Марк 14 - Коми Библия 2023

Исусӧс кӧсйӧны вины

¹ Ыджыд лунӧдз, Шомтӧм нянь сёян лунъясӧдз, кык лун на вӧлі. Аркирейяс да Индӧдӧ велӧдысьяс корсисны, кыдзи эськӧ ылӧдлӧмӧн босьтны Исусӧс да вины Сійӧс.

² Но шуисны, мый Ыджыд лунӧ оз ков, ӧд йӧзыс вермасны шызьыны.

Исусӧс мавтыштӧм

³ Исус вӧлі Вифания сиктын, проказаысь бурдӧм Симон ордын. Сёйиганыс сэтчӧ локтіс ань, сійӧ вайис вальді дозйын зэв дона нард вый. Ань жугӧдіс дозсӧ да кисьталіс выйсӧ Исуслы юр вылас.

⁴ Кодсюрӧ дӧзмӧмпырысь шуасисны ас костаныс: «Мыйла, бара, выйсӧ лотӧ-а?

⁵ Тайӧ выйсӧ эськӧ позис куимсё динарысь донаджыка вузавны, а сьӧмсӧ гӧльяслы сетны». Тадзи найӧ шуасисны аньыс вылӧ.

⁶ Исус шуис: «Ӧвсьӧй сыысь! Мыйла ті шӧйӧвоштанныд аньсӧ? Сійӧ буртор вӧчис Меным.

⁷ Гӧльяс пыр лоасны тіянкӧд, и ті верманныд вӧчны налы бурсӧ, кор кӧсъянныд, а Ме тіянкӧд ог пыр ло.

⁸ Тайӧ аньыс вӧчис, мый вермис: дасьтіс Менӧ дзебигкежлӧ.

⁹ Веськыда висьтала тіянлы: муюгыд пасьтала, кӧні лоӧ юӧртӧма тайӧ Евангелльӧсӧ, сэні казьтыштасны тайӧ аньсӧ да висьталасны, мый сійӧ вӧчис».

Иуда вузалӧ Исусӧс

¹⁰ Искариот Иуда вӧлі дас кык велӧдчысьысь ӧти. Сійӧ муніс аркирейяс дінӧ вузавны налы Исусӧс.

¹¹ Тайӧс кылӧм бӧрын найӧ нимкодьпырысь кӧсйысисны сетны сылы сьӧм. Иуда пондіс корсьны лӧсялан кад, медым вузавны Исусӧс.

Ыджыдлунся баляӧс сёйӧм

¹² Шомтӧм нянь сёян лунъяс дырйи медводдза лунӧ, кодыр начкисны ыджыдлунся баляӧс, велӧдчысьяс юалісны Исуслысь: «Кӧні кӧсъян сёйны ыджыдлунся баляӧс? Ми мунам да дасьтам».

¹³ Кык велӧдчысьӧс мӧдӧдіг Исус шуис налы: «Мунӧй карас. Тіянлы паныдасяс гырничын ва нуысь морт, мунӧй сы бӧрся.

¹⁴ Кытчӧ сійӧ пырас, висьталӧй сэні керка кутысьыслы: ”Велӧдысь юасьӧ, кутшӧм вежӧсын Аслас велӧдчысьяскӧд вермас сёйны ыджыдлунся баляӧс”.

¹⁵ Сійӧ петкӧдлас тіянлы вылыс судтасьыс ыджыд вежӧс, мый дасьтӧма-вольсавлӧма. Сэні и лӧсьӧдӧй».

¹⁶ Велӧдчысьяс мунісны, воисны карас да аддзисны: ставыс лои Исуслӧн висьталӧм серти. Найӧ дасьтісны ыджыдлунся сёян.

¹⁷ Рытнас Исус локтіс дас кыкнан велӧдчысьыскӧд.

¹⁸ Сёйиганыс шуис налы: «Веськыда висьтала тіянлы: тіян пиысь ӧти, Мекӧд тшӧтш сёйысь, вузалас Менӧ».

¹⁹ Шогӧ усьӧмӧн быдӧн кутіс юасьны Сылысь: «Ог-ӧ ме?»

²⁰ Исус вочавидзис: «Тіян пӧвстысь, дас кыксьыс ӧти, сійӧ Мекӧд ӧти тасьтіысь сёйӧ.

²¹ Морт Пи мунӧ, кыдзи гижӧма Сы йылысь. Но курыд шог Сійӧс вузалысьлы! Бурджык сылы вӧлі, эз кӧ чужлы».

²² Сёйиганыс Исус босьтіс нянь, Енмӧс аттьӧалӧмӧн чегъяліс няньсӧ да велӧдчысьяслы сетігас шуис: «Босьтӧй, сёйӧй, тайӧ Менам яй».

²³ Сэсся босьтіс чаша, аттьӧаліс Енмӧс да сетіс велӧдчысьясыслы. Ставныс юисны сэтысь.

²⁴ Исус шуис налы: «Тайӧ Менам вир – Выль Йитӧдлӧн вир, сійӧ киссьӧ уна вӧсна.

²⁵ Веськыда висьтала тіянлы: ӧнісянь ог понды юны виноград юансӧ сійӧ лунӧдз, кор понда юны выльӧс Енлӧн Юраланінын».

²⁶ Енлы сьылӧм бӧрын найӧ кайисны Олив керӧсӧ.

Исус висьталӧ Сійӧс эновтӧм йылысь

²⁷ Исус шуис велӧдчысьясыслы: «Тавой ті ставныд эновтанныд Менӧ. Гижӧма: ”Видзысьсӧ кувмӧн дойда, и ыжъясыс разаласны”.

²⁸ Ловзьӧм бӧрам Ме виччыся тіянӧс Галилеяын».

²⁹ Петыр шуис: «Весиг ставныс кӧ эновтасны Тэнӧ, ме ог».

³⁰ Исус вочавидзис: «Веськыда висьтала тэныд: тавой петуклӧн кыкысь чукӧсттӧдз на тэ куимысь соссян Меысь».

³¹ Петыр ёнджыка на шуаліс: «Весиг кӧ кувны ковмас Тэкӧд, ог соссьы». Тадзи шуалісны тшӧтш мукӧд велӧдчысьыс.

Исус кевмысьӧ Гефсиманын

³² Исус велӧдчысьясыскӧд локтіс Гефсиманӧ. Сійӧ шуис налы: «Пукалыштӧй тані Менам кевмысигкості».

³³ Аскӧдыс Исус босьтіс Петырӧс, Яковӧс да Иоанӧс. Исусӧс полӧм да шогалӧм босьтіс.

³⁴ Сійӧ шуис: «Шогӧй кувмӧн топӧдӧ лолӧс. Кольччӧй татчӧ да энӧ узьӧй».

³⁵ Ачыс водзлань муныштіс да муӧ уськӧдчӧмӧн пондіс кевмысьны, медым, позис кӧ, тайӧ кадыс ордйис Сійӧс.

³⁶ Сійӧ шуаліс: «Авва, Батьӧй! Тэныд ставыс вермана. Вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».

³⁷ Исус бӧр локтіс да аддзис, мый велӧдчысьясыс унмовсьӧмаӧсь. Петырлы шуис: «Симон, узян-ӧ? Ӧти час весиг эн вермы узьтӧг олыштны.

³⁸ Энӧ узьӧй, кевмысьӧй, мед ыштӧдӧмыс эз вермы тіянӧс. Лолыд ӧд пыр дась, а вир-яйыд жеб».

³⁹ Исус мӧдысь муніс да воддза мозыс кевмысис.

⁴⁰ Локтӧм бӧрас бара аддзис, мый велӧдчысьяссӧ унмыс топыда личкӧма. Найӧ эз тӧдны, мый вочавидзны Сылы.

⁴¹ Коймӧдысь локтігас Исус шуис налы: «Ті пыр на узянныд да шойччанныд? Тырмас. Кадыс воис. Морт Пиӧс мыжаяс киӧ сетӧны.

⁴² Чеччӧй, мунамӧй. Менӧ вузалысь матын нин».

Исусӧс локтӧны босьтны

⁴³ Исуслӧн сёрнитігкості локтіс Иуда, дас кык велӧдчысьысь ӧти. Сыкӧд тшӧтш локтісны зоръясӧн да шыпуртъясӧн уна йӧз. Найӧс вӧлі мӧдӧдӧмаӧсь аркирейяс, Индӧдӧ велӧдысьяс да юрнуӧдысьяс.

⁴⁴ Исусӧс вузалысь шуӧма локтӧмаяслы, кодӧс пӧ окышта, Сійӧс босьтӧй да нуӧдӧй, син увсьыныд энӧ лэдзӧй.

⁴⁵ Иуда веськыда муніс Исус дінӧ да шуис: «Велӧдысьӧй», сэсся окыштіс Сійӧс.

⁴⁶ Сэки кытшалісны да босьтісны Исусӧс.

⁴⁷ Сэні сулалысьясысь ӧти перйис шыпуртсӧ да керыштіс аркирей кесйӧглысь пельсӧ.

⁴⁸ Исус шуис: «Лёк вӧчысьӧс моз зорйӧн-шыпуртӧн локтінныд босьтны Менӧ.

⁴⁹ Ме быд лун тіян крамын велӧді, но ті энӧ босьтӧй Менӧ. Тадзи инӧны Гижӧдъяс».

⁵⁰ Сэки велӧдчысьяс ставныс эновтісны Исусӧс да пышйисны.

^51-52 Ӧти зон вӧтчис Исус бӧрся, но сійӧс кутісны. Зонка нетшыштчис да пасьтӧгыс пышйис. Куш яй вылас плавгӧм дӧраыс колис шыпуртаяслӧн киӧ.

Исус веськӧдлан котыр водзын

⁵³ Исусӧс вайӧдісны аркирей ордӧ. Сэтчӧ чукӧртчисны юрнуӧдысьяс, Индӧдӧ велӧдысьяс да став аркирейыс.

⁵⁴ Петыр бӧрӧ кольччӧмӧн вӧтчис Исус бӧрся аркирей керка дорӧдз. Пырис йӧрас да пуксис кесйӧгъяскӧд орччӧн би дорӧ шонтысьны.

⁵⁵ Аркирейяс да став веськӧдлан котырыс корсисны Исуслы паныд висьталысьясӧс, медым сэсся мыждыны да вины Сійӧс. Но колана висьталысьыс эз сюр.

⁵⁶ Унаӧн пӧръясьӧмӧн висьталісны Исус йылысь, но налӧн висьталӧмыс торъяліс ӧта-мӧдсьыс.

⁵⁷ Кодсюрӧ висьталісны:

⁵⁸ «Ми кывлім, мый Сійӧ шуліс. Шуліс, жугӧда пӧ киӧн вӧчӧм тайӧ крамсӧ, сэсся пӧ куим лунӧн лэпта мӧдӧс, киӧн вӧчтӧмӧс».

⁵⁹ Но весиг налӧн висьталӧмыс торъяліс ӧта-мӧдсьыс.

⁶⁰ Сэки аркирей сувтіс шӧрас да юаліс Исуслысь: «Мый воча шуан?»

⁶¹ Исус чӧв оліс, нинӧм эз вочавидз. Аркирей юаліс Сылысь: «Тэ-ӧ Кристос, ошкана Енмыслӧн Пиыс?»

⁶² Исус вочавидзис: «Ме. И ті аддзанныд Морт Пиӧс, Ставсӧвермысьлӧн веськыдладорас пукалысьӧс да кымӧръяс вылын локтысьӧс».

⁶³ Сэки аркирей косяліс ассьыс паськӧмсӧ да шуис: «Висьталысьяс миянлы оз нин ковны,

⁶⁴ ті асьныд кывлінныд, мый Сійӧ Енмӧс омӧльтӧ. Мый шуанныд?» Ставныс мыжалісны Исусӧс да ӧти вомӧн шуисны вины Сійӧс.

⁶⁵ Кодсюрӧ пондісны сьӧлавны Исуслы. Сылысь чужӧмсӧ вевттьӧмӧн найӧ нӧйтісны Сійӧс да шуалісны: «Висьтав, Пророк, коді кучкис?» Видзысьяс тшӧтш кучкалісны Сылы чужӧмас.

Петырлӧн соссьӧм

⁶⁶ Петыр вӧлі керка йӧрас. Аркирейлӧн кесйӧгъяс пиысь ӧти ань локтіс сэтчӧ.

⁶⁷ Сійӧ аддзис би дорын шонтысьысь Петырӧс да сы вылӧ видзӧдлӧмӧн шуис: «Тэ тшӧтш Назаретса Исускӧд вӧлін».

⁶⁸ Петыр соссис: «Ог тӧд Сійӧс. Ог гӧгӧрво, мый висьталан», сэсся петіс ортсы йӧрас. Кыліс петуклӧн чукӧстӧм.

⁶⁹ Аньыс бара казяліс Петырӧс да пондіс висьтавлыны сэні сулалысьяслы, тайӧ мортыс пӧ на пиысь.

⁷⁰ Петыр бара соссис. Бӧрынджык сэні сулалысьяс шуисны Петырлы: «Тэ дзик на пиысь. Тэ Галилеяысь, сёрниыд налӧн кодь».

⁷¹ Петыр енмасьӧмӧн пондіс соссьыны: «Ог тӧд тайӧ Мортсӧ, код йылысь висьталанныд».

⁷² Кыліс петуклӧн мӧдысь чукӧстӧм. Сэки Петырлы тӧд вылас уси Исуслӧн шуӧмыс: «Петуклӧн кыкысь чукӧсттӧдз на тэ куимысь соссян Меысь». Петыр ырзӧмӧн бӧрддзис.