Марк 2 - Коми Библия 2023

Вӧрзьӧдчыны вермытӧмӧс бурдӧдӧм

¹ Кымынкӧ лун мысти Исус бара локтіс Капернаумӧ. Йӧз пӧвстын кывсис, мый Сійӧ гортас,

² и дзик пыр уна йӧз чукӧртчис Сы ордӧ, весиг пыранінас сулалісны. Исус висьталіс налы Енлысь кывсӧ.

³ Сэки нёльӧн вайисны вӧрзьӧдчыны вермытӧм мортӧс,

⁴ но уна йӧз вӧсна найӧ эз вермыны матыстчыны Исус дінӧ. Та вӧсна найӧ разисны керка вевтсӧ да Исус весьтті лэдзисны висьысьӧс вольпасьнас.

⁵ Налысь эскӧмсӧ аддзӧмӧн Исус шуис висьысьлы: «Пиӧй, тэнсьыд мыжъястӧ прӧститӧма».

⁶ Сэні пукалісны Индӧдӧ велӧдысьясысь кодсюрӧ да мӧвпалісны:

⁷ «Мыйла Сійӧ Енмӧс омӧльтӧ? Ен кындзи вермас-ӧ кодкӧ прӧститны мыжъяс?»

⁸ Исуслӧн лолыс дзик пыр тӧдмаліс налысь мӧвпъяссӧ. Сійӧ шуис: «Мыйла ті мӧвпаланныд тадзи?

⁹ Мый кокньыдджык шуны вӧрзьӧдчыны вермытӧмлы: ”Тэнсьыд мыжъястӧ прӧститӧма” либӧ ”Чеччы, босьт вольпасьтӧ да ветлы”?

¹⁰ Ӧні ті тӧдмаланныд, мый Морт Пи вермӧ прӧститны мыжъяс му вылын». Сэсся Исус шуис висьысьлы:

¹¹ «Тэныд шуа: чеччы, босьт вольпасьтӧ да мун гортад».

¹² Сійӧ дзик пыр чеччис, босьтіс вольпасьсӧ да ставныслӧн син водзын петіс. Йӧзыс шензьӧмӧн ошкисны Енмӧс да шуалісны, татшӧмсӧ пӧ ми эгӧ на аддзылӧй.

Левийӧс корӧм

¹³ Исус бара муніс ты дорӧ. Йӧзыс ставныс локтісны Сы дінӧ, и Сійӧ велӧдіс найӧс.

¹⁴ Сэтысь мунігас Исус аддзис Алфей Левийӧс, коді пукаліс вотчукӧртанінын. Исус шуис сылы: «Лок Ме бӧрся». Сійӧ чеччис да муніс Исус бӧрся.

¹⁵ Исус сёйӧ вӧлі Левий ордын. Сэні Исускӧд да Сылӧн велӧдчысьяскӧд сёйисны тшӧтш вот перйысьяс да мукӧд мыжа йӧз. Унаӧн на пиысь вӧліны Исус бӧрся мунысьяс.

¹⁶ Индӧдӧ велӧдысьяс да фарисейяс аддзисны, мый Исус сёйӧ мыжа йӧзкӧд да вот перйысьяскӧд. Найӧ юалісны Исуслӧн велӧдчысьяслысь: «Мыйла Сійӧ сёйӧ-юӧ вот перйысьяскӧд да мыжа йӧзкӧд?»

¹⁷ Исус кыліс тайӧс да шуис налы: «Дзоньвидзалы бурдӧдысьыд оз ков, сійӧ висьысьлы колӧ. Ме локті корны Ен дінӧ мыжаясӧс, эг веськыда олысьясӧс».

Видзалӧм йылысь юалӧм

¹⁸ Иоанлӧн да фарисейяслӧн велӧдчысьясыс вӧлі видзалӧны. Йӧзыс локтісны Исус дінӧ да юалісны: «Иоанлӧн да фарисейяслӧн велӧдчысьяс видзалӧны, а Тэнад велӧдчысьясыд мыйла оз?»

¹⁹ Исус вочавидзис: «Вермӧны-ӧ видзавны кӧлысь вылын верӧспукӧд гажӧдчысь ёртъясыс? Верӧспуыс кӧ накӧд, найӧ оз вермыны видзавнысӧ.

²⁰ Воасны на сійӧ лунъясыс, кор колясны верӧспутӧг, сэки и видзаласны.

²¹ Важ паськӧмтӧ оз дӧмны выль дӧра дӧмасӧн. Тадзи кӧ вӧчан, выль дӧмас дортіыс нёйдас-косяссяс паськӧмыд, розьыс ёнджыка на ыдждас.

²² Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс. Выль винатӧ кисьтӧны выль кучик дозйӧ».

Шойччан лун йылысь

²³ Шойччан лунӧ Исус мунӧ вӧлі нянь муяс вомӧн. Сылӧн велӧдчысьясыс мунігмозныс пондісны нетшкыны шепсӧ.

²⁴ Фарисейяс шуисны Исуслы: «Видзӧдлы, мый Тэнад велӧдчысьясыд вӧчӧны! Тайӧс оз позь вӧчны шойччан лунӧ».

²⁵ Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд, а сёяныс налӧн эз вӧв?

²⁶ Авиатар аркирей дырйи сійӧ пырис Ен керкаӧ, сёйис вежа нянь да сетіс тшӧтш аслас йӧзлы. Тайӧ няньсӧ сӧмын попъяслы позис сёйны».

²⁷ Сэсся Исус шуис фарисейяслы: «Шойччан лунсӧ лӧсьӧдӧма мортлы, абу мортсӧ – шойччан лунлы.

²⁸ Та вӧсна Морт Пи шойччан лун вылын ыджыдыс».