Марк 12 - Коми Библия 2023

Виноград быдтысьяс йылысь велӧданвисьт

¹ Исус кутіс висьтавны налы велӧданвисьтъясӧн: «Морт пуктас аслас йӧрӧ виноград, гӧгӧрыс потшас, вотӧс пычкан гу кодъяс да башня лэптас. Сэсся йӧрсӧ виноград быдтысьяслы кӧртымӧ сетас, ачыс мунас.

² Вотӧс чукӧртан кадӧ овмӧс кутысь мӧдӧдас кесйӧгсӧ босьтны чукӧртӧм вотӧсысь ассьыс пайсӧ.

³ Виноград быдтысьяс кутасны кесйӧгсӧ, нӧйтасны да вӧтласны сійӧс куш киӧн.

⁴ Овмӧс кутысь мӧд кесйӧгӧс мӧдӧдас. Сійӧс вачкасны изйӧн юрас, лёкысь сераласны сы вылын да вӧтласны.

⁵ Мӧдӧдас коймӧдӧс, а сійӧс виасны. Уна мукӧдӧс на мӧдӧдас, но ӧтиясӧс нӧйтасны, мӧдъясӧс виасны.

⁶ Овмӧс кутысьлӧн нӧшта вӧлі ӧти – аслас муса пиыс. Медбӧрти виноград быдтысьяс дінӧ мӧдӧдас писӧ, мӧвпыштас: ”Менам пиысь, гашкӧ, яндысясны”.

⁷ Виноград быдтысьяс шуасны ӧта-мӧдныслы: ”Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.

⁸ Найӧ кутасны сійӧс да виасны, шойсӧ виноград йӧр сайӧ шыбитасны.

⁹ Мый вӧчас овмӧс кутысь? Сійӧ локтас, виноград быдтысьясӧс виас, а йӧрсӧ мукӧдлы сетас.

¹⁰ Энӧ ӧмӧй Гижӧдсьыс лыддьылӧй тайӧс: – Изйыс, кодӧс ӧтдортісны керка лэптысьяс, лоис пельӧс изйӧн.

¹¹ Тайӧ Господьсянь да шензьӧдӧ миянӧс».

¹² Найӧ гӧгӧрвоисны, мый велӧданвисьтыс вӧлі на йылысь. Кӧсйисны кутны Исусӧс, но полісны йӧзсьыс. Сэки эновтісны Сійӧс да мунісны.

Вот мынтӧм йылысь

¹³ Сэсся найӧ мӧдӧдісны Исус дінӧ Ирӧдлысь йӧзсӧ да фарисейяс пиысь кодсюрӧӧс, медым Исусӧс кыйны сёрниас.

¹⁴ Найӧ локтісны да шуисны Сылы: «Велӧдысь, ми тӧдам, мый Тэ веськыда сёрнитан да он пов йӧзлӧн шуасьӧмысь. Тэ он видзӧд морт вылӧ, а веськыда велӧдан Енлӧн туйӧ. Висьтав, миянлы позьӧ вот мынтыны кесарлы?»

¹⁵ Исус тӧдіс, мый найӧ кык бана шаньгаяс, да шуис налы: «Мыйла ті зілянныд кыйны Менӧ? Петкӧдлӧй Меным динартӧ».

¹⁶ Найӧ вайисны. Исус юаліс: «Кодлӧн тані чужӧмыс-нимыс?» Найӧ вочавидзисны: «Кесарлӧн».

¹⁷ Исус шуис налы: «Кесарлысь сетӧй кесарлы, а Енлысь – Енлы». Исус шемӧсмӧдіс найӧс.

Саддукейяс юасьӧны ловзьӧм йылысь

¹⁸ Исус дінӧ локтісны саддукейяс, кодъяс шуӧны, ловзьӧмыс пӧ абу. Найӧ юалісны Исуслысь:

¹⁹ «Велӧдысь, Мӧисей гижӧма, мый ныв-питӧм морт кӧ кулас, вокыслы колӧ босьтны кулӧм вокыслысь дӧвасӧ гӧтырӧ да нюжӧдны вокыслысь рӧдсӧ.

²⁰ Сизим вок вӧлі. Ыджыдыс гӧтрасис, сэсся куліс, ныв-пиыс сылӧн эз вӧв.

²¹ Гӧтырсӧ мӧд вокыс босьтіс, сійӧ тшӧтш ныв-питӧг куліс. Сэсся коймӧдыс босьтіс.

²² Тадзи сизимнанныс гӧтрасисны да кулісны ныв-питӧг. Медбӧрын аньыс куліс.

²³ Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»

²⁴ Исус вочавидзис: «Гижӧдъяссӧ да Енлысь вынсӧ ті онӧ тӧдӧй, та вӧсна ылалӧмныд.

²⁵ Ловзьӧмаяс оз гӧтрасьны да верӧс сайӧ оз мунны. Найӧ енэжвыв анделъяс кодьӧсь.

²⁶ Ловзьӧм йылысь шуа – ті ӧмӧй энӧ лыддьылӧй Мӧисей небӧгысь сотчысь лежнӧг дорын вӧвлӧмтор йылысь? Ен шуис Мӧисейлы: ”Ме Ӧвраамлӧн Ен, Исааклӧн Ен да Яковлӧн Ен”.

²⁷ Енмыс абу кулӧмаяслӧн Ен, Сійӧ ловъяяслӧн Ен. Ті ёна ылалӧмныд».

Медыджыд тшӧктӧм

²⁸ Индӧдӧ велӧдысьясысь ӧти казяліс вензьӧмсӧ да кыліс Исуслысь бура вочавидзӧмсӧ. Сійӧ матыстчис Исус дінӧ да юаліс: «Став тшӧктӧм пиысь кутшӧм медыджыдыс?»

^29-30 Исус вочавидзис: «Кывзы, Израиль! Господь, миян Енным, эм ӧти Господь. Радейт Господьӧс, ассьыд Ентӧ, став сьӧлӧмнад, став олӧмнад, став мывкыднад да став выннад. Тайӧ медыджыд тшӧктӧм.

³¹ Мӧд тшӧктӧмыс – радейт матыссатӧ асьтӧ моз. Тайӧ кык тшӧктӧмыс ӧткодь, наысь ыджыдджыкыс абу».

³² Индӧдӧ велӧдысь шуис Исуслы: «Тадз, Велӧдысьӧй! Тэ веськыда висьталін, эм ӧти Ен, мӧдыс абу.

³³ Енмӧс колӧ радейтны став сьӧлӧмнад, став мывкыднад, став олӧмнад да став выннад, и матыссатӧ колӧ радейтны асьтӧ моз. Сотан вись да мукӧд вись дорысь тайӧ коланаджык».

³⁴ Исус аддзис, мый сійӧ сюся сёрнитӧ, да шуис: «Тэ абу ылын Енлӧн Юралӧмысь». Та бӧрын некод нин эз лысьт юасьны Исуслысь.

Давид пи йылысь юалӧм

³⁵ Крамын велӧдігӧн Исус шуис: «Мыйла нӧ Индӧдӧ велӧдысьяс шуӧны, Кристос пӧ Давид пи?

³⁶ Вежа Ловсянь сёрнитігас Давид ачыс шуӧ: – Господь шуис менам Ыджыдлы: ”Пукав Менам веськыдладорын, кытчӧдз ог пукты Тэнад кок улӧ Тэнӧ мустӧмтысьясӧс”.

³⁷ Давид шуӧ Сійӧс Господьӧн. Кыдзи нӧ Сійӧ Давидлы пиӧн лоӧ?» Унаӧн окотапырысь кывзісны Исусӧс.

Видзчысьӧй Индӧдӧ велӧдысьясысь!

³⁸ Велӧдігас Сійӧ висьтавліс: «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны,

³⁹ синагогаын водзын пукавны да гажӧдчанінын бурджыклаӧ пуксьыны.

⁴⁰ Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».

Дӧвалӧн сьӧм сетӧм

⁴¹ Исус пуксис сьӧм чукӧртан кудлы паныд да видзӧдіс, кыдзи йӧзыс пуктісны сэтчӧ сьӧм. Озыръяс уна пуктісны.

⁴² Локтіс гӧль дӧва да пуктіс кык ыргӧн сьӧм, тайӧ лоӧ ӧти ур мында.

⁴³ Исус корис велӧдчысьяссӧ да шуис налы: «Веськыда висьтала тіянлы: тайӧ гӧль дӧваыс быдӧнысь унджык пуктіс.

⁴⁴ Ставныс унасьыс чуктӧдісны, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».