Лыд 6 - Коми Библия 2023

Назорейлы тшӧктӧмъяс

¹ Господь шуис Мӧисейлы:

² «Висьтав Израиль пиянлы: айлов либӧ ань кӧ кыв сетас, мый сиас асьсӧ Господьлы – лоас назорейӧн,

³ сэки сылы оз позь юны вина-сур да виноградысь юантор. Сылы оз позь сёйны нинӧм, мый кӧтӧдӧма винаысь вӧчӧм уксусӧн. Оз позь сёйны косьтӧм да выль воӧм виноград вотӧс.

⁴ Назореялан кад чӧжыс сылы оз позь сёйны [да юны] виноград вотӧсысь вӧчӧмтор, оз позь сёйны весиг тусьсӧ ни кучиксӧ.

⁵ Кад чӧжыс, мый кежлӧ кыв сетіс Господь водзын назореявнысӧ, сійӧ мед оз шырсьы. Сійӧ вежа, юрсиыс мед быдмӧ.

⁶ Назореялан кад чӧжыс, мый кежлӧ сиис асьсӧ Господьлы, сылы оз позь матыстчыны шой дінӧ.

⁷ Весиг батьыс либӧ мамыс, вокыс либӧ чойыс кӧ кулас, сылы оз позь пежавны асьсӧ. Ӧд сылӧн юр вылын Енлы асьсӧ сетан пас.

⁸ Назореялан кад чӧжыс сійӧ вежа, торйӧдӧма Господьлы.

⁹ Виччысьтӧг кӧ назорейкӧд орччӧн кодкӧ кувсяс, и та вӧсна пежасяс назорейлӧн юрсиыс, сэки сійӧ мед сӧстӧммӧдчан лунӧ, мӧд ногӧн кӧ, пежасьӧмсянь сизимӧд лунӧ, юрсисӧ шырас.

¹⁰ А кӧкъямысӧд луннас мед ваяс поплы кык гулюӧс либӧ кык гулюпиӧс вежа чом пыранін дорӧ.

¹¹ Ӧти гулюсӧ поп мед ваяс мыжысь вись пыдди, а мӧдсӧ – сотан вись пыдди. Тадзи поп вештас сылысь мыжсӧ, сӧстӧммӧдас сійӧс шойӧ инмӧдчылӧм вӧсна пежасьӧмсьыс. Тайӧ лунӧ назорей выльысь вежӧдас ассьыс юрсӧ.

¹² Аслас кыв сетӧм серти сылы колӧ выльысь сины асьсӧ Господьлы назореялан лунъясыс кежлӧ. Мыж вештан вись пыдди сылы колӧ вайны арӧса межӧс. Пежасьӧм вӧсна сылӧн назореялан лунъясыс, мый вӧліны таӧдз, оз лыддьыссьыны.

¹³ Назореялан кад йылысь индӧдыс татшӧм. Кор назореялан лунъясыс помасясны, назорейӧс колӧ вайӧдны вежа чом пыранін дорӧ.

¹⁴ Сійӧ мед ваяс Господьлы сотан вись пыдди дзоньвидза арӧса межӧс, мыжысь вись пыдди дзоньвидза арӧса ыжӧс да бурасян вись пыдди дзоньвидза межӧс,

¹⁵ тшӧтш нянь вись да вина вись, мый колӧ вайны тайӧ висьясыскӧд. Нӧшта куд тыр мед ваяс шобді пызьысь пӧжалӧм шомтӧм нянь, олив выйӧн гудралӧм нянь да олив выйӧн мавтӧм шомтӧм сӧчӧн.

¹⁶ Тайӧ вайӧмторъяссӧ поп мед ваяс Господь водзӧ. Висьпуктанін вылын мед ваяс мыжысь вись да сотан вись.

¹⁷ Бурасян вись пыдди мед ваяс Господьлы меж да сыкӧд тшӧтш куд тыр шомтӧм нянь. Нӧшта мед ваяс нянь вись да вина вись.

¹⁸ Назорей мед шырас вежа чом пыранін дорын ассьыс юрсисӧ – назореялан пассӧ, сэсся мед шыбитас биӧ, кӧні сотӧны бурасян вись.

¹⁹ Та бӧрын поп мед босьтас кудсьыс ӧти шомтӧм нянь да ӧти шомтӧм сӧчӧн да пуктас межлӧн пуӧм пуліпомкӧд назорейлы киас.

²⁰ Ставсӧ тайӧс поп мед ваяс Господь водзын пыркӧдан вись пыдди. Тайӧ вежаторйыс вичмас поплы задвыв яйкӧд да пыркӧдӧмӧн вайӧм морӧсвыв яйкӧд. Та бӧрти назорейлы позьӧ юны вина.

²¹ Тайӧ индӧдыс назорей йылысь, назореялӧмысь Господьлы ваян висьяс йылысь да нӧшта висьяс йылысь, мыйта назорей вермас вайны. Сылы колӧ ставсӧ вӧчны аслас кыв сетӧмыс серти да назореялӧм йылысь индӧдыс серти».

Израиль войтырӧс бурсиӧм

²² Господь шуис Мӧисейлы:

²³ «Висьтав Ааронлы да сылӧн пияныслы, мый Израиль войтырӧс бурсиигӧн колӧ шуны татшӧм кывъяс:

²⁴ Господь мед бурсиас тэнӧ да видзас тэнӧ!

²⁵ Господь мед видзӧдлас тэ вылӧ югыд чужӧмбаннас да бурсьӧлӧмтчас тэ дінӧ!

²⁶ Господь мед бергӧдас Ассьыс чужӧмбансӧ тэлань да сетас тэныд лӧнь олӧм!

²⁷ Тадзи Менам нимсянь Аарон да сылӧн пияныс мед бурсиасны Израиль войтырӧс, и Ме [Господь] бурсиа найӧс».