Лыд 30 - Коми Библия 2023

Кыв сетӧм йылысь

¹ Мӧисей висьталіс Израиль пиянлы ставсӧ, мый тшӧктіс сылы Господь.

² Израильса чужанкотыръяслӧн юралысьяслы Мӧисей шуис: «Со мый тшӧктӧ Господь.

³ Коді кыв сетӧмӧн мыйкӧ кӧсйысяс Господьлы либӧ кӧсйысяс мыйыськӧ кутчысьны, сійӧ мед кывсӧ оз вудж, но мый шуис, мед вӧчас.

⁴ Бать ордас олігӧн на кӧ том ныв кыв сетӧмӧн мыйкӧ кӧсйысяс Господьлы либӧ кӧсйысяс мыйыськӧ кутчысьны,

⁵ и батьыс та йылысь тӧдмалас, но нинӧм оз шу, сэки нывлӧн кыв сетӧмыс да кутчысьны кӧсйысьӧмыс кольӧ вына.

⁶ Но та йылысь тӧдмалӧм бӧрын кӧ батьыс ӧлӧдас нывсӧ, сэки нывлӧн кыв сетӧмыс да кутчысьны кӧсйысьӧмыс вынсӧ воштӧ. Господь прӧститас нылӧс, ӧд сійӧс батьыс ӧлӧдіс.

⁷ Ныв кӧ петас верӧс сайӧ, но таӧдз сылӧн вӧлі кыв сетӧма либӧ мӧвпышттӧг кӧсйысьӧма,

⁸ и верӧсыс та йылысь тӧдмалас, но нинӧм оз шу, сэки нывдырся кыв сетӧмыс да кутчысьны кӧсйысьӧмыс кольӧ вына.

⁹ Но та йылысь тӧдмалӧм бӧрын кӧ верӧсыс ӧлӧдас гӧтырсӧ, сэки нывдырся кыв сетӧмыс да мӧвпышттӧг кутчысьны кӧсйысьӧмыс вынсӧ воштӧ. Господь прӧститас аньӧс.

¹⁰ Дӧвалӧн либӧ эновтӧм аньлӧн кыв сетӧмыс да мыйыськӧ кутчысьны кӧсйысьӧмыс кольӧ вына.

¹¹ Верӧса ань кӧ кыв сетас либӧ кыв сетӧмӧн кӧсйысяс мыйыськӧ кутчысьны,

¹² и верӧсыс та йылысь тӧдмалас, но нинӧм оз шу да оз ӧлӧд сійӧс, сэки аньлӧн кыв сетӧмыс да кутчысьны кӧсйысьӧмыс кольӧ вына.

¹³ Но та йылысь тӧдмалӧм бӧрын кӧ верӧсыс ӧлӧдас гӧтырсӧ, сэки аньлӧн кыв сетӧмыс да кутчысьны кӧсйысьӧмыс вынсӧ воштӧ. Господь прӧститас аньӧс.

¹⁴ Верӧсыс вермас вынсьӧдны либӧ дугӧдны гӧтырлысь раммӧдчӧм-видзалӧм йылысь кыв сетӧмсӧ да кӧсйысьӧмсӧ.

¹⁵ Верӧсыс кӧ сылы лунтырӧн нинӧм оз шу, сідзкӧ, вынсьӧдас сылысь кыв сетӧмсӧ да кӧсйысьӧмсӧ. Чӧв олӧмнас верӧсыс вынсьӧдас гӧтырлысь кӧсйысьӧмсӧ.

¹⁶ Верӧсыс кӧ сёрӧнджык дугӧдас гӧтырлысь кӧсйысьӧмсӧ, сэки ачыс нуас гӧтырыслысь мыжсӧ».

¹⁷ Тайӧ тшӧктӧмъяссӧ Господь сетіс Мӧисейлы верӧс да гӧтыр йылысь, а сідзжӧ бать да том ныв йылысь, коді олӧ батьыс ордын.