Марк 6 - Коми Библия 2023

Исусӧс ӧтдортӧм

¹ Исус муніс сэтысь Аслас карӧ, Сылӧн велӧдчысьясыс мунісны Сы бӧрся.

² Шойччан лунӧ Сійӧ велӧдіс синагогаын. Кывзысьяс пиысь унаӧн шензьӧмӧн шуалісны: «Кытысь Сылӧн татшӧм сюсьлуныс? Мыйсяма мывкыдлун Сылы сетӧма? Сійӧ вӧчӧ татшӧм шензьӧданаторъяс!

³ Сійӧ ӧд тшупсьысь! Абу-ӧ Сійӧ Мариялӧн пиыс, абу-ӧ Яковлӧн, Иосейлӧн, Иудалӧн да Симонлӧн вокыс? Оз-ӧ тані овны Сылӧн чойясыс?» Тадзи Сійӧс ӧтдортісны.

⁴ Исус шуис налы: «Пророкӧс пыдди пуктӧны быдлаын, сӧмын ас карас, ас рӧдвуж пӧвстас да ас гортас оз».

⁵ Исус эз вермы сэні вӧчны шензьӧданаторъяс, сӧмын кымынкӧ висьысь вылӧ кисӧ пуктылӧмӧн бурдӧдіс найӧс.

⁶ Йӧзлӧн эскытӧмлуныс шензьӧдіс Сійӧс. Исус ветлӧдліс матігӧгӧр сиктъясӧд да велӧдіс йӧзсӧ.

Велӧдчысьясӧс мӧдӧдӧм

⁷ Сійӧ корис дас кыкнан велӧдчысьсӧ да сетіс налы вын вӧтлавны пеж ловъясӧс. Сэсся кыкӧн-кыкӧн мӧдӧдаліс найӧс.

⁸ Исус шуис налы: «Туяныд бедь кындзи нинӧм энӧ босьтӧй, весиг нянь, ноп, сьӧм

⁹ да вежан кӧм-пась».

¹⁰ Нӧшта Исус висьталіс: «Кутшӧм керкаӧ пыранныд, водзӧ мунтӧдзныд олӧй сэні.

¹¹ Оз кӧ сибӧдны-кывзыны тіянӧс, сэтысь петіганыд пыркӧдӧй коксьыныд буссӧ. Тайӧ лоӧ найӧс ӧлӧдӧм. Веськыда висьтала тіянлы: мыждан лунӧ Содом да Гомора каръяслы лоас кокньыдджык сійӧ карыслы дорысь».

¹² Велӧдчысьяс мунісны да юӧртісны йӧзыслы, мед бергӧдчасны мыжъяссьыныс.

¹³ Найӧ вӧтлісны уна пеж лолӧс да выйӧн мавтыштӧмӧн бурдӧдісны уна висьысьӧс.

Пыртысь Иоанлӧн кулӧм

¹⁴ Ирӧд ӧксы кыліс Исус йылысь. Исуслӧн нимыс паськыда кывсис. Ирӧд шуис, Пыртысь Иоан пӧ ловзьӧма, та вӧсна вермӧ вӧчны шензьӧданаторъяс.

¹⁵ Мукӧдыс шуалісны, тайӧ пӧ Илля, кодсюрӧ шуисны, Сійӧ пӧ пророкъясысь ӧти.

¹⁶ Татшӧм сёрнияс бӧрын Ирӧд шуис: «Тайӧ – Иоан, кодлысь юрсӧ ме керышті, сійӧ ловзьӧма».

¹⁷ Филип вокыслӧн Ирӧдиада гӧтырыс вӧсна Ирӧд тшӧктіс босьтны Иоанӧс да дорӧмӧн пуксьӧдны дзескыдінӧ. Ирӧдиадаӧс гӧтырӧ босьтӧмысь

¹⁸ Иоан ӧлӧдліс Ирӧдӧс: «Вок гӧтырыдкӧд тэныд оз позь овнытӧ».

¹⁹ Ирӧдиада скӧраліс Иоан вылӧ да кӧсйис вины сійӧс, но эз вермы.

²⁰ Ирӧд поліс Иоанысь, ӧд тӧдіс, мый Иоан веськыда олысь да вежа морт. Ирӧд дорйис Иоанӧс, унатор вӧчис сылысь кывзысьӧмӧн да окотапырысь кывзіс сійӧс.

²¹ Ирӧд чужан лунӧ Ирӧдиадалы лоис позянлун вины Иоанӧс. Ирӧд котыртіс гаж юралысьяслы, тышкайӧзӧн веськӧдлысьяслы да галилеяса пыдди пуктана йӧзлы.

²² Ирӧдиадалӧн нылыс пырис да йӧктіс гажӧдчысьяс водзын. Тайӧ воис Ирӧдлы да сыкӧд пукалысьяслы сьӧлӧм вылас. Ӧксы шуис нывлы: «Кор менсьым, мый кӧсъян, и ме сета тэныд».

²³ Ирӧд кыв сетіс: «Сета, мый сӧмын коран. Аслам веськӧдлан мулысь джынсӧ весиг сета».

²⁴ Ныв петіс да юаліс мамыслысь: «Мый эськӧ корны?» Мамыс шуис: «Пыртысь Иоанлысь юрсӧ».

²⁵ Ныв дзик пыр тэрмасьӧмӧн муніс ӧксы дінӧ да шуис: «Кӧсъя, мед дзик ӧні сетін меным тасьтіын Пыртысь Иоанлысь юрсӧ».

²⁶ Ӧксы шогӧ усис, но гажӧдчысьяс водзын сетӧм кывйысь эз вермы соссьыны.

²⁷ Дзик пыр сійӧ ыстіс шыпуртаӧс да тшӧктіс вайны Иоанлысь юрсӧ.

²⁸ Шыпурта муніс дзескыдінӧ да керыштіс Иоанлысь юрсӧ. Сэсся тасьтіын вайис сылысь юрсӧ да сетіс нывлы, а нылыс – мамыслы.

²⁹ Та йылысь кывлісны Иоанлӧн велӧдчысьясыс. Найӧ локтісны шойысла да нуисны дзебанінӧ.

Вит сюрсӧс вердӧм

³⁰ Апостолъяс чукӧртчисны Исус дінӧ. Найӧ висьталісны Сылы ставсӧ, мый вӧчисны да мыйӧ велӧдісны.

³¹ Исус шуис налы: «Мунӧй овтӧминӧ да шойччыштӧй сэні». Йӧзыс век ӧтарӧ локтісны-мунісны, велӧдчысьяслы весиг некор вӧлі сёйыштнысӧ.

³² Та вӧсна найӧ ӧтнаныс мӧдӧдчисны пыжӧн овтӧминӧ.

³³ Йӧзыс аддзылісны налысь мунӧмсӧ да тӧдісны найӧс. Котӧрӧн петісны каръяссьыныс да воисны сэтчӧ на дорысь водзджык.

³⁴ Пыжысь чеччигӧн Исус аддзис уна йӧзӧс. Сылӧн сьӧлӧмыс нормис, ӧд найӧ вӧліны видзысьтӧг кольӧм ыжъяс кодьӧсь. Сэки Исус пондіс велӧдны найӧс, Сійӧ унатор йылысь висьталіс налы.

³⁵ Сёр рытнас матыстчисны Исус дінӧ велӧдчысьясыс да шуисны: «Тані овтӧмин, и кадыс сёр нин.

³⁶ Ысты йӧзсӧ матігӧгӧр сикт-грездӧ сёянтор ньӧбны».

³⁷ Исус воча шуис: «Ті сетӧй налы сёянсӧ». Велӧдчысьяс шуисны: «Ми ӧмӧй ветлам няньсӧ ньӧбны? Та мындасӧ мед вердны, кыксё динар ковмас».

³⁸ Исус юаліс налысь: «Уна-ӧ тіян няньныд? Мунӧй видзӧдлӧй». Тӧдмалӧм бӧрын найӧ висьталісны: «Вит нянь да кык чери».

³⁹ Исус тшӧктіс велӧдчысьясыслы пуксьӧдавны йӧзсӧ чукӧръясӧ веж турун вылӧ.

⁴⁰ Йӧзыс пуксялісны сёӧн да ветымынӧн.

⁴¹ Исус босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегъяліс няньсӧ, сэсся сетіс велӧдчысьясыслы. Велӧдчысьяс разӧдісны няньсӧ йӧзыслы. Кык черисӧ тшӧтш юкис ставныслы.

⁴² Ставныс пӧттӧдзныс сёйисны,

⁴³ а нянь да чери коляссӧ дас кык куд тыр чукӧртісны.

⁴⁴ Сёйысьыс вӧлі вит сюрс гӧгӧр морт.

Исус мунӧ ва вывті

⁴⁵ Та бӧрын Исус тшӧктіс велӧдчысьясыслы пуксьыны пыжӧ да вуджны мӧдлапӧлӧ, Випсаидаӧ. Ачыс кольччис да мӧдӧдаліс йӧзсӧ.

⁴⁶ Йӧзӧс ыстӧм бӧрын Исус кайис керӧсӧ кевмысьны.

⁴⁷ Рытнас пыжаяс вӧліны ты шӧрын, а Исус ӧтнас сулаліс вадорын.

⁴⁸ Сійӧ аддзис, кыдзи велӧдчысьясыс сьӧкыда сынісны тӧв паныд. Асъядорыс Исус мӧдӧдчис ва вывті велӧдчысьяс дінас да кӧсйис ордйыны найӧс.

⁴⁹ Кор велӧдчысьяс аддзисны ва вывті восьлалысь Исусӧс, чайтісны, мый тайӧ орт, и кутісны горзыны.

⁵⁰ Ставныс ёна повзисны. Исус дзик пыр шыасис на дінӧ: «Лӧньӧй, тайӧ Ме. Энӧ полӧй».

⁵¹ Сійӧ пуксис на дінӧ пыжас. Тӧлыс лӧнис. Велӧдчысьяс ёна шензисны.

⁵² Няньӧн вердӧм шензьӧданаторйыс, буракӧ, нинӧм эз висьтав налӧн измӧм сьӧлӧмлы.

⁵³ Тысӧ вуджӧм бӧрын найӧ сувтісны Генесарет муӧ.

⁵⁴ Кор найӧ чеччисны пыжсьыс, йӧзыс дзик пыр тӧдмалісны Исусӧс.

⁵⁵ Тайӧ юӧрнас найӧ котӧрӧн кытшовтісны став матігӧгӧрсӧ. Кӧні кывсис Исус, сэтчӧ пондісны вольпасьӧн вайны висьысьясӧс.

⁵⁶ Быдлаын, кытчӧ воліс Исус – сиктӧ, карӧ, грездӧ – эрдъяс вылӧ водтӧдавлісны висьысьясӧс да корисны Исусӧс, мед висьысьяслы лэдзас инмӧдчывны паськӧм дорышас. Сы дінӧ инмӧдчылысьяс ставныс бурдісны.