Лыд 26 - Коми Библия 2023

Израиль войтырӧс мӧдысь арталӧм-гижалӧм

¹ Войтырӧс бырӧдӧм бӧрын Господь шуис Мӧисейлы да Аарон поплӧн Элазар пиыслы:

² «Арталӧй кызь арӧса да ыджыдджык арлыда израильса айуловӧс, кодъяс вермӧны петны тышӧ. Гижалӧй найӧс рӧд сертиныс».

³ Кор Израиль войтыр вӧлі Моав ласта вылын Йӧрдан ю бокын, Ериконлы воча, Мӧисей да Элазар поп шуисны:

⁴ «Арталӧй кызь арӧса да ыджыдджык арлыда айуловӧс, кыдзи Господь тшӧктіс Мӧисейлы да Израиль пиянлы, кодъяс петісны Египет муысь».

⁵ Рувим вӧлі Израильлӧн медводдза чужысьыс. Рувимсянь чужисны Енок да сылӧн рӧдыс, Паллу да сылӧн рӧдыс,

⁶ Хецрон да сылӧн рӧдыс, Карми да сылӧн рӧдыс.

⁷ Тайӧ – Рувим чужанкотырлӧн рӧдъяс. Арталӧм-гижалӧм айуловлӧн лыдыс вӧлі нелямын куим сюрс сизимсё комын морт.

⁸ Паллулӧн вӧлі Элиав пи.

⁹ Элиавлӧн вӧліны Немуэл, Датан да Авирам пиян. Буретш Датан да Авирам, войтырлӧн тӧдчана йӧз, Корейлӧн йӧзкӧд Мӧисейлы да Ааронлы пыксигӧн кыпӧдчисны Господьлы паныд.

¹⁰ Сэки воссис муыс да ньылыштіс Датанӧс, Авирамӧс да Корейӧс. Корейкӧд ӧтувтчысь йӧзыс кулісны, би ньылыштіс кыксё ветымын мортӧс. Найӧ лоисны мукӧдыслы ӧлӧданпасӧн.

¹¹ Но Корейлӧн пияныс эз кувны.

¹² Симеонсянь чужисны Немуэл да сылӧн рӧдыс, Ямин да сылӧн рӧдыс, Якин да сылӧн рӧдыс,

¹³ Зерах да сылӧн рӧдыс, Саул да сылӧн рӧдыс.

¹⁴ Тайӧ – Симеон чужанкотырлӧн рӧдъяс. Арталӧм-гижалӧм айуловлӧн лыдыс вӧлі кызь кык сюрс кыксё морт.

¹⁵ Гадсянь чужисны Цефон да сылӧн рӧдыс, Хагги да сылӧн рӧдыс, Шуни да сылӧн рӧдыс,

¹⁶ Озни да сылӧн рӧдыс, Эри да сылӧн рӧдыс,

¹⁷ Арод да сылӧн рӧдыс, Арели да сылӧн рӧдыс.

¹⁸ Тайӧ – Гад чужанкотырлӧн рӧдъяс. Арталӧм-гижалӧм айуловлӧн лыдыс вӧлі нелямын сюрс витсё морт.

¹⁹ Иудалӧн Ир да Онан пияныс кулісны Ханаан муын.

²⁰ Иудасянь чужисны Шелай да сылӧн рӧдыс, Парес да сылӧн рӧдыс, Зерах да сылӧн рӧдыс.

²¹ Парессянь чужисны Хецрон да сылӧн рӧдыс, Хамул да сылӧн рӧдыс.

²² Тайӧ – Иуда чужанкотырлӧн рӧдъяс. Арталӧм-гижалӧм айуловлӧн лыдыс вӧлі сизимдас квайт сюрс витсё морт.

²³ Иссакарсянь чужисны Тол да сылӧн рӧдыс, Пув да сылӧн рӧдыс,

²⁴ Яшув да сылӧн рӧдыс, Шимрон да сылӧн рӧдыс.

²⁵ Тайӧ – Иссакар чужанкотырлӧн рӧдъяс. Арталӧм-гижалӧм айуловлӧн лыдыс вӧлі квайтымын нёль сюрс куимсё морт.

²⁶ Завулонсянь чужисны Серед да сылӧн рӧдыс, Элон да сылӧн рӧдыс, Яхлеэл да сылӧн рӧдыс.

²⁷ Тайӧ – Завулон чужанкотырлӧн рӧдъяс. Арталӧм-гижалӧм айуловлӧн лыдыс вӧлі квайтымын сюрс витсё морт.

²⁸ Ӧсиплӧн вӧліны Манассей да Ефрем пиян.

²⁹ Манассейсянь чужисны Макир да сылӧн рӧдыс. Макирсянь чужисны Галаад да сылӧн рӧдыс.

³⁰ Галаадсянь чужисны Езер да сылӧн рӧдыс, Хелек да сылӧн рӧдыс,

³¹ Асриэл да сылӧн рӧдыс, Шекем да сылӧн рӧдыс,

³² Шемид да сылӧн рӧдыс, Хефер да сылӧн рӧдыс.

³³ Хеферлӧн Салпаад пилӧн эз вӧв пияныс, вӧліны сӧмын Махла, Ноа, Хогла, Милка да Тирза нывъяс.

³⁴ Тайӧ – Манассей чужанкотырлӧн рӧдъяс. Арталӧм-гижалӧм айуловлӧн лыдыс вӧлі ветымын кык сюрс сизимсё морт.

³⁵ Ефремсянь чужисны Шутелах да сылӧн рӧдыс, Бекер да сылӧн рӧдыс, Тахан да сылӧн рӧдыс.

³⁶ Шутелахсянь чужисны Эран да сылӧн рӧдыс.

³⁷ Тайӧ – Ефрем чужанкотырлӧн рӧдъяс. Арталӧм-гижалӧм айуловлӧн лыдыс вӧлі комын кык сюрс витсё морт. Тайӧ – Ӧсипсянь чужысьяс асланыс рӧд сертиныс.

³⁸ Веняминсянь чужисны Белай да сылӧн рӧдыс, Ашбел да сылӧн рӧдыс, Ахирам да сылӧн рӧдыс,

³⁹ Шефуфам да сылӧн рӧдыс, Хуфам да сылӧн рӧдыс.

⁴⁰ Белайсянь чужисны Ард да сылӧн рӧдыс, Нааман да сылӧн рӧдыс.

⁴¹ Тайӧ – Венямин чужанкотырлӧн рӧдъяс. Арталӧм-гижалӧм айуловлӧн лыдыс вӧлі нелямын вит сюрс квайтсё морт.

⁴² Дансянь чужисны Шухам да сылӧн рӧдыс. Тайӧ – Дан чужанкотырлӧн рӧдыс.

⁴³ Шухам рӧдысь арталӧм-гижалӧм айуловлӧн лыдыс вӧлі квайтымын нёль сюрс нёльсё морт.

⁴⁴ Асирсянь чужисны Имнай да сылӧн рӧдыс, Ишви да сылӧн рӧдыс, Берий да сылӧн рӧдыс.

⁴⁵ Берийсянь чужисны Хевер да сылӧн рӧдыс, Малкиэл да сылӧн рӧдыс.

⁴⁶ Асирлысь нывсӧ шуисны Серах.

⁴⁷ Тайӧ – Асир чужанкотырлӧн рӧдъяс. Арталӧм-гижалӧм айуловлӧн лыдыс вӧлі ветымын куим сюрс нёльсё морт.

⁴⁸ Неффалимсянь чужисны Яхцеэл да сылӧн рӧдыс, Гуни да сылӧн рӧдыс,

⁴⁹ Ецер да сылӧн рӧдыс, Шиллем да сылӧн рӧдыс.

⁵⁰ Тайӧ – Неффалим чужанкотырлӧн рӧдъяс. Арталӧм-гижалӧм айуловлӧн лыдыс вӧлі нелямын вит сюрс нёльсё морт.

⁵¹ Арталӧм-гижалӧм Израиль пиянлӧн лыдыс вӧлі квайтсё ӧти сюрс сизимсё комын морт.

⁵² Господь шуис Мӧисейлы:

⁵³ «Юклы мусӧ чужанкотыръяслы морт лыд серти.

⁵⁴ Кутшӧм чужанкотырын йӧзыс унджык, сэтшӧм чужанкотырлы сет ыджыдджык му, а кутшӧм чужанкотырын йӧзыс этшаджык, сэтшӧм чужанкотырлы сет ичӧтджык му. Быд чужанкотырлы юклы мусӧ арталӧм-гижалӧм морт лыд серти.

⁵⁵ Юклы мусӧ пудъясьӧмӧн, чужанкотыръяслӧн бать ним серти.

⁵⁶ Ыджыд да ичӧт чужанкотыръяслы мусӧ колӧ юклыны пудъясьӧмӧн».

⁵⁷ Арталӧм-гижалӧм Левий пиян лыдын вӧліны Гирсонлӧн, Каафлӧн да Мерарилӧн рӧдъяс.

⁵⁸ Левий чужанкотырӧ пырисны Ливнилӧн, Хевронлӧн, Махлилӧн, Мушилӧн да Корейлӧн рӧдъяс. Каафсянь чужысь Амрамлысь

⁵⁹ гӧтырсӧ шуисны Иокеведа. Сійӧ вӧлі Левийлӧн ныв, коді чужис Египетын. Иокеведа чужтіс Амрамлы Ааронӧс, Мӧисейӧс да налысь Мирьям чойсӧ.

⁶⁰ Ааронлӧн чужисны Надав да Авиуд, Элазар да Итамар,

⁶¹ но Надав да Авиуд кулісны, кор [Синай овтӧминын] вайисны Господь водзӧ мӧд би.

⁶² Арталӧма-гижалӧма вӧлі кызь куим сюрс левитӧс. На лыдӧ пырисны тӧлысьысь ыджыдджык арлыда айулов. Мукӧд Израиль пиянкӧд ӧтвыв левитъясӧс эз артавны-гижавны, ӧд мукӧд Израиль пиян пӧвстын налы мусӧ эз вӧв сетӧма.

⁶³ Мӧисей да Элазар поп арталісны-гижалісны Израиль пиянӧс Моав ласта вылын Йӧрдан ю бокын, Ериконлы воча.

⁶⁴ На лыдын эз нин вӧвны Израиль пиян, кодъясӧс Мӧисей да Аарон поп арталісны-гижалісны Синай овтӧминын.

⁶⁵ Ӧд Господь вӧлі шуӧма налы, мый куласны овтӧминын. Ефуннилӧн Калев пи да Навлӧн Исус пи кындзи наысь некод ловйӧн эз коль.