Лыд 4 - Коми Библия 2023

Левитъяслӧн кывкутӧм

¹ Господь шуис Мӧисейлы да Ааронлы:

² «Гижав Левий чужанкотырысь Каафлысь пиянсӧ рӧд да котыр сертиныс,

³ комын арӧссянь ветымын арӧсӧдз найӧс, кодъяс вермасны уджавны вежа чомйын.

⁴ Кааф пиян мед кывкутасны вежа чомйын вежасьыс-вежаторъяс вӧсна.

⁵ Израиль войтырлӧн туйӧ петтӧдзыс Аарон пияныскӧд мед пырасны вежа чомйӧ, босьтасны ӧшӧдӧм дӧрасӧ да вевттясны сыӧн Йитӧд кудсӧ.

⁶ Йитӧд кудсӧ нӧшта мед вевттясны лӧз рӧма кучик вевттьӧдӧн, а сэсся тупкасны гӧрдовлӧз вурун вевттьӧдӧн. Куд кольчаясас мед сюясны потшъяссӧ.

⁷ Вежа няньлы пызансӧ мед вевттясны гӧрдовлӧз вурун дӧраӧн, сэсся сы вылӧ мед пукталасны дозмукъяс, тасьтіяс, кӧшъяс да вина вись ваян дозъяс. Вежа няньыс мед пыр лоас пызан вылас.

⁸ Ставсӧ тайӧс мед вевттясны югыдгӧрд дӧраӧн, а дӧрасӧ – лӧз рӧма кучик вевттьӧдӧн. Сэсся пызан кольчаясас мед сюясны потшъяссӧ.

⁹ Аарон пияныскӧд мед босьтасны гӧрдовлӧз вурун дӧра да вевттясны сыӧн бикоксӧ да сылысь би дозъяссӧ, чепӧлясӧ, пӧим ворсӧ да вый дозъяссӧ.

¹⁰ Бикоксӧ став кӧлуйнас мед гартыштасны лӧз рӧма кучик вевттьӧдӧ да пуктасны новлӧдлан потш вылӧ.

¹¹ Зарни висьпуктанінсӧ мед вевттясны гӧрдовлӧз вурун дӧраӧн, а дӧрасӧ – лӧз рӧма кучик вевттьӧдӧн. Сэсся висьпуктанін кольчаясас мед сюясны потшъяссӧ.

¹² Вежаинса став кесъялан дозмук-кӧлуйсӧ мед гартыштасны гӧрдовлӧз вурун дӧраӧ да вевттясны лӧз рӧма кучик вевттьӧдӧн, сэсся пуктасны новлӧдлан потш вылӧ.

¹³ Висьпуктанінсӧ пӧимысь весалӧм бӧрын мед вевттясны пемыдгӧрд дӧраӧн.

¹⁴ Сэсся сы вылӧ мед пукталасны висьпуктанінса став дозмук-кӧлуйсӧ: ӧгыр пӧртъяс, яй бергӧдлан вилаяс, пӧим куралан зыръяс да вир резан тасьтіяс. Ставсӧ тайӧс мед вевттясны лӧз рӧма кучик вевттьӧдӧн. Сэсся висьпуктанін кольчаясас мед сюясны потшъяссӧ. [Мед босьтасны пемыдгӧрд дӧра да вевттясны сыӧн мыссян доз да сылысь коксӧ, нӧшта мед вевттясны ставсӧ лӧз рӧма кучик вевттьӧдӧн да пуктасны новлӧдлан потшыс вылӧ.]

¹⁵ Израиль войтырлӧн туйӧ петтӧдзыс Аарон пияныскӧд мед вевттяласны став вежа дозмук-кӧлуйсӧ. Сӧмын та бӧрын вермасны матыстчыны Кааф пиян, медым нуны вежа дозмук-кӧлуйсӧ. Найӧ кӧ инмӧдчасны вевттьытӧм вежа дозмук-кӧлуй дінӧ, куласны. Вежа чомйын кесъялан дозмук-кӧлуйсӧ колӧ новлӧдлыны Кааф пиянлы.

¹⁶ Аарон поплӧн Элазар пиыс мед кывкутас би дозйӧ кисьтан вый да чӧскыд дука тшынӧдчантор вӧсна, быдлунся нянь вись да мавтыштан вый вӧсна. Сійӧ мед кывкутас вежа чом вӧсна да вежаинса став дозмук-кӧлуй вӧсна».

¹⁷ Господь шуис Мӧисейлы да Ааронлы:

¹⁸ «Видзӧдӧй, медым Кааф рӧдыс эз быр левитъяс лыдысь.

¹⁹ Аарон да сылӧн пияныс мед индасны Кааф пиянлы, кодлы мый колӧ вӧчны да мый новлӧдлыны. Вежасьыс-вежаинлань матыстчигӧн Кааф рӧдыс медым эз кув, а ловйӧн колис,

²⁰ найӧ мед оз матыстчыны да оз видзӧдны, кыдзи вевттялӧны вежа дозмук-кӧлуйсӧ. Ӧд найӧ кӧ аддзыласны вежа дозмук-кӧлуйсӧ, куласны».

²¹ Господь шуис Мӧисейлы:

²² «Гижав тшӧтш Гирсонлысь пиянсӧ рӧд да котыр сертиныс,

²³ комын арӧссянь ветымын арӧсӧдз найӧс, кодъяс вермасны уджавны вежа чомйын.

²⁴ Со мый колӧ вӧчны да новлӧдлыны Гирсон рӧдлы.

²⁵ Найӧ мед новлӧдласны вежа чомлысь дӧраяссӧ, вевттьӧдсӧ, лӧз рӧма кучикысь вӧчӧм вылысса вевттьӧдсӧ, вежа чом пыранінӧ ӧшӧдан дӧрасӧ,

²⁶ висьпуктанін да вежа чом йӧр тупкан дӧраяссӧ, йӧр пыранінӧ ӧшӧдан дӧрасӧ, дӧраяслысь гезъяссӧ да став кӧлуйсӧ. Найӧ мед тӧждысясны вежа чом разялӧм-сувтӧдӧм вӧсна.

²⁷ Ааронлӧн да пияныслӧн тшӧктӧм серти Гирсон пиян мед кесъяласны да тӧждысясны вежаинса став кӧлуйыс вӧсна, мый налы колӧ новлӧдлыны.

²⁸ Татшӧм удж индӧма Гирсон рӧдъяслы. На бӧрся мед видзӧдас Аарон поплӧн Итамар пиыс.

²⁹ Гижав Мерарилысь пиянсӧ рӧд да котыр сертиныс,

³⁰ комын арӧссянь ветымын арӧсӧдз найӧс, кодъяс вермасны уджавны вежа чомйын.

³¹ Налӧн уджныс – новлӧдлыны вежа чомлысь брусъяссӧ да потшъяссӧ, сюръяяссӧ да налысь подувъяссӧ,

³² йӧр гӧгӧр сувтӧдан сюръяяс да налысь подувъяссӧ, майӧгъяссӧ, гезъяссӧ да став кӧлуйсӧ. Найӧ мед тӧждысясны вежа чом разялӧм-сувтӧдӧм вӧсна. Индӧй, кодлы мый колӧ новлӧдлыны.

³³ Татшӧм удж индӧма Мерари рӧдъяслы. На бӧрся мед видзӧдас Аарон поплӧн Итамар пиыс».

³⁴ Мӧисей, Аарон да войтырлӧн юралысьясыс арталісны-гижалісны Каафлысь пиянсӧ рӧд да котыр сертиныс,

³⁵ комын арӧссянь ветымын арӧсӧдз найӧс, кодъяс вермисны уджавны вежа чомйын.

³⁶ Налӧн лыдыс вӧлі кык сюрс сизимсё ветымын морт.

³⁷ Та мында айулов кесъяліс вежа чомйын Кааф рӧдысь. Мӧисей да Аарон арталісны-гижалісны найӧс, кыдзи Господь тшӧктіс Мӧисей пыр.

³⁸ Гирсонлысь пиянсӧ вӧлі арталӧма-гижалӧма рӧд да котыр сертиныс,

³⁹ комын арӧссянь ветымын арӧсӧдз найӧс, кодъяс вермисны уджавны вежа чомйын.

⁴⁰ Налӧн лыдыс вӧлі кык сюрс квайтсё комын морт.

⁴¹ Та мында айулов кесъяліс вежа чомйын Гирсон рӧдысь. Господьлӧн тшӧктӧм серти найӧс арталісны-гижалісны Мӧисей да Аарон.

⁴² Мерарилысь пиянсӧ вӧлі арталӧма-гижалӧма рӧд да котыр сертиныс,

⁴³ комын арӧссянь ветымын арӧсӧдз найӧс, кодъяс вермисны уджавны вежа чомйын.

⁴⁴ Налӧн лыдыс вӧлі куим сюрс кыксё морт.

⁴⁵ Та мында айулов кесъяліс вежа чомйын Мерари рӧдысь. Мӧисей да Аарон арталісны-гижалісны найӧс, кыдзи Господь тшӧктіс Мӧисей пыр.

⁴⁶ Мӧисей, Аарон да израильса юралысьяс арталісны-гижалісны левитъясӧс рӧд да котыр сертиныс,

⁴⁷ комын арӧссянь ветымын арӧсӧдз найӧс, кодъяс вермисны кесъявны вежа чомйын да новлӧдлыны вежаинса дозмук-кӧлуйсӧ.

⁴⁸ Налӧн лыдыс вӧлі кӧкъямыс сюрс витсё кӧкъямысдас морт.

⁴⁹ Господьлӧн тшӧктӧм серти Мӧисей быдӧнлы индіс, кодлы мый вӧчны да кутшӧм кӧлуй новлӧдлыны. Левитъясӧс вӧлі арталӧма-гижалӧма, кыдзи Господь тшӧктіс Мӧисейлы.