Марк 11 - Коми Библия 2023

Исус пырӧ Ерусалимӧ

¹ Ерусалимлань матыстчигӧн Исус велӧдчысьясыскӧд воис Олив керӧсын сулалысь Виффагия да Вифания сиктъяс дорӧ. Ассьыс кык велӧдчысьсӧ мӧдӧдігӧн

² Исус шуис: «Мунӧй тайӧ сиктас. Сэтчӧ пыриганыд аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ.

³ Юаласны кӧ, мыйла тайӧс вӧчанныд, вочавидзӧй, мый сійӧ колӧ Господьлы. Сэки дзик пыр сетасны осёлсӧ, медым вайӧдны татчӧ».

⁴ Мӧдӧдӧмаяс мунісны, аддзисны дзиръя дорӧ домалӧм том осёлӧс да разисны сійӧс.

⁵ Кодсюрӧ сэні сулалысьяс пиысь юалісны: «Мый вӧчанныд? Мыйла разянныд осёлсӧ?»

⁶ Велӧдчысьяс вочавидзисны, кыдзи Исус тшӧктіс. Сэки лэдзисны босьтны осёлӧс.

⁷ Том осёлӧс вайӧдісны Исус дінӧ, шлапкисны осёл вылӧ паськӧмнысӧ, сэсся Исус пуксис сы вылӧ.

⁸ Унаӧн вольсавлісны ассьыныс паськӧмнысӧ туй вылас, мукӧдыс чегъялісны туй бокысь пу вожъяс да тшӧтш пукталісны туй вылас.

⁹ Водзас да бӧрас мунысьяс горзісны: – Осанна! Бурсиӧма Господь нимӧн Локтысьӧс!

¹⁰ Бурсиӧма миян Давид батьлысь локтан юралӧмсӧ, Господь нимӧн локтан юралӧмсӧ! Ошкӧм Медвылыссалы!

¹¹ Ерусалимӧ воӧм мысти Исус пырис крамӧ. Ставсӧ видзӧдалӧм бӧрын сёр рытнас муніс дас кыкнан велӧдчысьыскӧд Вифанияӧ.

Инжир пу ёрӧм

¹² Мӧд луннас Вифанияысь мунігас Исуслӧн кынӧмыс пондіс сюмавны.

¹³ Ылысянь Сійӧ аддзис коръя инжир пу да муніс видзӧдлыны, оз-ӧ сюр сэтысь тусьтор. Матыстчис пу дінас да аддзис сӧмын коръяссӧ, ӧд эз на во тусь гӧрддзасян кадыс.

¹⁴ Исус шуис пуыслы: «Ӧнісянь оз пондыны сёйны тэнсьыд вотӧстӧ». Велӧдчысьясыс кывлісны тайӧс.

Крамысь вузасьысьясӧс вӧтлалӧм

¹⁵ Сэсся найӧ локтісны Ерусалимӧ. Крамӧ пырӧм бӧрын Исус пондіс вӧтлавны сэтысь вузасьысь-ньӧбасьысьясӧс. Пӧрлӧдліс сьӧм вежысьяслысь пызанъяссӧ да гулюӧн вузасьысьяслысь пуклӧсъяссӧ,

¹⁶ эз лэдз крам пырыс нуны нинӧмтор.

¹⁷ Сійӧ велӧдіс найӧс шуалӧмӧн: «Абу-ӧ гижӧма, мый Менам керкаӧй кутас шусьыны став войтыръяслӧн кевмысян керкаӧн? А ті сыысь лёк вӧчысьяслы дзебсянін вӧчинныд».

¹⁸ Аркирейяс Индӧдӧ велӧдысьяскӧд кывлісны тайӧс да кутісны мӧвпавны, кыдзи эськӧ вины Исусӧс. Найӧ полісны Сыысь, ӧд став йӧзыс шензисны Сылӧн велӧдӧмысь.

¹⁹ Рытнас Исус петіс карсьыс.

Косьмӧм инжир пу

²⁰ Асывводзнас инжир пу дінті мунігӧн аддзисны: сійӧ вужйӧдзыс косьмӧма.

²¹ Петырлы тӧд вылас уси Исуслӧн шуӧмыс. Сійӧ шуис Исуслы: «Велӧдысьӧй, видзӧдлы! Инжир пуыд, кодӧс Тэ ёрин, косьмӧма».

²² Исус шуис налы:

²³ «Эскӧй Енлы. Веськыда висьтала тіянлы: шуас кӧ кодкӧ тайӧ керӧсыслы: ”Кыпӧдчы да шыбитчы саридзас”, лоӧ тадзи. Сӧмын мед став сьӧлӧмнас майшасьтӧг эскас, мый шуӧмыс инас.

²⁴ Та вӧсна висьтала тіянлы: мый коранныд кевмысиганыд, эскӧй, мый сійӧ лоӧ тіянлы, и лоӧ тадзи.

²⁵ Кевмысьны сувтіганыд прӧститӧй тіян водзын мыжмӧмаӧс, медым енэжвыв Батьныд прӧститас тіянлысь мыжъяснытӧ.

²⁶ Онӧ кӧ прӧститӧй, сэки енэжвыв Батьныд тіянлысь мыжъяснытӧ оз прӧстит».

Исуслӧн вын йылысь юасьӧм

²⁷ Найӧ бара локтісны Ерусалимӧ. Кор Исус ветлӧдліс крамӧд, Сы дінӧ матыстчисны аркирейяс, Индӧдӧ велӧдысьяс да юрнуӧдысьяс.

²⁸ Найӧ юалісны: «Кутшӧм вынӧн Тэ ставсӧ тайӧс вӧчан? Коді Тэнӧ пуктіс тайӧс вӧчнысӧ?»

²⁹ Исус воча шуис: «Ме тшӧтш тіянлысь ӧтитор юала. Вочавидзанныд кӧ, висьтала, кутшӧм вынӧн ставсӧ тайӧс вӧча.

³⁰ Иоанлӧн пыртӧмыс вӧлі Енсянь али мортсянь? Вочавидзӧй Меным».

³¹ Найӧ ас костаныс сёрнитісны: «Шуам кӧ: ”Енсянь”, Сійӧ шуас: ”Мыйла сылы энӧ эскӧй?”

³² Гашкӧ, шуам: ”Мортсянь”?» Но найӧ полісны йӧзсьыс, ӧд Иоанӧс ставныс збыльысь пророкӧ пуктісны.

³³ Найӧ вочавидзисны: «Огӧ тӧдӧй». Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».