Малакий 4 - Коми Библия 2023

¹ Сійӧ луныс воас ыпъялысь би моз, идзасӧс моз сотас вылӧ кыпӧдчысьясӧс, сотас лёк вӧчысьясӧс, – висьталӧ Господь Саваоф, – оз коль наысь весиг вуж ни ув.

² А тіянлы, Меысь полысьяслы, петас веськыдлуныслӧн шонді, и сылӧн югӧр улын ті бурданныд. Ті петанныд да понданныд чеччавны видз вылӧ лэдзӧм куканьяс моз.

³ Менам индӧм лунӧ ті понданныд талявны лёк вӧчысьясӧс, бус чирӧдз ниртанныд найӧс кок уланыд, – висьталӧ Господь Саваоф.

Илля пророк йылысь кӧсйысьӧм

⁴ Энӧ вунӧдӧй Менам Мӧисей кесйӧглысь Индӧдсӧ, мый Ме сеті сылы Хорив керӧсын, энӧ вунӧдӧй тшӧктӧмъяссӧ, мый Ме сеті став Израиль войтырлы.

⁵ Господьлӧн ыджыд да повзьӧдана луныс вотӧдз Ме ыста тіян дінӧ Илля пророкӧс.

⁶ Сійӧ бергӧдас батьяслысь сьӧлӧмсӧ пиянлань, пиянлысь сьӧлӧмсӧ – батьяслань, медым локтігӧн Ме эг ёр да эг бырӧд мусӧ.