Малакий 2 - Коми Библия 2023

Попъясӧс ӧлӧдӧм

¹ Попъяс, тайӧ ӧлӧдӧмыс тіянлы.

² – Ті кӧ онӧ кутӧй кывзысьны Менсьым, онӧ кӧ кутӧй сьӧлӧмсяньныд пыдди пуктыны Менӧ, – висьталӧ Господь Саваоф, – Ме ыста тіян вылӧ ёрӧм, бурсиӧм пыдди ёра тіянӧс. Но Ме тіянӧс ёри нин, ӧд ті онӧ сьӧлӧмсяньныд пыдди пуктӧй Менӧ.

³ Тіян кесъялӧмлы Ме пукта пом, гажӧдчан лунӧ ваян висьныдлысь сітсӧ Ме шыблала чужӧманыд, сэсся тіянӧс сітыскӧд шыбитасны ортсӧ.

⁴ – Сэки ті гӧгӧрвоанныд, мый тайӧ вӧлі Менам ӧлӧдӧм, медым Левий чужанкотыркӧд кӧрталӧм йитӧдӧй вына коли, – висьталӧ Господь Саваоф. –

⁵ Менам йитӧдӧй накӧд вӧлі татшӧм: Ме сеті налы олӧм да лӧньлун, а найӧ пыдди пуктісны Менӧ да вежавидзисны Меысь.

⁶ Найӧ велӧдісны збыляс, налӧн вомысь эз петавлы ылӧгыс. Найӧ олісны Ме водзын веськыда да кывзысьӧмӧн, унаӧс найӧ бергӧдісны мыж вӧчӧмысь.

⁷ Поплӧн вомысь мед петас Ен йылысь тӧдӧмлуныс, сысянь йӧзыс виччысьӧны велӧдӧмсӧ, сійӧ ӧд Господь Саваофсянь юӧр вайысьыс.

⁸ – Но ті кежинныд тіянлы индӧм туй вылысь, тіян велӧдӧм вӧсна унаӧн крукасисны. Ті торкинныд Менсьым йитӧдӧс, мый Ме кӧрталі Левийкӧд, – висьталӧ Господь Саваоф. –

⁹ Ме янӧда тіянӧс, став войтырыс кутас увтыртны тіянӧс, ӧд ті онӧ ветлӧй Менам туйӧд, а велӧдіганыд кӧсъянныд шогмыны мортлы.

Мукӧд войтырысь гӧтырӧс босьтӧм йылысь да гӧтырӧс эновтӧм йылысь ӧлӧдӧм

¹⁰ Абу-ӧ миян ставнымлӧн ӧти Бать? Эз-ӧ ӧти Ен вӧч миянӧс ставнымӧс? Мыйла, сідзкӧ, ми пӧръясьӧмӧн олам ӧта-мӧдкӧд, пежалам йитӧдсӧ, мый Енмыс кӧрталіс батьяснымкӧд?

¹¹ Иуда войтыр пӧръясьӧ, Израиль муын да Ерусалим карын вӧчсьӧны зывӧкторъяс. Господь радейтӧ Ассьыс вежаинсӧ, но Иуда войтыр пежаліс Сылысь вежаинсӧ, ӧтувтчис идолкӧд.

¹² Господь мед бырӧдас Яков рӧдысь быдӧнӧс, коді дорйӧ татшӧмтор вӧчысьӧс. Мед оз сюр некод, коді эськӧ сы вӧсна вись ваяс Господь Саваофлы.

¹³ Со мый ті нӧшта вӧчанныд: кыз синваӧн бӧрданныд Господьлӧн висьпуктанін дорын, сыркъялӧмӧн бӧрданныд, ӧд Господь бергӧдчис тіян вись дорысь, эз сибӧд вайӧмторнытӧ.

¹⁴ Ті юаланныд: «Мый понда оз сибӧд?» Сыысь, мый тэ эновтін том кадӧ босьтӧм гӧтыртӧ, кодкӧд тэнад вӧлі йитӧд. Ӧні тэ да гӧтырыд костын мыжалысьыс – Господь.

¹⁵ Тадзи оз вӧч сійӧ, код пытшкын Енлӧн лолыс. Мый сійӧ корсьӧ? Медым вӧліны Енсянь чужысьяс. Сідзкӧ, видзӧй ловнытӧ, энӧ эновтӧй том кадӧ босьтӧм гӧтырнытӧ.

¹⁶ Ме мустӧмта, кор эновтӧны, – шуӧ Господь, Израильлӧн Ен. Гӧтырсӧ эновтысь мыжмӧ вир кисьтысь моз, – висьталӧ Господь Саваоф. – Та вӧсна видзӧй ловнытӧ, энӧ эновтӧй гӧтырнытӧ.

Енлӧн мыждан луныс регыд воас

¹⁷ Ті дӧзмӧданныд Господьӧс асланыд сёрниӧн и та дырйи юасянныд, мыйӧн пӧ ми Сійӧс дӧзмӧдам. Дӧзмӧданныд сійӧн, мый шуаланныд, лёк вӧчысь пӧ шогмана Господьлы, татшӧм мортыс пӧ муса Сылы. Нӧшта дӧзмӧданныд сійӧн, мый шуаланныд, кӧні пӧ веськыда мыждысь Енмыс.