Марк 9 - Коми Библия 2023

¹ Исус шуис налы: «Веськыда висьтала тіянлы: кодсюрӧ тані сулалысьяс пиысь кувтӧдзныс на аддзасны Ен Юралӧмлысь вына локтӧмсӧ».

Исус петкӧдчӧ Аслас дзирдлунӧн

² Квайт лун мысти Исус босьтіс Аскӧдыс Петырӧс, Яковӧс, Иоанӧс да кайис накӧд джуджыд керӧсӧ. Велӧдчысьяс син водзын Исуслӧн мыгӧрыс вежсис,

³ паськӧмыс лои лым кодь дзирдалана еджыд. Татшӧм еджыд дӧрасӧ му вылын он аддзы.

⁴ Велӧдчысьяс аддзисны Илляӧс да Мӧисейӧс, найӧ сёрнитісны Исускӧд.

⁵ Петыр шуис Исуслы: «Велӧдысьӧй, миянлы тані лӧсьыд, сувтӧдам куим чом: Тэныд, Мӧисейлы да Иллялы».

⁶ Петыр ачыс эз гӧгӧрво, мый висьталіс, ӧд ставныс найӧ вӧлі ёна повзьӧмаӧсь.

⁷ Сэки локтіс кымӧр да вевттис найӧс, кымӧрсянь кыліс гӧлӧс шы: «Тайӧ Менам муса Пиӧй, Сійӧс кывзӧй».

⁸ Велӧдчысьяс видзӧдлісны гӧгӧрбок да аддзисны, мый накӧд сӧмын Исус.

⁹ Керӧсысь лэччиганыс Исус ӧлӧдіс велӧдчысьяссӧ, мед эз висьтавны аддзывлӧм йывсьыс, кытчӧдз Морт Пи оз ловзьы кулӧмысь.

¹⁰ Найӧ тӧд выланыс босьтісны тайӧ кывъяссӧ да ӧта-мӧдныслысь юасисны, кыдзи гӧгӧрвоны кулӧмысь ловзьӧмсӧ.

¹¹ Велӧдчысьяс юалісны Исуслысь: «Мыйла Индӧдӧ велӧдысьяс шуӧны, Иллялы пӧ колӧ водзджык локны?»

¹² Сійӧ вочавидзис: «Дерт, Иллялы колӧ водзджык локны да ставсӧ лӧсьӧдны. А Морт Пи йылысь гижӧма, мый уна сьӧкыд Сылы ковмас нуны да лоны увтыртӧмаӧн.

¹³ Висьтала тіянлы: Илля локтіс нин. Сыкӧд вӧчисны, мый кӧсйисны. Тадзи вӧлі водзвыв гижӧма сы йылысь».

Зонка пытшкысь пеж лолӧс вӧтлӧм

¹⁴ Исус локтіс велӧдчысьяс дінӧ да аддзис, мый на гӧгӧр уна йӧз, мый велӧдчысьясыскӧд вензьӧны Индӧдӧ велӧдысьяс.

¹⁵ Исусӧс аддзӧм бӧрын став йӧзыс чуймисны да котӧрӧн уськӧдчисны чолӧмасьны Сыкӧд.

¹⁶ Исус юаліс Индӧдӧ велӧдысьяслысь: «Мый йылысь вензянныд?»

¹⁷ Йӧз пӧвстысь ӧти шуис: «Велӧдысьӧй, ме вайӧді Тэ дінӧ ассьым пиӧс. Сійӧ оз сёрнит, сы пытшкын пеж лов.

¹⁸ Кор пеж лов топӧдӧ сійӧс, шыбитӧ муас. Сэки пиӧй пиньсӧ йирӧ, сійӧс йӧрсӧналӧ, да вомсьыс быг петӧ. Ме кори Тэнсьыд велӧдчысьястӧ вӧтлыны пеж ловсӧ, но найӧ эз вермыны».

¹⁹ Исус шуис: «Эскытӧмъяс! Дыр-ӧ на Меным овнысӧ тіянкӧд? Дыр-ӧ на Меным видзӧдны тіянӧс? Вайӧдӧй Ме дінӧ зонкасӧ».

²⁰ Сійӧс вайӧдісны Исус дінӧ. Исусӧс аддзӧм бӧрын пеж лов дзик пыр кутіс песлӧдлыны зонкасӧ. Сійӧ усис муас, пондіс туплясьны, вомсьыс кутіс быг петны.

²¹ Исус юаліс зонка батьлысь: «Важысянь-ӧ тайӧ пиыдлӧн?» Сійӧ вочавидзис: «Кагадырсяньыс.

²² Унаысь сійӧс пеж лов биӧ-ваӧ шыбитліс, мед вины. Верман кӧ, отсав миянлы, ло бур сьӧлӧма».

²³ Исус шуис сылы: «Эскан кӧ, эскысьлы ставыс вермана».

²⁴ Зонкалӧн батьыс дзик пыр синва сорӧн горӧдіс: «Эска, Господьӧй! Отсав меным эскыны!»

²⁵ Исус аддзис, мый йӧзыс котӧрӧн чукӧртчӧны. Сэки ӧлӧдӧмӧн шуис пеж ловлы: «Кыв-вор кутысь, пельяс тупкысь пеж лов, тшӧкта тэныд: пет зонка пытшкысь да бӧрсӧ эн лысьт пырны сы пытшкӧ».

²⁶ Пеж лов горӧдіс, песовтіс зонкасӧ да петіс сы пытшкысь. Зонка куйліс шой кодь, унаӧн весиг шуисны, мый сійӧ куліс.

²⁷ Исус босьтіс зонкаӧс киӧдыс, и сійӧ чеччис.

²⁸ Керкаӧ пырӧм бӧрын велӧдчысьяс ас кежаныс юалісны Исуслысь: «Мыйла ми эгӧ вермӧй вӧтлыны пеж ловсӧ?»

²⁹ Исус шуис налы: «Кевмысьтӧг да видзавтӧг татшӧм пеж ловъяссӧ вӧтлыны онӧ вермӧй».

³⁰ Сэтысь петӧм бӧрын найӧ мунісны Галилея пыр. Исус эз кӧсйы, медым кодкӧ тӧдліс та йылысь.

³¹ Сэні Сійӧ велӧдіс Ассьыс велӧдчысьяссӧ. Сійӧ шуис налы: «Морт Пиӧс сетасны йӧзлӧн киӧ. Сійӧс виасны, но коймӧд луннас Сійӧ ловзяс».

³² Велӧдчысьяс эз гӧгӧрвоны, мый йылысь Исус висьталӧ, а юавнысӧ полісны.

Коді ыджыдджык?

³³ Исус воис Капернаумӧ. Гортас пырӧм мысти Сійӧ юаліс велӧдчысьясыслысь: «Мый йылысь ті сёрнитінныд локтігмозныд?»

³⁴ Найӧ чӧв олісны. Локтіганыс найӧ вензисны, коді на пиысь ыджыдджыкыс.

³⁵ Исус пуксис, корис дас кыкнансӧ да шуис налы: «Коді кӧсйӧ лоны медводдзаӧн, мед лоас став пиас медбӧръяӧн да быдӧнлы кесъялысьӧн».

³⁶ Сійӧ босьтіс кагаӧс, сувтӧдіс на шӧрӧ да сійӧс кутыштлӧмӧн шуис:

³⁷ «Коді Менам ним вӧсна сибӧдӧ ӧти татшӧм кагаӧс, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс, оз сӧмын Менӧ».

Коді абу тіянлы паныд, сійӧ тіян дор

³⁸ Иоан шуис: «Велӧдысьӧй, ми аддзылім мортӧс, сійӧ Тэнад нимӧн пеж ловъясӧс вӧтлалӧ. Ми ӧлӧдім сійӧс, ӧд сійӧ абу миян пӧвстысь».

³⁹ Исус шуис: «Энӧ ӧлӧдӧй сійӧс. Менам нимӧн кӧ шензьӧданаторсӧ вӧчӧ, сійӧ оз вермы пырысьтӧм-пыр омӧльтны Менӧ.

⁴⁰ Коді абу тіянлы паныд, сійӧ тіян дор.

⁴¹ Веськыда висьтала тіянлы: коді юкталас тіянӧс ваӧн, сы вӧсна мый ті Кристослӧн, сійӧ оз коль удждонтӧг».

Ыштӧдӧмъяс

⁴² «Коді ыштӧдас тайӧ ичӧтъясысь ӧтикӧс, Меным эскысьӧс, сылы бурджык лоӧ, сьыліас кӧ ыджыд изки ӧшӧдасны да шыбитасны саридзӧ.

⁴³ Киыд кӧ ыштӧдӧ тэнӧ, керышт сійӧс. Бурджык пырны помтӧм олӧмӧ ки пӧлаӧн адӧ, куслытӧм биӧ, киаӧн веськалӧм дорысь.

⁴⁴ Сэні ”номырыс оз кувлы да биыс оз куслы”.

⁴⁵ Кокыд кӧ ыштӧдӧ тэнӧ, керышт сійӧс. Бурджык пырны помтӧм олӧмӧ кок пӧлаӧн адӧ, куслытӧм биӧ, тэнӧ кокаӧн шыбитӧм дорысь.

⁴⁶ Сэні ”номырыс оз кувлы да биыс оз куслы”.

⁴⁷ Синмыд кӧ ыштӧдӧ тэнӧ, шыбит сійӧс. Бурджык пырны Енлӧн Юраланінӧ син пӧлаӧн ад биӧ тэнӧ синмаӧн шыбитӧм дорысь.

⁴⁸ Сэні ”номырыс оз кувлы да биыс оз куслы”.

⁴⁹ Быдӧнӧс сӧстӧммӧдасны биӧн да солаласны висьӧс моз.

⁵⁰ Солыд – буртор. Но солыс кӧ лоас дуб, кыдзи сійӧс бӧр соланас вӧчан? Тіян пытшкын мед пыр лоӧ солыс, лӧня олӧй ас костаныд».