Лыд 36 - Коми Библия 2023

Нывъяслы му сетӧм йылысь тшӧктӧм

¹ Ӧсип Манассей чужанкотырысь Галаад рӧдысь рӧдкутысьяс локтісны Мӧисей [да Элазар поп] дінӧ да Израиль войтырлӧн рӧдкутысьяс дінӧ. Галаад вӧлі Макирлӧн пи, Макир – Манассейлӧн. Локтысьяс шуисны:

² «Господь тшӧктіс тэныд, миян ыджыднымлы, пудъясьӧмӧн юклыны Израиль пиянлы му. Господь тшӧктіс тэныд сетны Салпаад вокнымлысь мусӧ сылӧн нывъясыслы.

³ Но найӧ кӧ петасны верӧс сайӧ Израиль войтырлӧн мӧд чужанкотырысь морт сайӧ, сэки чужанкотырнымлӧн муысь юкӧныс вуджас мӧд чужанкотырлы, а миянлы пудъясьӧмӧн вичмӧм муыс чинас.

⁴ И Израиль пиянлӧн тшупӧда воӧ татшӧм муыс вуджас чужанкотырлы, кытысь аньлӧн верӧсыс. Тадзи лоӧ босьтӧма му юкӧнсӧ миян чужанкотырлысь».

⁵ Господьлӧн тшӧктӧм серти Мӧисей шуис Израиль пиянлы: «Ӧсипсянь чужысьяс веськыда висьталӧны.

⁶ Со мый висьталӧ Господь Салпаадлӧн нывъяс йылысь. Найӧ вермасны петны верӧс сайӧ код сайӧ кӧсъясны, сӧмын верӧсъясыс мед вӧліны налӧн чужанкотырысь.

⁷ Сэки ӧти израильса чужанкотырлӧн муыс оз вудж мӧд чужанкотырлы. Израиль пиян пӧвстысь быдӧн мед кутчысяс аслас чужанкотырлӧн муӧ.

⁸ Израильса нывлы кӧ вуджас батьыслӧн муыс, нывлы колӧ петны верӧс сайӧ аслас чужанкотырысь морт сайӧ. Татшӧм ногӧн Израиль войтыр пӧвстысь быдӧн видзас аслас батьяссянь вуджӧм мусӧ.

⁹ Сідзкӧ, муыс мед оз вудж ӧти чужанкотырсянь мӧд чужанкотырлы. Израильса быд чужанкотыр мед видзӧ ассьыс мусӧ».

¹⁰ Салпаадлӧн нывъясыс вӧчисны, кыдзи Господь тшӧктіс Мӧисейлы.

¹¹ Махла, Тирза, Хогла, Милка да Ноа петісны верӧс сайӧ асланыс дядьяслӧн пияныс сайӧ.

¹² Верӧсъясныс вӧліны Ӧсип Манассей чужанкотырысь. Тадзи нывъяслӧн муыс коли батьныслӧн чужанкотырас.

¹³ Тайӧ индӧд-тшӧктӧмъяссӧ Господь сетіс Израиль пиянлы Мӧисей пыр Моав ласта вылын Йӧрдан ю бокын, Ериконлы воча.