Лыд 23 - Коми Библия 2023

Валаам бурсиӧ Израильӧс

¹ Валаам шуис Валаклы: «Вӧч меным татчӧ сизим висьпуктанін да вайӧд меным сизим ӧшкӧс да сизим межӧс».

² Валак вӧчис, кыдзи тшӧктіс Валаам. И найӧ кыкнанныс, Валак да Валаам, быд висьпуктанін вылын вайисны вись пыдди ӧшкӧс да межӧс.

³ Валаам шуис Валаклы: «Кольччы аслад сотан вись дорӧ, а ме муна. Гашкӧ, Господь петас меным воча. Сэсся ме висьтала тэныд, мый Сійӧ восьтас». [Валак кольччис аслас сотан вись дорӧ, а] Валаам кайис изкырта вылӧ [юасьны Енлысь].

⁴ Ен аддзысис сэні Валаамкӧд. Валаам шуис Сылы: «Ме лэпті сизим висьпуктанін, быд висьпуктанін вылын вись пыдди вайи ӧшкӧс да межӧс».

⁵ Господь тшӧктіс Валаамлы бӧр мунны Валак дінӧ да висьтавны сійӧ, мый сетіс сылы шуны.

⁶ Локтӧм бӧрас Валаам аддзис, мый Валак сулалӧ аслас сотан вись дорын моавса юралысьяскӧд. [Енлӧн Лов вӧлі Валаам вылын.]

⁷ Валаам шуис татшӧм кывъяс: – Арамысь, асыввывса керӧсъясысь, менӧ вайӧдіс Валак, моавса ӧксы. Шуис, лок пӧ да ёр Яковӧс, лёкӧд Израиль войтырӧс.

⁸ Но кыдзи ме верма ёрны сійӧс, кодӧс Енмыс оз ёр? Кыдзи ме верма лёкӧдны сійӧс, кодӧс Господь оз лёкӧд?

⁹ Изкырта вывсянь ме аддза найӧс, керӧс вывсянь видзӧда на вылӧ. Со, тайӧ войтырыс олӧ торйӧн, асьсӧ мукӧд войтыръяс лыдӧ оз пырт.

¹⁰ Коді вермас артавны Яковсянь чужысьясӧс, лыддьыны Израильлысь лыдтӧм-тшӧттӧм войтырсӧ? Веськыда олысьяс моз мед ме кула, олӧм помӧй мед лоас налӧн кодь!

¹¹ Валак шуис Валаамлы: «Мый тэ мекӧд вӧчан? Ме кори тэнӧ ёрны меным паныд сувтысьясӧс, а тэ бурсиин найӧс!»

¹² Валаам вочавидзис: «Мый Господь сетӧ меным, сійӧс ме и висьтала».

¹³ Валак шуис Валаамлы: «Лок мунам мӧдлаӧ, сэтысянь тэныд бурджыка тыдалас войтырыс. Но ставнысӧ он аддзы, сӧмын медматысса чомъяссӧ. Ёр найӧс».

¹⁴ Валак нуӧдіс Валаамӧс Фасга керӧс йылӧ, кысянь ылӧдз тыдаліс. Сэні лэптіс сизим висьпуктанін да быд висьпуктанін вылын вайис вись пыдди ӧшкӧс да межӧс.

¹⁵ Валаам шуис Валаклы: «Сулышт тані аслад сотан вись дорын, а ме ветла аддзысьны Енкӧд».

¹⁶ Господь аддзысис Валаамкӧд, тшӧктіс сылы бӧр мунны Валак дінӧ да висьтавны сійӧ, мый сетіс сылы шуны.

¹⁷ Локтӧм бӧрас Валаам аддзис, мый Валак сулалӧ аслас сотан вись дорын моавса юралысьяскӧд. Валак юаліс: «Мый шуис Господь?»

¹⁸ Валаам шуис татшӧм кывъяс: – Чеччы, Валак, да кывзы, сюся кывзы менӧ, Сеппорлӧн пи!

¹⁹ Енмыс абу морт, оз ылӧдчы. Сійӧ абу морт, кывсӧ оз вежлав. Мый шуас, сійӧс и вӧчас. Мый кӧсйысяс, сійӧс и збыльмӧдас.

²⁰ Меным тшӧктӧма бурсины. Енмыс кӧ бурсиис, ме вежнысӧ ог вермы.

²¹ Яковлӧн шогыс абу, Израильлӧн ставыс бур. Господь, налӧн Енмыс, накӧд, ӧксыӧс моз найӧ паныдалӧны Сійӧс.

²² Ен петкӧдіс найӧс Египетысь, налӧн вынйӧрыс ӧшлӧн кодь.

²³ Яков рӧдлы паныд туналӧмыс оз ин, Израиль войтырлы паныд тшыкӧдӧмыс оз во. Ас кадӧ шуасны Яков-Израиль йылысь: «Со мый вӧчӧ Енмыс!»

²⁴ Израиль войтыр сувтӧ лев моз, лев моз чеччӧ да оз вод, кытчӧдз оз сёй кыйдӧссӧ, оз ю виӧмалысь вирсӧ.

²⁵ Валак шуис Валаамлы: «Он кӧ вермы ёрны Израиль войтырӧс, эн и бурси найӧс!»

²⁶ Но Валаам вочавидзис: «Эг ӧмӧй ме тэныд шулы, мый кута вӧчны сійӧ, мый тшӧктас меным Господь?»

²⁷ Валак шуис Валаамлы: «Лок мунам, ме нуӧда тэнӧ мӧдлаӧ. Гашкӧ, Енмыслы лоӧ шогмана, мед тэ сэтысянь ёран Израиль войтырӧс».

²⁸ Валак нуӧдіс Валаамӧс Пеор керӧс йылӧ. Тайӧ керӧсыс видзӧдіс овтӧминлань.

²⁹ Валаам шуис Валаклы: «Вӧч меным татчӧ сизим висьпуктанін да вайӧд меным сизим ӧшкӧс да сизим межӧс».

³⁰ Валак вӧчис, кыдзи тшӧктіс сылы Валаам, сэсся быд висьпуктанін вылын вайис вись пыдди ӧшкӧс да межӧс.