Лыд 31 - Коми Библия 2023

Мадиансаясӧс бырӧдӧм

¹ Господь шуис Мӧисейлы:

² «Израиль пиян вӧсна водзӧс перйы мадиансаяслысь. Та бӧрын тэ вуджан батьясыд дінӧ».

³ Мӧисей висьталіс войтырлы: «Тіян айуловныд босьтасны шыпуртнысӧ да петасны тышӧ. Господь вӧсна мед водзӧс перъясны мадиансаяслысь.

⁴ Израильса быд чужанкотырысь мӧдӧдӧй тышӧ сюрс тышкамортӧс».

⁵ Израильлӧн уна сюрс тышкайӧзысь торйӧдісны дас кык сюрс шыпуртаӧс – быд чужанкотырысь сюрс мортӧс.

⁶ Мӧисей мӧдӧдіс найӧс тыш вылӧ. Накӧд тшӧтш мӧдӧдіс [Ааронлӧн] Элазар поплысь Пинес писӧ. Аскӧдыс Пинес босьтіс вежаинса дозмук-кӧлуй да тутсан трубаяс.

⁷ Израильсаяс уськӧдчисны мадиансаяс вылӧ, кыдзи Господь тшӧктіс Мӧисейлы, да виисны став айуловсӧ.

⁸ Виӧмаяс пӧвстын вӧлі вит мадианса ӧксы: Эви, Рекем, Цур, Хур да Ревай. Израильсаяс виисны шыпуртӧн тшӧтш Веорлысь Валаам писӧ.

⁹ Мадиансаяслысь гӧтыръяссӧ да челядьсӧ израильсаяс босьтісны пленӧ, босьтісны тшӧтш налысь ыж-мӧссӧ да эмбур-кӧлуйсӧ,

¹⁰ а налысь кар-сиктнысӧ сотісны.

¹¹ Мырддьӧм эмбурсӧ, йӧзсӧ да ыж-мӧссӧ босьтісны аскӧдныс

¹² да вайисны Мӧисей дінӧ, Элазар поп да Израиль войтыр дінӧ, кодъяс чомъяснас вӧлі паськӧдчӧмаӧсь Моав ласта вылын Йӧрдан ю бокын, Ериконлы воча.

¹³ Мӧисей, Элазар поп да войтырлӧн став юралысьыс петісны сувтанін сайӧ, медым паныдавны тышкайӧзӧс.

¹⁴ Мӧисей скӧрмис сюрс да сё тышкамортӧн веськӧдлысьяс вылӧ, кодъяс воисны тышысь.

¹⁵ Сійӧ шуис налы: «Мыйла ті аньяссӧ ловйӧн колинныд?

¹⁶ Валаамлӧн туйдӧдӧм серти найӧ кежӧдісны Израиль пиянӧс Господьысь, бергӧдісны найӧс юрбитны Пеорлы. Та вӧсна Господьлысь войтырсӧ суис бырӧдӧм.

¹⁷ Сідзкӧ, виӧй став зонпоснисӧ. Виӧй тшӧтш аньясӧс, кодъяс узьлісны айуловкӧд.

¹⁸ А нывъяссӧ, кодъяс эз на узьлыны, ловйӧн кольӧй да босьтӧй аслыныд.

¹⁹ Асьныд ті сизим лун чӧж олӧй чомъяс сайын. Быдӧнлы, коді виис мортӧс либӧ инмӧдчыліс шой дінӧ, колӧ коймӧд луннас да сизимӧд луннас сӧстӧммӧдчыны. Тайӧ тшӧктӧмыс тіянлы и пленӧ босьтӧм йӧзныдлы.

²⁰ Сӧстӧммӧдӧй паськӧмнытӧ да ставсӧ, мый вӧчӧма кучикысь, кӧза вурунысь да пуысь».

²¹ Элазар поп шуис тышӧ ветлысьяслы: «Тайӧ тшӧктӧмсӧ Господь сетіс Мӧисейлы.

²² Зарни, эзысь, ыргӧн, кӧрт, озысь да свинеч –

²³ ставсӧ, мый позьӧ нуӧдны би пыр, сӧстӧммӧдӧм могысь нуӧдӧй би пыр. Нӧшта найӧс колӧ сӧстӧммӧдны ваӧн. А мый оз позь нуӧдны би пыр, сӧстӧммӧдӧй ваӧн.

²⁴ Сизимӧд луннас мыськалӧй паськӧмнытӧ, и лоанныд сӧстӧмӧсь, та бӧрын верманныд пырны чомъясӧ».

²⁵ Господь шуис Мӧисейлы:

²⁶ «Элазар попкӧд да рӧдкутысьяскӧд ӧтвылысь лыддьӧй, уна-ӧ мортӧс босьтінныд пленӧ да уна-ӧ ыж-мӧскӧс вайӧдінныд.

²⁷ Тышӧ ветлысьяс да тышӧ ветлытӧм войтыр костын шӧри юк шедӧдӧмторсӧ.

²⁸ Тышӧ ветлысьяслысь босьт Господьлы сетан юкӧнсӧ. Быд витсё мортысь босьт ӧтиӧс, быд витсё ӧш-мӧскысь – ӧтиӧс, быд витсё осёлысь – ӧтиӧс, быд витсё ыж-кӧзаысь – ӧтиӧс.

²⁹ Сет найӧс Элазар поплы. Тайӧ Господьлы козин.

³⁰ Шедӧдӧмторлысь мӧд джынсӧ колӧ сетны тышӧ ветлытӧм Израиль войтырлы. Быд ветымын мортысь босьт ӧтиӧс, быд ветымын ӧш-мӧскысь – ӧтиӧс, быд ветымын осёлысь – ӧтиӧс, быд ветымын ыж-кӧзаысь – ӧтиӧс да сет левитъяслы, Господьлӧн вежа чом бердын кесъялысьяслы».

³¹ Мӧисей да Элазар поп вӧчисны, кыдзи Господь тшӧктіс Мӧисейлы.

³² Тышӧ ветлысьяслӧн асланыс мырддялӧмторйысь ӧтдор вӧлі квайтсё сизимдас вит сюрс ыж-кӧза,

³³ сизимдас кык сюрс ӧш-мӧс,

³⁴ квайтымын ӧти сюрс осёл,

³⁵ комын кык сюрс ныв, кодъяс эз узьлыны айуловкӧд.

³⁶ Тышӧ ветлысьяслӧн пайыс, шедӧдӧмторлӧн джынйыс, вӧлі куимсё комын сизим сюрс витсё ыж-кӧза.

³⁷ На пӧвстысь Господьлы сетан юкӧныс вӧлі квайтсё сизимдас вит.

³⁸ Тышӧ ветлысьяслы вичмис комын квайт сюрс ӧш-мӧс, на пӧвстысь сизимдас кыкыс – Господьлы.

³⁹ Тышӧ ветлысьяслы вичмис комын сюрс витсё осёл, на пӧвстысь квайтымын ӧтиыс – Господьлы.

⁴⁰ Тышӧ ветлысьяслы вичмис дас квайт сюрс морт, на пӧвстысь комын кыкыс – Господьлы.

⁴¹ Господьлысь юкӧнсӧ Мӧисей сетіс Элазар поплы, кыдзи Господь тшӧктіс Мӧисейлы.

⁴² Шедӧдӧмторлӧн джынйыс, мый Мӧисей юкис Израиль войтырлы,

⁴³ вӧлі куимсё комын сизим сюрс витсё ыж-кӧза,

⁴⁴ комын квайт сюрс ӧш-мӧс,

⁴⁵ комын сюрс витсё осёл,

⁴⁶ дас квайт сюрс морт.

⁴⁷ Израиль войтырлы вичмӧдӧм быд ветымын мортысь да ветымын ыж-мӧскысь Мӧисей босьтіс ӧтиӧс да сетіс левитъяслы, Господьлӧн вежа чом бердын кесъялысьяслы, кыдзи Господь тшӧктіс Мӧисейлы.

⁴⁸ Мӧисей дорӧ локтісны сюрс да сё тышкамортӧн веськӧдлысьяс

⁴⁹ да шуисны: «Ми, тэнад кесйӧгъяс, арталім асланым киподувса тышкайӧзӧс. На пӧвстысь некод эз усь тышын.

⁵⁰ Господь водзын мыжнымӧс вештӧм могысь ми сетам Господьлы тышын шедӧдӧм зарни чепъяс, сойкытшъяс, чунькытшъяс, исергаяс да сикӧтшъяс».

⁵¹ Мӧисей да Элазар поп босьтісны налысь зарни мичмӧдчанторъяссӧ.

⁵² Сюрсӧн да сёӧн веськӧдлысьяс вайисны Господьлы козин пыдди дас квайт сюрс сизимсё ветымын сикель сьӧкта зарни.

⁵³ А налӧн киподувса тышкайӧзыс колисны аслыныс сійӧс, мый асьныс мырддялісны.

⁵⁴ Сюрсӧн да сёӧн веськӧдлысьяслысь босьтӧм зарнисӧ Мӧисей да Элазар поп вайисны вежа чомйӧ, медым зарниыс вӧлі Израиль пиян йылысь Господьлы казьтыланпасӧн.