Марк 15 - Коми Библия 2023

Исусӧс мыждӧм

¹ Асывводзнас чукӧртчисны аркирейяс, юрнуӧдысьяс, Индӧдӧ велӧдысьяс да став веськӧдлан котырыс. Сёрнитчӧм бӧрын Исусӧс кӧрталӧмӧн нуӧдісны Пилат дінӧ да сетісны сылы.

² Пилат юаліс Исуслысь: «Тэ-ӧ иудейяслӧн Ӧксыыс?» Исус вочавидзис: «Тэ шуан».

³ Аркирейяс унаторйысь мыжалісны Исусӧс.

⁴ Пилат бара юаліс Сылысь: «Он тай нӧ нинӧм шу? Кылан, кутшӧма Тэнӧ мыжалӧны».

⁵ Исус весиг вочакыв эз шу. Пилатӧс тайӧ шензьӧдіс.

⁶ Быд во Ыджыд лунӧ йӧз корӧм серти Пилат лэдзліс дзескыдінысь ӧти мортӧс.

⁷ Сэки дзескыдінын пукалісны зык лэптысьяс. На лыдын тшӧтш вӧлі Варавва. Зык дырйиыс найӧ мортӧс виӧмаӧсь.

⁸ Чукӧртчӧм йӧз пондісны горзӧмӧн корны Пилатӧс вӧчны налы сійӧ, мый пыр вӧчлывліс.

⁹ Пилат юаліс: «Кӧсъянныд-ӧ, медым ме лэдзи тіянлы иудейяслысь Ӧксысӧ?»

¹⁰ Пилат тӧдіс, мый аркирейяс сетісны Исусӧс сы киӧ вежалӧмныс понда.

¹¹ Аркирейяс ыззьӧдісны йӧзсӧ, мед Исус пыдди корасны лэдзны Варавваӧс.

¹² Пилат юаліс: «Мый шуанныд вӧчны Сыкӧд, кодӧс нимтанныд иудейяслӧн Ӧксыӧн?»

¹³ Найӧ горӧдісны: «Тувъяв Сійӧс!»

¹⁴ «Мый лёксӧ Сійӧ вӧчис?» – юаліс Пилат. Йӧзыс гораджыка на горзісны: «Тувъяв Сійӧс!»

¹⁵ Йӧзлы шогмӧм могысь Пилат лэдзис Варавваӧс, а Исусӧс нӧйтӧм бӧрын сетіс тувъявны.

Исусӧс тувъялӧм

¹⁶ Шыпуртаяс нуӧдісны Исусӧс римса юралысьлӧн керка йӧрӧ, сэтчӧ вайӧдісны тышкайӧзӧс.

¹⁷ Найӧ пасьтӧдісны Исусӧс пемыдгӧрд кышанӧ, юрас пуктісны лежнӧгысь кыӧм юркытш,

¹⁸ сэсся пондісны нимӧдны Сійӧс: «Мед олас иудейяслӧн Ӧксы!»

¹⁹ Кучкалісны юрас беддьӧн, сьӧлалісны Сійӧс да пидзӧсчанясьӧмӧн копрасисны Сы водзын.

²⁰ Сералӧм-лёкӧдӧм бӧрын найӧ босьтісны Исус вылысь пемыдгӧрд кышансӧ да бӧр пасьтӧдісны Сійӧс Аслас паськӧмӧ, сэсся нуӧдісны тувъявны.

²¹ Исуслысь крестсӧ тшӧктісны нуны видз-му вылысь локтысь киринеяса Симонлы, Ӧльӧксанлӧн да Руфослӧн батьлы.

²² Исусӧс вайӧдісны Голгопа керӧсӧ, нимыслӧн вежӧртасыс лоӧ ”Юр лы”.

²³ Сэні Сылы сетісны смирна сора вина, но Сійӧ эз ю.

²⁴ Исусӧс тувъялысьяс пудъясьӧмӧн юкисны Сылысь паськӧмсӧ.

²⁵ Исусӧс тувъялісны ӧкмыс час асылӧ.

²⁶ Юр весьтас ӧшӧдісны мыжалан пасйӧд: «Иудейяслӧн Ӧксы».

²⁷ Сыкӧд орччӧн тувъялісны кык лёк вӧчысьӧс: ӧтисӧ веськыдладорас, мӧдсӧ шуйгаладорас.

²⁸ Тадзи иніс Гижӧдыс: «Сійӧс пуктісны Индӧдтӧг олысьяс лыдӧ».

²⁹ Сэті мунысьяс лёкысь видзӧдӧмӧн омӧльтісны Исусӧс: «Крам жугӧдысь да куим лунӧн сійӧс лэптысь,

³⁰ мезды Асьтӧ, лэччы крест вывсьыд!»

³¹ Сійӧс лёкӧдісны тшӧтш аркирейяс да Индӧдӧ велӧдысьяс: «Мукӧдӧс мездіс, а Асьсӧ мездыны оз вермы!

³² Кристос, Израильлӧн Ӧксы, мед лэччас крест вывсьыс. Аддзылам кӧ тайӧс, сэки эскам». Исусӧс лёкӧдісны тшӧтш орччӧн тувъялӧмаяс.

Исуслӧн кулӧм

³³ Луншӧр кадӧ пемдіс став му пасьталаыс, пемыдыс сулаліс куим часӧдз.

³⁴ Куим час гӧгӧрын Исус ыджыд шыӧн горӧдіс: «Эли, Эли, лама сабактани?» Тайӧ лоӧ: «Енмӧй, Енмӧй, мыйла Тэ эновтін Менӧ?»

³⁵ Сэні сулалысьясысь кодсюрӧ шуисны, Илляӧс пӧ корӧ.

³⁶ Ӧти морт котӧртіс, кӧтӧдіс вина уксусӧн губка, сэсся бедь помӧ сатшкӧмӧн мыччис сійӧс Исуслы да шуис: «Энлӧй! Видзӧдлам, локтас оз Илля лэдзны Сійӧс».

³⁷ Исус горӧдіс ыджыд шыӧн, сэсся лолыс петіс.

³⁸ Сэки крамын ӧшалысь дӧраыс вывсяньыс улӧдзыс кык пельӧ косяссис.

³⁹ Сё тышкамортӧн веськӧдлысь сулаліс Исуслы воча. Кор сійӧ аддзис, кыдзи Исуслӧн горӧдӧм бӧртиыс лолыс петіс, шуис: «Тайӧ Мортыс збыльысь Ен Пи вӧлӧма».

⁴⁰ Сэні вӧліны аньяс, кодъяс ылісянь видзӧдісны. На пӧвстын вӧліны Магдала Марья, томджык Яковлӧн да Иосейлӧн Марья мамныс да Саломия.

⁴¹ Галилеяын найӧ ветлывлісны Исускӧд да кесъявлісны Сылы. Нӧшта сэні вӧлі уна мукӧд ань, кодъяс локтісны Исускӧд Ерусалимӧ.

Исусӧс дзебӧм

⁴² Вӧлі рыт, шойччан лунлы паныд.

⁴³ Аримафея карысь воис Ӧсип, веськӧдлан котырысь пыдди пуктана морт. Сійӧ виччысис Ен Юралӧмлысь воӧмсӧ. Сійӧ повтӧг муніс Пилат дінӧ да корис Исуслысь шойсӧ.

⁴⁴ Пилат чуймис, мый Исус кулӧма нин. Сійӧ корис сё тышкамортӧн веськӧдлысьӧс да тӧдмаліс, важӧн-ӧ куліс.

⁴⁵ Кор Пилат тӧдмаліс Исуслӧн кулӧм йылысь, лэдзис Ӧсиплы босьтны шойсӧ.

⁴⁶ Ӧсип ньӧбис шабді дӧра, босьтіс крест вылысь шойсӧ, гартыштіс дӧраӧ да пуктіс изкыртаӧ кералӧм дзебанінӧ. Пыранінас путкыльтіс из.

⁴⁷ Магдала Марья да Иосейлӧн Марья мамыс видзӧдісны, кытчӧ дзебасны Исусӧс.