Лыд 22 - Коми Библия 2023

Моавса ӧксы корӧ Валаамӧс

¹ Израиль пиян мунісны водзӧ да сувтісны Моав ласта вылӧ Йӧрдан ю бокӧ, Ерикон карлы воча.

² Сеппорлӧн Валак пиыс тӧдмаліс, мый вӧчисны израильсаяс аморейяскӧд.

³ Та вӧсна моавсаяс полісны унасьыс-уна лыда Израиль войтырысь.

⁴ Найӧ шуисны мадианса юрнуӧдысьяслы: «Тайӧ уна лыда Израиль войтырыс ньылыштас татысь ставнымӧс, кыдзи ӧшъяс сёйӧны став веж турунсӧ видз вылысь!» Сійӧ кадас Моав муын ӧксыаліс Сеппорлӧн Валак пиыс.

⁵ Валак мӧдӧдіс юӧртысьясӧс аслас войтыр дінӧ Петор карӧ, Ефрат ю дорӧ. Сійӧ тшӧктіс юӧртысьяслы мунны Веорлӧн Валаам пиыс дінӧ да висьтавны сылы: «Египетысь локтіс уна лыда войтыр да вевттис став мусӧ. Найӧ паськӧдчисны менам му бокӧ.

⁶ Кора тэнӧ, волы да ёр тайӧ войтырсӧ, ӧд сійӧ ме дорысь ёнджык. Гашкӧ, сэсся ме верма пасьвартны да вӧтлыны найӧс татысь. Ме тӧда: кодӧс тэ бурсиан, сійӧс лоӧ бурсиӧма, а кодӧс тэ ёран, сійӧс лоӧ ёрӧма».

⁷ Моавса да мадианса юрнуӧдысьяс локтісны Валаам дінӧ, медым мынтысьны сылы ёрӧмысь. Найӧ висьталісны сылы Валаклысь кывъяссӧ.

⁸ Валаам шуис: «Кольччӧй ме ордӧ вой кежлас, а асывнас ме висьтала, мый шуас меным Господь». Моавса юрнуӧдысьяс кольччисны Валаам ордӧ.

⁹ Ен локтіс Валаам дінӧ да юаліс: «Кодъяс тайӧ йӧзыс тэ ордын?»

¹⁰ Валаам шуис Енлы: «Тайӧ йӧзсӧ ме дінӧ мӧдӧма Сеппорлӧн Валак пиыс, моавса ӧксы.

¹¹ Найӧ висьталісны, Египетысь пӧ локтіс уна лыда войтыр да вевттис став мусӧ. [Найӧ паськӧдчисны пӧ Валаклӧн му бокӧ.] Валак корӧ менӧ локны да ёрны тайӧ войтырсӧ. Сійӧ чайтӧ, мый ёрӧм бӧрын сійӧ вермас уськӧдчыны да вӧтлыны найӧс аслас му бокысь».

¹² Ен вочавидзис Валаамлы: «Эн мун накӧд. Эн ёр Египетысь локтӧм войтырӧс, ӧд сійӧ бурсиӧм войтыр».

¹³ Асывводзнас Валаам чеччис да шуис Валаклӧн йӧзлы: «Мунӧй асланыд муӧ. Господь оз лэдз менӧ мунны тіянкӧд».

¹⁴ Моавса юрнуӧдысьяс бӧр локтісны Валак дінӧ да висьталісны, Валаам пӧ эз лок миянкӧд.

¹⁵ Валак бара мӧдӧдіс юралысьясӧс, но воддзаяс дорсьыс на унджыкӧс да ёнджыка пыдди пуктанаясӧс.

¹⁶ Найӧ локтісны Валаам дінӧ да шуисны: «Сеппорлӧн Валак пиыс висьталӧ, волы пӧ ме дінӧ, эн пыксьы.

¹⁷ Ме пӧ бурӧ пукта тэнӧ да вӧча ставсӧ, мый кӧсъян. Волы пӧ да ёр Египетысь локтӧм войтырӧс».

¹⁸ Валаам вочавидзис Валаклӧн йӧзлы: «Валак кӧ сетас меным весиг керка тыр зарни-эзысь, аслам Господь Енлысь тшӧктӧмсӧ ме ог торк, нинӧм ог вӧч ас кӧсйӧм серти.

¹⁹ Кольччӧй ме ордӧ узьны, а асывнас ме висьтала, мый талун шуас меным Господь».

²⁰ Войнас Ен локтіс Валаам дінӧ да шуис сылы: «Тайӧ йӧзыс кӧ локтісны тэнӧ корны, чеччы да мун накӧд. Но вӧч сӧмын сійӧ, мый Ме тэныд тшӧкта».

Валаамлӧн осёл

²¹ Асывводзнас Валаам чеччис, сийӧсаліс осёлсӧ да петіс туйӧ моавса юралысьяскӧд.

²² Валаам пуксис осёл вылас, и сыкӧд мунісны сылӧн кык кесйӧгыс. Ен скӧрмис, мый Валаам петіс туйӧ. Туй вылас Валаамлы паныд сувтіс Господьлӧн андел.

²³ Осёл аддзис, мый туй вылын сулалӧ Господьлӧн анделыс перйӧм шыпуртӧн, да вешйис видз-му вылӧ. Валаам кутіс кучкавны осёлсӧ, медым бӧр бергӧдны сійӧс туй вылӧ.

²⁴ Господьлӧн андел сувтіс виноград йӧркостса векни туй вылӧ, кӧні ӧтар-мӧдар пӧлӧныс вӧлі стен.

²⁵ Господьлысь анделсӧ аддзӧм бӧрын осёлыс ляскысис стен бердӧ да топӧдіс Валаамлысь коксӧ. Валаам бара пондіс кучкавны осёлсӧ.

²⁶ Господьлӧн андел муніс водзӧджык да сувтіс сэтшӧм векньыдінӧ, мый осёлыс эз вермы воськовтны веськыдвылӧ ни шуйгавылӧ.

²⁷ Осёл аддзис Господьлысь анделсӧ да водіс, а Валаам пукаліс сы вылын. Валаам ёна скӧрмис да бедьнас пондіс кучкавны осёлӧс.

²⁸ Сэки Господь сетіс осёллы сёрнитны морт моз. Осёл шыасис Валаам дінӧ: «Мый ме тэныд вӧчи? Тэ коймӧдысь нин менӧ кучкалан».

²⁹ Валаам шуис осёлыслы: «Тэ менӧ йӧй туйӧ пуктін. Вӧлі кӧ менам шыпурт, ме эськӧ дзик ӧні вии тэнӧ!»

³⁰ Осёл шуис Валаамлы: «Ме ӧд тэнад осёл, и тэ ме вылын пыр ветлӧдлан. Ме ӧмӧй коркӧ вӧчлі тэныд тадзисӧ?» Валаам вочавидзис: «Эн».

³¹ Господь восьтіс Валаамлысь синсӧ, и сійӧ аддзис, мый туй вылын сулалӧ Господьлӧн анделыс перйӧм шыпуртӧн. Валаам копыртчис да кымынь уськӧдчис муӧ.

³² Господьлӧн андел юаліс сылысь: «Мыйла тэ куимысьсӧ нӧйтін осёлтӧ? Ме локті сувтӧдны тэнӧ, ӧд тэнад туйыд абу шогмана Меным.

³³ Осёлыд аддзис Менӧ да куимысь нин кежліс туй бокӧ. Сійӧ кӧ эз кеж, Ме эськӧ вии тэнӧ, а сійӧс ловйӧн коли».

³⁴ Валаам шуис Господьлӧн анделлы: «Ме мыжа. Ме эг тӧд, мый Тэ сулалан менам туй вылын. Тэ кӧ он кӧсйы, мед ме муні, ме бӧр бергӧдча».

³⁵ Господьлӧн андел вочавидзис: «Мун тайӧ йӧзыскӧд. Но висьтав сӧмын сійӧ, мый Ме висьтала тэныд». Валаам муніс Валаклӧн киподувса юралысьяскӧд.

Валаам Валак ордын

³⁶ Кор Валаклы кывсис, мый Валаам петӧма туйӧ, сійӧ локтіс паныдавны Валаамӧс Арнон ю бокын сулалысь моавса карӧ, кӧні помасис сылӧн муыс.

³⁷ Валак юаліс Валаамлысь: «Мыйла тэ эн лок, кор ме медводдзаысьсӧ мӧдӧдлі тэла ассьым йӧзӧс? Ме ӧмӧй ог куж пыдди пуктӧмӧн сибӧдны тэнӧ?»

³⁸ Валаам вочавидзис: «Со, ме локті. Но мый ме верма шуны? Мый Енмыс сетас шуны, сійӧс и кута висьтавны».

³⁹ Валаам муніс Валаккӧд Киръят-Хуцотӧ.

⁴⁰ Валак начкис ӧшъясӧс да ыжъясӧс, корис сёйны Валаамӧс да сыкӧд локтӧм юралысьясӧс.

⁴¹ Мӧд асывнас Валак босьтіс аскӧдыс Валаамӧс. Найӧ кайисны Вамот-Ваал керӧс вылӧ, кысянь Валаамлы тыдалісны Израиль войтырлӧн медматысса чомъясыс.