Марк 3 - Коми Библия 2023

Косьмӧм киаӧс бурдӧдӧм

¹ Исус бара локтіс синагогаӧ. Сэні вӧлі косьмӧм киа морт.

² Фарисейяс сюся видзӧдісны Исус бӧрся, бурдӧдас-ӧ Сійӧ шойччан лунӧ, ӧд корсисны помка мыжавны Сійӧс.

³ Исус тшӧктіс косьмӧм киа мортлы: «Сувт шӧрас».

⁴ Сэсся юаліс мукӧдыслысь: «Мый позьӧ вӧчны шойччан лунӧ: бурсӧ али лёксӧ, мездыны мортӧс али вины сійӧс?» Найӧ чӧв олісны.

⁵ Исус шогсис налӧн чорзьӧм сьӧлӧмныс вӧсна да чорыда видзӧдліс на вылӧ. Сэсся шуис висьысьлы: «Нюжӧд китӧ». Сійӧ нюжӧдіс, и киыс пырысь-пыр бурдіс, лои мӧдыс кодь.

⁶ Сэки фарисейяс петісны да Ирӧдлӧн йӧзкӧд дзик пыр пондісны сёрнитны Исусӧс виӧм йылысь.

Ты дорын

⁷ Исус муніс велӧдчысьясыскӧд ты дорӧ. Сы бӧрся муніс унасьыс-уна йӧз. Найӧ вӧліны Галилеяысь, Иудеяысь,

⁸ Ерусалим карысь, Идумеяысь, Йӧрдан ю сайысь, Тир да Сидон каръясысь. Найӧ локтісны Исус дінӧ, ӧд кывлӧмаӧсь, мый Сійӧ вӧчӧ.

⁹ Исус тшӧктіс велӧдчысьясыслы лӧсьӧдны Сылы пыж, медым йӧзыс эз дзескӧдны Сійӧс.

¹⁰ Висьысьяс сюйсьӧмӧн сюйсисны, медым инмӧдчывны Исус дінӧ, ӧд Сійӧ унаӧс бурдӧдаліс.

¹¹ Исусӧс аддзигӧн пеж ловъяс уськӧдчылісны Сы водзӧ да горзісны: «Тэ – Ен Пи!»

¹² Исус чорыда ӧлӧдіс найӧс Сы йылысь висьтавлӧмысь.

Дас кык велӧдчысь

¹³ Исус кайис керӧсӧ. Сійӧ корис Ас дінас, кодӧс кӧсйис, и найӧ локтісны Сы дінӧ.

¹⁴ Сійӧ бӧрйис дас кыкӧс лоны Сыкӧд, медым мӧдӧдны найӧс висьтавны Бур Юӧр

¹⁵ да сетны налы вын бурдӧдавны висьысьясӧс да вӧтлавны пеж ловъясӧс.

¹⁶ Дас кыкыс вӧліны: Симон, кодлы сетіс Петыр ним,

¹⁷ Зеведей Яков да сылӧн Иоан вокыс, кодъяслы сетіс Боанергес ним, вуджӧдны кӧ, лоӧ ”гым пиян”,

¹⁸ нӧшта Ӧндрей, Филип, Варфоломей, Матвей, Фома, Алфей Яков, Фаддей, Кананит Симон

¹⁹ да Искариот Иуда, Исусӧс вузалысь.

Кодсянь Исуслӧн выныс?

²⁰ Кор Исус бӧр локтіс гортас, сэтчӧ бара чукӧртчис уна йӧз. Исуслы да велӧдчысьясыслы эз вӧв позянлуныс весиг сёйыштнысӧ.

²¹ Та йылысь кылісны Исуслӧн матыссаясыс. Найӧ локтісны Сыла, ӧд сёрнитісны, Сійӧ пӧ абу Ас вежӧрас.

²² Ерусалимысь локтысь Индӧдӧ велӧдысьяс сёрнитісны, Сы пытшкын пӧ Вельзевул, вӧтлалӧ пӧ пеж ловъясӧс налӧн юралысь вынӧн.

²³ Исус корис йӧзсӧ да висьталіс налы велӧданвисьт: «Вермас-ӧ сӧтана вӧтлыны сӧтанаӧс?

²⁴ Ас муын олысьяс кӧ ас костаныс тышкасьӧны, сэні олӧмыс киссяс.

²⁵ Зыксьӧмӧн олысь керка дыр оз сулав.

²⁶ Сӧтанаыс кӧ аслыс паныд кыпӧдчӧ-тышкасьӧ, сійӧ вынсӧ воштас, сылы воас пом.

²⁷ Некод оз вермы пырны вына мортлӧн керкаӧ да сійӧс кӧртавтӧг босьтны сылысь эмбурсӧ. Сӧмын сійӧс кӧрталӧм бӧрын вермас петкӧдны сылысь эмбурсӧ.

²⁸ Веськыда висьтала тіянлы: мортлысь быд мыж да быд омӧльтӧм лоӧ прӧститӧма.

²⁹ Но коді омӧльтас Вежа Лолӧс, сылысь мыжсӧ некор оз ло прӧститӧма. Сылӧн мыжыс пыр кежлӧ кольӧ».

³⁰ Исус висьталіс тайӧс, ӧд сёрнитісны, мый Сы пытшкын пеж лов.

Коді Исуслы вок, чой да мам?

³¹ Локтісны Исуслӧн мамыс да вокъясыс. Ывлаас сулалігӧн найӧ мӧдӧдісны корны Сійӧс.

³² Исус гӧгӧр пукаліс уна йӧз. Сылы висьталісны: «Мамыд да чой-вокыд ывлаасӧсь, Тэнӧ юасьӧны».

³³ Исус воча шуис: «Коді Меным мамыс да вокыс?»

³⁴ Ас гӧгӧрыс пукалысьяс вылӧ видзӧдлӧмӧн шуис: «Со кодъяс Меным вокъясыс да мамыс.

³⁵ Ен кӧсйӧм серти олысь – Меным вок, чой да мам».