Лыд 28 - Коми Библия 2023

Быдлунся висьяс да гажӧдчан лунся висьяс

¹ Господь шуис Мӧисейлы:

² «Висьтав Израиль пиянлы: ас кадӧ вайӧй Меным чӧскыда ӧвтан висьяс, Менсьым няньӧс.

³ Быд лун вайӧй дзоньвидза арӧса кык баляӧс сотан вись пыдди.

⁴ Ӧти балясӧ вайӧй асывнас, мӧдсӧ – рытнас.

⁵ Нянь вись пыдди вайӧй пычкӧм олив выйӧн гудралӧм шобді пызь. Пызьыс мед вӧлі ефалӧн дасӧд юкӧныс, а выйыс мед вӧлі гинлӧн нёльӧд пайыс.

⁶ Тайӧ быдлунся сотан висьсӧ вайӧй Синай керӧсын моз. Тайӧ лоӧ Господьлы чӧскыда ӧвтан вись.

⁷ Ӧти баляыскӧд вайӧй кисьтан вись пыдди вина – гинлысь нёльӧд пайсӧ. Вежаинын вайӧй сійӧс кисьтан вись пыдди Господьлы.

⁸ Мӧд балясӧ вайӧй рытнас нянь виськӧд да вина виськӧд асъя мозыс жӧ. Вайӧй сійӧс Господьлы чӧскыда ӧвтан вись пыдди.

⁹ Шойччан лунӧ вайӧй вись пыдди дзоньвидза арӧса кык баляӧс. Накӧд ӧтлаын вайӧй нянь вись пыдди пычкӧм олив выйӧн гудралӧм шобді пызь – ефа мында пызьсӧ юкӧй дас пельӧ и сэтысь вайӧй кыксӧ. Нӧшта вайӧй кисьтан вись пыдди вина.

¹⁰ Тайӧ сотан висьсӧ вайӧй быд шойччан лунӧ быдлунся сотан висьысь да вина висьысь ӧтдор.

¹¹ Выль тӧлысь чужигӧн вайӧй Господьлы сотан вись пыдди дзоньвидза кык ӧшкӧс, ӧти межӧс да арӧса сизим баляӧс.

¹² Накӧд ӧтлаын вайӧй нянь вись пыдди олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд,

¹³ а быд балякӧд вайӧй ефалысь дасӧд юкӧнсӧ. Тайӧ – сотан вись, Господьлы чӧскыд ӧвтантор.

¹⁴ Кисьтан вись пыдди вайӧй быд ӧшкӧд гин джын вина, межкӧд – гинлысь коймӧд пайсӧ, быд балякӧд – гинлысь нёльӧд пайсӧ. Во гӧгӧр чӧж быд выль тӧлысь чужигӧн вайӧй татшӧм сотан висьсӧ.

¹⁵ Мыжысь вись пыдди вайӧй Господьлы ӧти ай кӧзаӧс. Вайӧй сійӧс да сыкӧд кисьтан вина висьсӧ быдлунся сотан висьысь ӧтдор.

¹⁶ Медводдза тӧлысьлӧн дас нёльӧд лунӧ Господьлы сиӧм Ыджыд лун,

¹⁷ а дас витӧд лунсянь сизим лун чӧж гаж, кор колӧ сёйны шомтӧм нянь.

¹⁸ Медводдза гажӧдчан лунӧ тіян мед лоӧ вежа чукӧртчӧм. Некутшӧм удж сэки энӧ вӧчӧй.

¹⁹ Вайӧй Господьлы сотан вись пыдди кык ӧшкӧс, ӧти межӧс да арӧса сизим баляӧс. Ставныс найӧ мед вӧліны дзоньвидзаӧсь.

²⁰ Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд,

²¹ а быд балякӧд вайӧй ефалысь дасӧд юкӧнсӧ.

²² Мыжысь вись пыдди вайӧй ай кӧзаӧс, медым вештыны мыжнытӧ.

²³ Быд асыв вайӧй тайӧ висьяссӧ быдлунся сотан висьысь ӧтдор.

²⁴ Сизимнан лун чӧжыс тадзи вӧчӧй. Тайӧ лоӧ Господьлы чӧскыда ӧвтан нянь вись. Вайӧй сійӧс да сыкӧд кисьтан вина висьсӧ быдлунся сотан висьысь ӧтдор.

²⁵ Сизимӧд луннас тіян мед лоӧ вежа чукӧртчӧм. Некутшӧм удж сэки энӧ вӧчӧй.

²⁶ Кор пасъянныд Ветымынӧд лунся гаж да ваянныд медводдза вундӧм няньысь Господьлы вись, тіян мед лоӧ вежа чукӧртчӧм. Некутшӧм удж сэки энӧ вӧчӧй.

²⁷ Господьлы чӧскыда ӧвтысь сотан вись пыдди вайӧй [дзоньвидза] кык ӧшкӧс, ӧти межӧс да арӧса сизим баляӧс.

²⁸ Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд,

²⁹ а быд балякӧд вайӧй ефалысь дасӧд юкӧнсӧ.

³⁰ Вайӧй [мыжысь] вись пыдди ай кӧзаӧс, медым вештыны мыжнытӧ.

³¹ Тайӧ висьяссӧ да накӧд кисьтан висьяссӧ вайӧй [Меным] быдлунся сотан висьысь да нянь висьысь ӧтдор. Вись пыдди вайӧм пемӧсныд мед вӧлі дзоньвидза.