Марк 8 - Коми Библия 2023

Нёль сюрс мортӧс вердӧм

¹ Сійӧ лунъясӧ бара чукӧртчис зэв уна йӧз. Налӧн эз вӧв аскӧдныс сёяныс. Исус корис велӧдчысьяссӧ да шуис:

² «Менам сьӧлӧмӧй висьӧ тайӧ йӧзыс вӧсна. Найӧ куим лун нин танӧсь, а налӧн сёяныс абу.

³ Сёйтӧгыс кӧ мӧдӧда найӧс гортаныс, туяс дзикӧдз эбӧстӧммасны. Кодсюрӧ ӧд ылісянь локтісны».

⁴ Велӧдчысьяс шуисны: «Кытысь босьтны овтӧминас няньсӧ, медым вердны найӧс?»

⁵ Исус юаліс: «Уна-ӧ тіян няньныд?» Найӧ вочавидзисны: «Сизим».

⁶ Исус тшӧктіс йӧзыслы пуксявны муас. Ачыс босьтіс сизим няньсӧ, Енмӧс аттьӧалӧмӧн чегъяліс няньсӧ да сетіс велӧдчысьясыслы, а велӧдчысьяс – йӧзыслы.

⁷ Налӧн вӧлі нӧшта кымынкӧ посни чери. Бурсиӧм бӧрын Исус тшӧктіс сетавны черисӧ.

⁸ Ставӧн пӧттӧдзныс сёйисны, коляссӧ сизим куд тыр на чукӧртісны.

⁹ Сёйысьыс вӧлі нёль сюрс гӧгӧр морт. Йӧзсӧ мӧдӧдалӧм бӧрын

¹⁰ Исус велӧдчысьясыскӧд дзик пыр пуксис пыжӧ да кывтіс Далманута муӧ.

Индысьпас корӧм

¹¹ Локтісны фарисейяс да пондісны вензьыны Исускӧд. Сійӧс кыйӧм могысь корисны петкӧдлыны енэжсянь индысьпас.

¹² Исус сьӧкыда ышловзис да шуис: «Мыйла ӧнія олысьяслы колӧ индысьпасыс? Веськыда висьтала тіянлы: оз ло налы индысьпасыс».

¹³ Сэсся Исус колис найӧс, бӧр пуксис пыжӧ да вуджис мӧдлапӧлӧ.

Видзчысьӧй фарисейяслӧн велӧдӧмысь

¹⁴ Велӧдчысьяс вунӧдісны босьтны аскӧдныс няньсӧ, а пыжас вӧлі сӧмын ӧти няньтор.

¹⁵ Исус шуис налы: «Видзчысьӧй фарисей да Ирӧд няньшомысь».

¹⁶ Велӧдчысьяс ас костаныс сёрнитісны: «Няньыс ӧд миян абу».

¹⁷ Тайӧс казялӧмӧн Исус шуис налы: «Мый нӧ сёрнитанныд нянь абутӧм йывсьыд? Онӧ ӧмӧй вежӧртӧй? Измӧма ӧмӧй сьӧлӧмныд?

¹⁸ Синмаӧсь да, онӧ аддзӧй? Пеляӧсь да, онӧ кылӧй? Вунӧдінныд ӧмӧй

¹⁹ вит сюрс мортӧс вит няньӧн вердӧм йылысь? Кымын куд тыр сэки коляссӧ чукӧртінныд?» Шуисны: «Дас кыкӧс».

²⁰ «А нёль сюрс мортӧс сизим няньӧн вердігӧн, кымын куд тыр коляссӧ чукӧртінныд?» Шуисны Сылы: «Сизимӧс».

²¹ Исус шуис налы: «Ті век на онӧ вежӧртӧй?»

Синтӧм аддзӧ

²² Исус воис Випсаидаӧ. Сы дінӧ вайӧдісны синтӧмӧс да корисны инмӧдчывны сы дінӧ.

²³ Исус босьтіс синтӧмӧс киӧдыс да петкӧдіс сиктсьыс. Синмас сьӧлыштӧм бӧрын пуктіс кисӧ сы вылӧ да юаліс: «Аддзан-ӧ мыйкӧ?»

²⁴ Синтӧм видзӧдліс да шуис: «Аддза ветлӧдлысь йӧзӧс, найӧ пуяс кодьӧсь».

²⁵ Исус бара пуктыліс кисӧ сылы синмас да тшӧктіс видзӧдлыны. Синтӧм бурдіс да ставсӧ аддзис ясыда.

²⁶ Исус мӧдӧдіс сійӧс гортас да шуис: «Сиктас эн пыр».

Петыр шуӧ Исусӧс Кристосӧн

²⁷ Исус муніс велӧдчысьясыскӧд Филип Кесария сиктъясӧ. Муніганыс юаліс налысь: «Код туйӧ йӧзыс пуктӧны Менӧ?»

²⁸ Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, пророкъясысь пӧ ӧти».

²⁹ Исус юаліс: «Код туйӧ ті Менӧ пуктанныд?» Петыр вочавидзис: «Тэ – Кристос».

³⁰ Исус ӧлӧдіс найӧс, мед эз висьтавны Сы йылысь мукӧдлы.

Исус висьталӧ Аслас кулӧм йылысь

³¹ Исус пондіс висьтавны велӧдчысьясыслы: «Морт Пилы уна сьӧкыд ковмас нуны. Юрнуӧдысьяс, аркирейяс да Индӧдӧ велӧдысьяс ӧтдортасны Сійӧс. Сійӧс виасны, но коймӧд луннас Сійӧ ловзяс».

³² Та йылысь Исус сёрнитіс восьсӧн. Сійӧс бокӧ корӧмӧн Петыр паныд шуасьны пондіс.

³³ Велӧдчысьяслань бергӧдчӧмӧн Исус чорыда вомаліс Петырӧс: «Вешйы Ме дінысь, сӧтана! Тэнад мӧвпъясыд мортсянь, абу Енсянь».

Исус бӧрся мунӧм

³⁴ Исус чукӧстіс йӧзсӧ да велӧдчысьяссӧ да шуис налы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.

³⁵ Коді кӧсйӧ видзны ассьыс олӧмсӧ, воштас сійӧс. Ме вӧсна да Евангелльӧ вӧсна олӧмсӧ воштысь видзас сійӧс.

³⁶ Лоас-ӧ мортыслы бур, босьтас кӧ аслыс став муюгыдсӧ, а олӧмсӧ воштас?

³⁷ Вермас-ӧ бӧр ньӧбны ассьыс олӧмсӧ?

³⁸ Коді яндысяс Меысь да Менам кывъясысь тайӧ мыжа да пежас ылалӧм йӧз водзын, сыысь яндысяс Морт Пи, кор локтас вежа анделъяскӧд Батьыслӧн дзирдлунӧн».