Марк 4 - Коми Библия 2023

Кӧдзысь йылысь велӧданвисьт

¹ Исус бара велӧдіс ты дорын. Сы дінӧ чукӧртчис зэв уна йӧз, Сылы весиг ковмис пуксьыны пыжӧ. Пыжыс сулаліс ва вылын, а йӧзыс – вадорас.

² Исус висьталіс налы уна велӧданвисьт:

³ «Кывзӧй. Морт кӧдзны петас.

⁴ Кӧдзигас кымынкӧ кӧйдыс усяс туй бокӧ. Сэтчӧ воасны лэбачьяс да кокаласны.

⁵ Кымынкӧ кӧйдыс усяс изъяинӧ. Этша муыс вӧсна ляпкыдінад найӧ ӧдйӧ чужасны.

⁶ Петас шонді, пӧжны пондас, и омӧль вужъя петасыд косьмас.

⁷ Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ, и сійӧ оз вай тусьсӧ.

⁸ Мукӧд кӧйдысыс усяс бур муӧ. Кӧйдысыс петас, быдмас да ваяс уна тусь. Ӧтияс ваясны тусьсӧ комын пӧв, мӧдъяс – квайтымын пӧв, коймӧдъяс – сё пӧв».

⁹ Сэсся Исус шуис: «Кодлӧн эм пель, мед кылӧ!»

Мыйла велӧданвисьтыс колӧ?

¹⁰ Ас кежаныс кольӧм бӧрын дас кыкыс мукӧд велӧдчысьыскӧд пондісны юасьны Исуслысь велӧданвисьт йылысь.

¹¹ Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь сӧмын велӧданвисьтъясысь.

¹² – Найӧ видзӧдӧны, аддзӧны – да оз казявны, кывзӧны, кылӧны – да оз гӧгӧрвоны. Оз бергӧдчыны Енлань, и налысь мыжъяссӧ оз ло прӧститӧма».

Кӧдзысь йылысь висьтсӧ гӧгӧрвоӧдӧм

¹³ Исус шуис налы: «Энӧ ӧмӧй гӧгӧрвоӧй тайӧ велӧданвисьтсӧ? Кыдзи нӧ мукӧд велӧданвисьтсӧ гӧгӧрвоанныд?

¹⁴ Кӧдзысь Ен кыв кӧдзӧ.

¹⁵ Туй бокӧ усьӧм кӧйдыс петкӧдлӧ: мортыс кылӧ Енлысь кывсӧ, но дзик пыр локтӧ сӧтана да гусялӧ сьӧлӧмас кӧдзӧм кывсӧ.

¹⁶ Изъяинӧ усьӧм кӧйдысыс петкӧдлӧ: мортыс кылӧ Енлысь кывсӧ да дзик пыр долыдпырысь босьтӧ сійӧс сьӧлӧмас,

¹⁷ но вужъясьтӧмысла оз дыр эскы, Ен кыв вӧсна дзескӧдігӧн-вӧтлігӧн сійӧ эновтчӧ эскӧмсьыс.

¹⁸ Лежнӧг пӧвстӧ усьӧм кӧйдысыс петкӧдлӧ: мортыс кылӧ Енлысь кывсӧ,

¹⁹ но быдлунъя тӧждыс, озырмыны ыштӧмыс да мукӧд кӧсйӧмыс пӧдтӧ кӧдзӧм кывсӧ, и сійӧ оз вай вотӧссӧ.

²⁰ Бур муӧ кӧдзӧм кӧйдысыс петкӧдлӧ: мортыс кылӧ Енлысь кывсӧ, босьтӧ сійӧс сьӧлӧмас да вайӧ вотӧс. Ӧтияс вайӧны вотӧссӧ комын пӧв, мӧдъяс – квайтымын пӧв, коймӧдъяс – сё пӧв».

Югдӧдантор йылысь велӧданвисьт

²¹ Исус висьталіс: «Ӧзтӧм битӧ ӧмӧй пыртлӧны керкаӧ, мед доз улӧ пуктыны либӧ лабич улӧ сувтӧдны? Оз ӧмӧй сійӧс бикок вылӧ пуктыны?

²² Став гусяыс воссяс да став дзебӧмаыс йӧзасяс.

²³ Кодлӧн эм пель, мед кылӧ!»

²⁴ Исус шуис: «Тӧд выланыд босьтӧй, мый кыланныд. Асланыд мурталӧм серти тіянлы мурталасны, нӧшта содтасны на тіянлы, кывзысьяслы.

²⁵ Кодлӧн эм, сылы сетасны. Кодлӧн абу, сылысь бӧръясӧ босьтасны».

Нянь быдмӧм йылысь велӧданвисьт

²⁶ Исус шуис: «Енлӧн Юралӧмыс татшӧм. Морт кӧдзӧ муӧ кӧйдыс.

²⁷ Войсӧ сійӧ узьӧ, лунсӧ олӧ, а кутшӧм ногӧн няньыс чужӧ-быдмӧ, оз тӧд.

²⁸ Муыс ачыс быдтӧ: медводз петӧ веж турун, сэсся сійӧ шептасьӧ, а сэсся нин шепъясас артмӧны тусьяс.

²⁹ Кор няньыс воас, дзик пыр кӧдзысь мӧдӧдӧ вундысьясӧс, ӧд вундан кадыс воис».

Горчица тусь йылысь велӧданвисьт

³⁰ Исус шуис: «Мыйкӧд ӧткодялам Енлысь Юралӧмсӧ? Кутшӧм велӧданвисьтӧн петкӧдлам сійӧс?

³¹ Енлӧн Юралӧмыс муӧ кӧдзӧм горчица тусь кодь. Став кӧйдыссьыс сійӧ медпосни.

³² Кӧдзӧм бӧрас быдмӧ да став пуктассьыс ыджыд лоӧ, весиг енэжвыв лэбачьяс вермӧны поздысьны гырысь вожъясыслӧн вуджӧр улӧ».

³³ Уна татшӧм велӧданвисьтӧн Исус юӧртіс налы Енлысь кывсӧ, мыйта найӧ вермисны гӧгӧрвоны.

³⁴ Велӧданвисьтъястӧг Исус эз сёрнитлы йӧзыскӧд, а велӧдчысьясыслы ас кежаныс гӧгӧрвоӧдліс ставсӧ.

Тӧвныр лӧньӧдӧм

³⁵ Сійӧ лунӧ, рытнас, Исус шуис велӧдчысьясыслы: «Вуджамӧй ты мӧдлапӧлӧ».

³⁶ Найӧ колисны йӧзсӧ, асьныс пуксисны пыжӧ Исус дінӧ. Накӧд вӧліны тшӧтш мукӧд пыжаяс.

³⁷ Кыптіс ыджыд тӧвныр. Тыыс ёна гызис, и пыжыс кутіс тырны ванас.

³⁸ Юрлӧс вылӧ нёровтчӧмӧн Исус узис пыж бӧжас. Сійӧс садьмӧдісны да шуисны: «Велӧдысь! Тэныд ӧмӧй веськодь, мый ми вӧям?»

³⁹ Исус чеччис, ӧлӧдіс тӧвсӧ да тшӧктіс ваыслы: «Лӧнь, ланьт!» Тӧлыс ланьтіс, и вӧвлытӧм чӧв-лӧнь пуксис.

⁴⁰ Исус шуис велӧдчысьясыслы: «Мыйла ті сэтшӧм полысьӧсь? Кӧні тіян эскӧмныд?»

⁴¹ Найӧ ыджыд полӧмӧн тырисны, ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧны Сылысь».