Лыд 8 - Коми Библия 2023

Левитъяс йылысь индӧд

¹ Господь шуис Мӧисейлы:

² «Тшӧкты Ааронлы пуктавны бикок вылӧ би дозъяссӧ сідз, мый сизимнан дозсянь югӧрыс усяс бикок водзвылӧ».

³ Аарон тадзи и вӧчис. Сійӧ пукталіс би дозъяссӧ сідз, мый югӧрыс усис бикок водзвылас, кыдзи Господь тшӧктіс Мӧисейлы.

⁴ Засяньыс дзоридзьясӧдзыс бикоксӧ вӧлі дорӧма зарниысь серлӧдлӧмӧн. Бикоксӧ вӧлі вӧчӧма сідзи, кыдзи Господь петкӧдліс Мӧисейлы.

⁵ Господь шуис Мӧисейлы:

⁶ «Израиль пиян пӧвстысь торйӧд левитъясӧс да сӧстӧммӧд найӧс.

⁷ Рез найӧс сӧстӧммӧдчан ваӧн мыжысь сӧстӧммӧдӧм могысь. Найӧ мед шырасны юрсисӧ, тошсӧ, быдлаысь ловгӧнсӧ да мыськаласны паськӧмнысӧ. Та бӧрын найӧ лоӧны сӧстӧмӧсь.

⁸ Найӧ мед вайӧдасны ӧшкӧс, и ӧшкӧд мед ваясны олив выйӧн гудралӧм шобді пызь, мый лоӧ нянь вись пыдди. А тэ вайӧд мӧд ӧшкӧс, сійӧ лоӧ мыжысь вись пыдди.

⁹ Сувтӧд левитъясӧс вежа чом водзӧ и чукӧрт сэтчӧ Израиль войтырӧс.

¹⁰ Левитъясӧс Господь водзӧ сувтӧдӧм бӧрын Израиль пиян мед пуктыласны кинысӧ на вылӧ.

¹¹ Аарон мед сиас левитъясӧс Господьлы Израиль пиянсянь вайӧм козинӧс моз, медым левитъяс кесъяласны Господьлы.

¹² Левитъяс мед пуктыласны кинысӧ ӧшъяслы юр выланыс. Сэсся вай ӧшъясӧс Господьлы вись пыдди, ӧтисӧ – мыжысь вись пыдди, мӧдсӧ – сотан вись пыдди. Тадзи лоӧ вештӧма левитъяслысь мыжсӧ.

¹³ Сувтӧд левитъясӧс Аарон да сылӧн пияныс водзӧ да си найӧс Господьлы.

¹⁴ Тадзи тэ торйӧдан левитъясӧс Израиль пиян пӧвстысь, и найӧ лоӧны Менам.

¹⁵ Та бӧрын левитъяс мед кесъяласны вежа чом бердын, ӧд тэ сӧстӧммӧдін найӧс да сиин Меным. Найӧс козьналӧма Меным Израиль войтырлӧн

¹⁶ медводдза чужысь пиян пыдди. Израильса аньяслӧн медводдза чужысь пиян пыдди Ме инді левитъясӧс кесъявны Меным.

¹⁷ Израиль пиянлӧн да налӧн ыж-мӧслӧн медводдза чужысьясыс лоӧны Менам. Ме вежӧді-торйӧді найӧс Аслым сійӧ лунӧ, кор Египет муын вии став медводдза чужысьсӧ.

¹⁸ Ме босьта левитъясӧс Израиль войтырлӧн медводдза чужысь пиян пыдди

¹⁹ да сета найӧс Ааронлы да сылӧн пияныслы. Левитъяс мед кесъяласны вежа чомйын Израиль пиян пыдди налысь мыжсӧ вештӧм могысь. Тадзи вежа чом дорӧ матыстчиганыс Израиль пиянӧс оз су бырӧдӧмыс».

²⁰ Мӧисей, Аарон да став Израиль войтырыс вӧчисны сідзи, кыдзи Господь тшӧктіс Мӧисейлы левитъяс йылысь.

²¹ Левитъяс сӧстӧммӧдчисны да мыськалісны паськӧмнысӧ. Аарон сиис найӧс Господьлы да вештіс налысь мыжсӧ, медым сӧстӧммӧдны найӧс.

²² Та бӧрын левитъяс пондісны кесъявны вежа чомйын Ааронлӧн да пияныслӧн веськӧдлӧм улын. Ставсӧ вӧлі вӧчӧма сідзи, кыдзи Господь тшӧктіс Мӧисейлы левитъяс йылысь.

²³ Господь шуис Мӧисейлы:

²⁴ «Тайӧ индӧдыс левитъяс йылысь. Кызь вит арӧса да ыджыдджык арлыда левитъяс мед уджаласны вежа чом бердын.

²⁵ А ветымын арӧс тырӧм бӧрын мед дугдасны кесъявнысӧ.

²⁶ Найӧ вермасны отсасьны вокъясыслы видзны вежа чомсӧ, но кесъявнысӧ налы оз позь. Тадзи тэ лӧсьӧд левитъяслысь кесъялӧмсӧ».