжавны каръяс сыысь, мый сэтчӧс йӧзыс эз бергӧдчыны мыжъяссьыныс, ӧд тайӧ каръясас Исус вӧчис медуна шензьӧданатор.

²¹ «Курыд шог тэныд, Коразин кар! Курыд шог тэныд, Випсаида кар! Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн коялісны.

²² Висьтала тіянлы: мыждан лунӧ Тир да Сидон каръяслы лоас кокньыдджык тіянлы дорысь.

²³ Тэ, Капернаум кар, чайтан енэжӧдз кыпӧдчыны? Ад пыдӧсӧдз усян! Содом карын кӧ аддзылісны тіянын кодь вӧчӧм шензьӧданаторъяссӧ, сійӧ эськӧ ӧні на сулаліс.

²⁴ Висьтала тіянлы: мыждан лунӧ Содом мулы лоас кокньыдджык тэныд дорысь».

Локтӧй Ме дінӧ

²⁵ Сэки Исус шуис: «Ошка Тэнӧ, Батьӧй, енэжыс да муыс вылын Ыджыдалысьӧс! Тэ дзебин тайӧс сюсь вежӧраясысь да восьтін кага коддьӧмлы.

²⁶ Татшӧм вӧлі Тэнад бур кӧсйӧмыд, Батьӧй.

²⁷ Ставсӧ сетіс Меным Батьӧй. Сӧмын Батьыс тӧдӧ Писӧ, и сӧмын Пиыс тӧдӧ Батьсӧ. Тӧдӧ нӧшта сійӧ, кодлы Пиыс кӧсйӧ восьтны Батьсӧ.

²⁸ Локтӧй Ме дінӧ мудзӧмаяс да сьӧкыда мырсьысьяс, Ме тіянӧс шойччӧда.

²⁹ Пуктӧй Менсьым сийӧсӧс ас выланыд да велӧдчӧй Месянь, ӧд Ме рам да небыд сьӧлӧма. Сэки тіян ловлы сюрас шойччӧг.

³⁰ Ӧд Менам сийӧсӧй оз личкы, да Менам нӧбйӧй оз сьӧктӧд».