Лыд 32 - Коми Библия 2023

Йӧрдан ю асыввылысь му юклӧм

¹ Рувим да Гад пиянлӧн вӧлі зэв уна ыж-мӧс. Найӧ аддзисны, мый Язер да Галаад муясын эмӧсь бур йирсянінъяс.

² Найӧ локтісны Мӧисей дінӧ, Элазар поп да войтырлӧн юралысьяс дінӧ да шуисны:

^3-4 «Господь пасьвартіс Атарот, Дивон, Язер, Нимра, Хешбон, Эляле, Севам, Нево да Веон каръяс, и мусӧ сетіс Израиль войтырлы. Сэтчӧс йирсянінъясыс бурӧсь, а миян, тэнад кесйӧгъяслӧн, уна ыж-мӧсным.

⁵ Ло бур сьӧлӧма да сет тайӧ мусӧ миянлы, аслад кесйӧгъяслы. Эн вуджӧд миянӧс Йӧрдан ю сайӧ».

⁶ Мӧисей шуис Гад да Рувим пиянлы: «Тіян вокъясныд мунасны тышӧ, а ті татчӧ кольччанныд?

⁷ Мыйла ті падмӧданныд Израиль пиянӧс Господьӧн сетӧм муӧ вуджӧмысь?

⁸ Тадзи вӧчлісны тшӧтш тіян батьясныд, кор ме мӧдӧді найӧс Кадеш-Варнисянь видзӧдлыны кӧсйысьӧм мусӧ.

⁹ Эшкол ковтысӧ ветлӧм да мусӧ видзӧдалӧм бӧрын найӧ кутісны падмӧдны Израиль пиянӧс Господьӧн сетӧм муӧ мунӧмысь.

¹⁰ Сійӧ лунӧ Господь скӧрмис да кыв сетӧмӧн шуис:

¹¹ ”Египетысь петӧм йӧзыс, кызь арӧса да ыджыдджык арлыда айулов, [кодъяс тӧдӧны бурсӧ и лёксӧ,] оз аддзыны мусӧ, мый йылысь Ме кыв сеті Ӧвраамлы, Исааклы да Яковлы. Ӧд тайӧ йӧзыс эз кывзысьны Менсьым.

¹² Сійӧ мусӧ аддзасны сӧмын Кенез рӧдысь Ефуннилӧн Калев пиыс да Навлӧн Исус пиыс, ӧд найӧ кывзысисны Господьлысь”.

¹³ Господь скӧрмис Израиль войтыр вылӧ да нелямын во чӧж нуӧдіс найӧс овтӧминті, кытчӧдз эз кувны ставныс, кодъяс вӧчисны Господь водзын шогмытӧмсӧ.

¹⁴ И ӧні ті, мыж вӧчысьяслӧн йылӧм, батьясныд моз кыпӧдчинныд паныд, медым Господьлӧн скӧрлуныс ёнджыка на ыпнитіс Израиль вылӧ!

¹⁵ Ті кӧ бергӧдчанныд Господьысь, Сійӧ бара войтырсӧ коляс овтӧминӧ, и тіян понда став тайӧ войтырыс бырас».

¹⁶ Гад да Рувим пиян матыстчисны Мӧисей дінӧ да шуисны: «Ми вӧчам татчӧ йӧръяс асланым ыжъяслы, кыпӧдам каръяс асланым челядьлы,

¹⁷ а асьным ми босьтам шыпуртнымӧс, медводдзаясӧн петам тышӧ да отсалам Израиль пиянлы воны налӧн муӧ. Но челядьным мед кольччасны татчӧ да оласны изкаръясын, медым татчӧс олысьяс эз вӧрӧдны найӧс.

¹⁸ Бӧрсӧ ми огӧ локтӧй, кытчӧдз Израиль пиян пӧвстысь быдӧн оз босьт ассьыс му юкӧнсӧ.

¹⁹ Йӧрдан ю сайысь ми огӧ босьтӧй накӧд мусӧ, ӧд миян му юкӧныс тані, Йӧрдан юсянь асыввылын».

²⁰ Мӧисей вочавидзис налы: «Ті кӧ вӧчанныд сідзи, кыдзи шуинныд, да Господь водзын босьтанныд шыпуртнытӧ, медым петны тышӧ,

²¹ сэсся ставныд мунанныд Йӧрдан ю сайӧ да Господь водзын тышкасянныд, кытчӧдз Господь оз пасьварт вӧрӧгсӧ Ас водзвывсьыс,

²² и сійӧ муыс лоӧ Господьлӧн кипод улын, сэки ті верманныд бӧр бергӧдчыны и онӧ лоӧй Господь водзын да Израиль водзын мыжаӧсь. Господь водзын тайӧ муыс лоӧ тіян.

²³ Но онӧ кӧ тадзи вӧчӧй, Господьлы паныд мыж вӧчанныд и мыж вӧснаныд асьныд кывкутанныд.

²⁴ Сідзкӧ, кыпӧдӧй аслыныд да ныв-пиныдлы каръяс, лӧсьӧдӧй ыжъясныдлы йӧръяс, но вӧчӧй и сійӧ, мый кӧсйысинныд».

²⁵ Гад да Рувим пиян шуисны Мӧисейлы: «Ми, тэнад кесйӧгъяс, вӧчам ыджыднымлӧн тшӧктӧм серти.

²⁶ Миян ныв-пиным, гӧтыръясным да став ыж-мӧсным кольччасны татчӧ, Галаад каръясӧ.

²⁷ А ми, тэнад кесйӧгъяс, Господь водзын босьтам шыпуртнымӧс да петам тышӧ, кыдзи тэ, миян ыджыдным, тшӧктан».

²⁸ Мӧисей шуис Элазар поплы, Нав Исуслы да израильса чужанкотыръяслӧн юралысьяслы:

²⁹ «Гад да Рувим пиян кӧ Господь водзын босьтасны шыпуртнысӧ, медым петны тышӧ, да мунасны тіянкӧд Йӧрдан ю сайӧ, и ті кӧ босьтанныд аслыныд Ханаан му, сэки сетӧй налы Галаад мусӧ.

³⁰ Но найӧ кӧ [Господь водзын] оз босьтны шыпуртнысӧ да оз петны тіянкӧд тышӧ, [сэки Ханаан муӧ ас водзвыланыд вуджӧдӧй налысь эмбур-кӧлуйсӧ, гӧтыръяссӧ да ыж-мӧссӧ,] налы тіянлы моз муыс вичмас Ханаан муысь».

³¹ Гад да Рувим пиян шуисны: «Кыдзи Господь тшӧктіс миянлы, тэнад кесйӧгъяслы, ми сідзи и вӧчам.

³² Господь водзын ми босьтам шыпуртнымӧс, медым петны тышӧ, да мунам Ханаан муӧ, но муыс мед вичмас миянлы Йӧрдан ю таладорысь».

³³ Сэки Мӧисей сетіс Гад да Рувим чужанкотыръяслы, а сідзжӧ Ӧсип Манассейлӧн джын чужанкотырлы аморейяслӧн Сигон ӧксылысь мусӧ да васанса Ог ӧксылысь мусӧ сэтчӧс каръяснас да нагӧгӧрса муяснас.

³⁴ Гад пиян выльысь лэптісны Дивон, Атарот, Ароэр,

³⁵ Атрот-Шофан, Язер, Иогбега,

³⁶ Бет-Нимра да Бет-Харан изкаръяс да ыжъясыслы йӧръяс.

³⁷ Рувим пиян выльысь лэптісны Хешбон, Эляле, Киръятаим

³⁸ да Сивма каръяс, нӧшта Нево да Ваал-Меон каръяс, кодъяслысь нимъяссӧ вежисны.

³⁹ Манассейлӧн Макир писянь чужысьяс пырисны Галаад муӧ, босьтісны сійӧс да вӧтлісны сэтысь аморейясӧс.

⁴⁰ Мӧисей сетіс Галаад му Макирсянь чужысьяслы, и найӧ овмӧдчисны сэтчӧ.

⁴¹ Манассей чужанкотырысь Яир рӧд босьтіс галаадса сиктъяс да нимтіс найӧс Яирлӧн сиктъясӧн.

⁴² Манассей чужанкотырысь Новах босьтіс Кенат кар да сыгӧгӧрса сиктъяс, нимтіс карсӧ аслас Новах нимӧн.