Лыд 9 - Коми Библия 2023

Ыджыд лун йылысь тшӧктӧм

¹ Египетысь петӧм бӧрын мӧд вонас медводдза тӧлысьӧ Синай овтӧминын Господь шуис Мӧисейлы:

² «Израиль пиян мед пасъясны Ыджыд лунсӧ индӧм кадӧ.

³ Пасйӧй сійӧс тайӧ тӧлысьнас дас нёльӧд лун рытсянь мӧд рытӧдз. Ставсӧ вӧчӧй Ыджыд лун йылысь индӧд-тшӧктӧмъяс серти».

⁴ Мӧисей тшӧктіс Израиль пиянлы пасйыны Ыджыд лун.

⁵ Медводдза тӧлысьлӧн дас нёльӧд лун рытсянь мӧд рытӧдз Синай овтӧминын найӧ пасйисны Ыджыд лун. Ставсӧ вӧчисны сідзи, кыдзи Господь тшӧктіс Мӧисейлы.

⁶ Израиль войтыр пӧвстын вӧліны йӧз, кодъяс морт шой дінӧ инмӧдчылӧм вӧсна вӧліны пежӧсь и индӧм лунӧ эз вермыны пасйыны Ыджыд лунсӧ. Найӧ локтісны Мӧисей да Аарон дінӧ

⁷ да шуисны: «Морт шой дінӧ инмӧдчылӧмысь ми лоим пежӧсь. Миянлы ӧмӧй оз позь индӧм кадӧ Израиль войтыркӧд вись вайны Господьлы?»

⁸ Мӧисей налы шуис: «Виччысьӧй. Ме ветла юавны Господьлысь, мый Сійӧ шуас тіян йылысь».

⁹ Господь шуис Мӧисейлы:

¹⁰ «Висьтав Израиль пиянлы: коді тіян пӧвстысь либӧ тіянсянь чужысьясысь пежасяс шой дінӧ инмӧдчылӧм вӧсна либӧ коді лоас ылі туйын, сійӧ мед тшӧтш пасйӧ Господьлы сиӧм Ыджыд лун.

¹¹ Мед пасъясны сійӧс мӧд тӧлысьлӧн дас нёльӧд лун рытсянь мӧд рытӧдз. Мед сёясны ыджыдлунся баляӧс шомтӧм няньӧн да курыд турунъясӧн.

¹² Яйсӧ асылӧдзыс мед оз кольны, и лысӧ мед оз чегъявны. Ставсӧ мед вӧчӧны сідзи, кыдзи тшӧктӧма Ыджыд лун йылысь.

¹³ Коді сӧстӧм да абу [ылі] туйын, но Ыджыд лунсӧ оз пасйы да индӧм кадӧ оз вай Господьлы висьсӧ, сійӧс лоӧ бырӧдӧма аслас войтыр пӧвстысь. Сійӧ мыжа.

¹⁴ Овмӧдчас кӧ тіян ордӧ йӧз муысь локтысь, сылы тшӧтш колӧ пасйыны Господьлы сиӧм Ыджыд лун, кыдзи тшӧктӧма-индӧма Ыджыд лун йылысь. Вужвойтырлы да йӧз муысь локтысьяслы тшӧктӧмыс ӧти».

Израиль пиянӧс нуӧдысь кымӧр

¹⁵ Сійӧ лунӧ, кор вӧлі сувтӧдӧма вежа чомсӧ, сійӧс вевттис кымӧр. Рытсяньыс асылӧдзыс вежа чом весьтын ӧзъяліс мыйкӧ би сяма.

¹⁶ Тадзи пыр вӧлі: [луннас] вежа чомсӧ вевттис кымӧр, а войнас ӧзъяліс мыйкӧ би сяма.

¹⁷ Кор кымӧрыс кыпӧдчыліс вежа чом весьтысь, Израиль пиян петлісны туйӧ. А кор кымӧрыс сувтліс, Израиль пиян тшӧтш сувтлісны чомъяснаныс.

¹⁸ Господьлӧн тшӧктӧм серти Израиль пиян мӧдӧдчылісны туйӧ, и Господьлӧн тшӧктӧм серти сувтлісны. Сійӧ кад чӧжыс, кор кымӧрыс сулаліс вежа чом весьтын, найӧ тшӧтш сулалісны.

¹⁹ Кымӧрыс кӧ дыр сулаліс вежа чом весьтын, Израиль пиян Господьлысь кывзысьӧмӧн тшӧтш сулалісны.

²⁰ Кымӧрыс кӧ сӧмын кымынкӧ лун сулаліс вежа чом весьтын, сэки Господьлӧн тшӧктӧм серти войтырыс сувтліс, а сэсся Господьлӧн тшӧктӧм серти мӧдӧдчыліс туйӧ.

²¹ Кымӧрыс кӧ рытсяньыс асылӧдзыс сулаліс да асывнас кыпӧдчыліс, войтырыс мӧдӧдчыліс туйӧ. Сулаліс кӧ лун да вой, а сэсся кыпӧдчыліс, войтырыс тшӧтш мӧдӧдчыліс туйӧ.

²² Кымӧрыс кӧ вежа чом весьтын сулавліс кык лун, тӧлысь либӧ дырджык, сэки Израиль пиян туйӧ эз петлыны. Мыйӧн кыпӧдчыліс кымӧрыс, сэки войтырыс мӧдӧдчыліс туйӧ.

²³ Господьлӧн тшӧктӧм серти войтырыс сувтліс и Господьлӧн тшӧктӧм серти мӧдӧдчыліс туйӧ. Найӧ кывзысисны Господьлысь, вӧчисны, кыдзи Господь тшӧктіс Мӧисейлы.