Лыд 27 - Коми Библия 2023

Нывъяслы му сетӧм

¹ Манассей чужанкотырысь Салпаадлӧн вӧліны Махла, Ноа, Хогла, Милка да Тирза нывъяс. Салпаад вӧлі Хеферлӧн пи, Хефер – Галаадлӧн, Галаад – Макирлӧн, Макир – Манассейлӧн, Манассей – Ӧсиплӧн. Нывъяс локтісны

² вежа чом пыранін дорӧ да сувтісны Мӧисей, Элазар поп, юралысьяс да став войтыр водзӧ. Нывъяс шуисны:

³ «Миян батьным куліс овтӧминын. Сійӧ куліс аслас мыж вӧсна, эз ӧтувтчы Корейкӧд, эз вӧв Господьлы паныд кыпӧдчысьяс лыдын. Батьлӧн эз вӧвны пияныс.

⁴ Колӧ ӧмӧй та вӧсна вуштыны батьнымлысь нимсӧ чужанкотырным пӧвстысь? Батьнымлӧн вокъяслы моз сет миянлы му».

⁵ Мӧисей висьталіс налысь могсӧ Господьлы.

⁶ Господь шуис Мӧисейлы:

⁷ «Салпаадлӧн нывъясыс веськыда висьталӧны. Батьныслӧн вокъяслы моз сет тшӧтш нывъясыслы му. Налы мед вичмас батьныслӧн му юкӧныс.

⁸ Висьтав Израиль пиянлы: мортлӧн кӧ оз ло пиыс, кулӧм бӧрас сылӧн муыс мед вуджас нывъясыслы,

⁹ а нылыс кӧ оз ло, муыс мед вуджас вокъясыслы,

¹⁰ а вокыс кӧ оз ло, муыс мед вуджас батьыслӧн вокъяслы.

¹¹ А батьыслӧн кӧ вокъясыс абуӧсь, муыс мед вуджас чужанкотырысь медматысса рӧдвужыслы. Тайӧ шуӧмыс лоӧ Израиль пиянлы индӧдӧн, ӧд тадзи Господь тшӧктіс Мӧисейлы».

Нав Исус

¹² Господь шуис Мӧисейлы: «Кай Аварим керӧсъяс вылӧ [Нево керӧс вылӧ, мый Йӧрдан ю таладорын] да видзӧдлы [Ханаан] му. Сійӧ мусӧ Ме сета Израиль пиянлы.

¹³ Сійӧс аддзылӧм бӧрын тэ вуджан батьясыд дінӧ, кыдзи [Ор керӧс вылын] Аарон вокыд вуджис батьясныд дінӧ.

¹⁴ Ӧд Цин овтӧминын, кӧні ропкис войтырыд, ті энӧ кывзысьӧй Менсьым, энӧ лыддьӧй Менӧ вежаӧн. Войтырыд водзын ті торкинныд Менсьым шуӧмӧс». Тайӧ вӧлі Кадешын, Мерива ва петанін дорын.

¹⁵ Мӧисей шуис Господьлы:

¹⁶ «Господьӧй, Тэ став ловъя олысьыслӧн Ен! Инды тайӧ войтырыслы веськӧдлысьӧс,

¹⁷ коді мунас на водзвылын да нуӧдас найӧс, медым Господьлӧн войтырыс эз вӧвны видзысьтӧг кольӧм ыжъяс кодьӧсь».

¹⁸ Господь шуис Мӧисейлы: «Менам Лолӧй Навлӧн Исус пи пытшкын. Пуктыв сы вылӧ китӧ.

¹⁹ Сэсся нуӧд сійӧс Элазар поп дінӧ да став войтырыс водзын пукты сійӧс веськӧдлысьӧ.

²⁰ Аслад ыджыдалан вынысь сет сылы вын, медым Израиль войтыр кывзысяс сылысь.

²¹ Нав Исус кутас шыасьны Элазар поп дінӧ, а поп кутас юасьны Господьлысь урим пыр. Господьлӧн шуӧм серти войтырыскӧд сійӧ кутас петны тышӧ, и Господьлӧн шуӧм серти бӧр локны тыш вылысь».

²² Мӧисей вӧчис Господьлӧн тшӧктӧм серти. Сійӧ вайӧдіс Исусӧс Элазар поп да став войтырыс водзӧ

²³ и пуктыліс сы вылӧ кисӧ. Тадзи Господьлӧн тшӧктӧм серти Мӧисей пуктіс Нав Исусӧс веськӧдлыны Израиль войтырӧн.