Лыд 24 - Коми Библия 2023

¹ Валаам казяліс, мый Израильӧс бурсиӧмыс шогмана Господьлы, и сійӧ воддза мозыс эз нин мун тунасьны. Сійӧ видзӧдліс овтӧминлань

² и аддзис Израиль войтырӧс, коді чомъяснас вӧлі паськӧдчӧма чужанкотыръясыс серти. Енлӧн Лов лэччис Валаам вылӧ,

³ и сійӧ шуис татшӧм кывъяс: – Тадзи висьталӧ Веорлӧн Валаам пи, морт, кодлӧн синмыс восьса,

⁴ коді кылӧ Енлысь кывъяссӧ, аддзӧ Ставсӧвермысьсянь петкӧдчылӧмъяс, кымынь усьлӧ да восьса синмӧн аддзӧ.

⁵ Кутшӧм мичаӧсь тіян чомъясныд, Яковсянь чужысьяс, тіян оланінъясныд, Израиль войтыр!

⁶ Чомъясныд паськӧдчӧны ковтысъяс моз, юбокса сад йӧръяс моз, Господьӧн пуктӧм алоэ пуяс моз, вадорса сус пуяс моз.

⁷ Тіян пельсаясысь ваыс оз бырлы, пуктӧм кӧйдыснытӧ юкталас ва. Тіян ӧксыныд лоӧ Агагысь ыджыдджык, сылысь юралӧмсӧ лоӧ вылӧ кыпӧдӧма.

⁸ Енмыс петкӧдіс тіянӧс Египетысь, тіян вынйӧрныд ӧшлӧн кодь. Тіянӧс мустӧмтысь войтыръясӧс ті ньылыштанныд, налысь лыяссӧ чегъяланныд, ньӧвйысь лыйлӧмӧн найӧс бырӧданныд.

⁹ Ті воданныд да куйланныд левъяс моз. Коді лысьтас чеччӧдны тіянӧс? Тіянӧс бурсиысьясӧс лоӧ бурсиӧма, тіянӧс ёрысьясӧс – ёрӧма.

¹⁰ Валак скӧрмис Валаам вылӧ, кинас швачкӧмӧн шуис: «Ме кори тэнӧ ёрны ассьым вӧрӧгӧс, а тэ куимысь нин бурсиин найӧс!

¹¹ Мун, кытысь локтін! Ме кӧсйи бурӧ пуктыны тэнӧ, но Господь эз лэдз».

¹² Валаам шуис Валаклы: «Ме дінӧ волӧм йӧзыдлы ме висьталі нин,

¹³ мый Валак кӧ сетас меным весиг керка тыр зарни-эзысь, Господьлысь тшӧктӧмсӧ ме ог торк, ас кӧсйӧм серти бурсӧ ни лёксӧ ог вӧч. Мый Господь тшӧктас, сійӧс и кута висьтавны.

¹⁴ Со, ме муна аслам войтыр дінӧ. Ӧні тэ кывзы, и ме висьтала, мый Израиль войтыр вӧчас тэнад войтырлы локтана кадӧ».

¹⁵ И Валаам шуис татшӧм кывъяс: – Тадзи висьталӧ Веорлӧн Валаам пи, морт, кодлӧн синмыс восьса,

¹⁶ кодлы Медвылыссаыс сетӧ тӧдӧмлун, коді кылӧ Енлысь кывъяссӧ, аддзӧ Ставсӧвермысьсянь петкӧдчылӧмъяс, кымынь усьлӧ да восьса синмӧн аддзӧ.

¹⁷ Аддза Сійӧс, но ог на ӧні, видзӧда Сы вылӧ, но абу на матын. Яковсянь чужысьяс пӧвстысь кыпӧдчас кодзув, Израиль войтыр пӧвстысь кыптас юралан бедь. Сійӧ пасьвартас моавса юралысьясӧс, бырӧдас Сифсянь чужысьясӧс.

¹⁸ Эдомӧс лоӧ вермӧма, Сеир керӧсвыв муӧс вӧрӧг босьтас аслас кипод улӧ. Израиль петкӧдлас ассьыс вынсӧ.

¹⁹ Яков рӧдысь петас юралысь, сійӧ бырӧдас вӧрӧглӧн карысь коляс войтырсӧ.

²⁰ Валаам аддзис амаликъясӧс да шуис татшӧм кывъяс: – Войтыръяс пӧвстын амалик войтыр медводдзаыс, но сійӧс виччысьӧ дзикӧдз бырӧдӧм!

²¹ Валаам аддзис кеней войтырӧс да шуис татшӧм кывъяс: – Тэнад оланіныд зумыд, тэ поздысьӧмыд изкырта вылӧ.

²² Но Каин, тэнӧ лоӧ куштӧма, регыд Ассур босьтас тэнӧ пленӧ.

²³ Валаам [аддзис Огӧс да] шуис татшӧм кывъяс: – Курыд шог! Кор Енмыс мӧдӧдас тайӧ лёксӧ, коді сэки ловйӧн коляс?

²⁴ Киттимсянь локтасны корабльяс, вермасны Ассурӧс, вермасны Эверӧс, но и найӧс асьнысӧ лоӧ дзикӧдз бырӧдӧма.

²⁵ Сэсся Валаам мӧдӧдчис да бӧр муніс аслас оланінӧ, а Валак муніс аслас туйӧд.