Лыд 21 - Коми Библия 2023

Ханаанса ӧксыӧс вермӧм

¹ Арад карлӧн ханаанса ӧксыыс, коді оліс Негев муын, кор кыліс, мый Израиль войтыр локтӧ Атарим туйӧд, уськӧдчис на вылӧ да некымын мортӧс босьтіс пленӧ.

² Израиль войтыр кыв сетіс Господьлы: «Тэ кӧ сетан миян киӧ тайӧ войтырсӧ, ми дзикӧдз бырӧдам [найӧс да] налысь каръяссӧ».

³ Господь кыліс Израиль войтырлысь шыасьӧмсӧ да сетіс ханаансаясӧс налӧн киӧ. Израильсаяс дзикӧдз бырӧдісны сэтчӧс ханаансаясӧс да налысь каръяссӧ. Тайӧ местасӧ нимтісны Хормаӧн.

Ыргӧн змей

⁴ Ор керӧссянь Израиль войтыр муніс Гӧрд саридзлань, эз пыр Эдом муӧ. Туяс войтырыс мудзис.

⁵ Найӧ ропкисны Ен вылӧ да Мӧисей вылӧ, шуасисны: «Мыйла ті петкӧдінныд миянӧс Египетысь, медым овтӧминас ми кулім? Нянь ни ва тані абу! Миянлы мустӧммис тайӧ шогмытӧм сёяныс!»

⁶ Господь мӧдӧдіс Израиль войтыр вылӧ чушкысь змейясӧс. Налӧн чушкалӧмысь унаӧн кулісны.

⁷ Сэки войтырыс локтіс Мӧисей дінӧ да шуис: «Ми мыжмим, кор шуасим Господь вылӧ да тэ вылӧ. Кевмысь Господьлы, медым Сійӧ ылыстас миян дінысь змейяссӧ». Мӧисей кевмысис Господьлы войтырыс вӧсна.

⁸ Господь шуис Мӧисейлы: «Вӧч [ыргӧн] змейӧс да кыпӧд сійӧс майӧг йылӧ. Чушкӧм морт кӧ видзӧдлас змей вылӧ, ловйӧн коляс».

⁹ Мӧисей вӧчис ыргӧн змейӧс да кыпӧдіс сійӧс майӧг йылӧ. Кор змейӧн чушкӧм морт видзӧдліс ыргӧн змей вылӧ, ловйӧн кольліс.

Сигон ӧксыӧс да Ог ӧксыӧс вермӧм

¹⁰ Израиль пиян мӧдӧдчисны водзӧ, сэсся сувтісны Овотӧ.

¹¹ Овотсянь мунісны овтӧминӧ да сувтісны Ийе-Аваримӧ, Моавсянь асыввылӧ.

¹² Сэсянь мӧдӧдчисны водзӧ да сувтісны Заред ковтысӧ.

¹³ Заред ковтыссянь водзӧ мунісны да сувтісны овтӧминӧ, Арнон ю мӧдлапӧлӧ, аморейяслӧн му бокӧ. Моав му вӧлі паськӧдчӧма Арнон юӧдз, юыс торйӧдіс моавсаясӧс да аморейясӧс.

¹⁴ Та вӧсна Господьлӧн тышъяс йылысь небӧгын гижӧма:

¹⁵ «Суфаса Вагев кар да Арнон ю ковтыс, мый нюжӧдчӧ Ар сиктӧдз да мунӧ Моав му пӧлӧн».

¹⁶ Сэтысянь израильсаяс мунісны Бер юкмӧс дорӧ. Сэні Господь шуис Мӧисейлы: «Чукӧрт войтырсӧ, Ме сета налы ва».

¹⁷ Сэки Израиль пиян сьылісны татшӧм сьылан: – Юкмӧсӧй, ло ва тыра! Сьылӧй юкмӧсыс йылысь!

¹⁸ Сійӧс кодйисны юралысьяс, войтырлӧн веськӧдлысьяс, кодйисны асланыс юралан бедьясӧн. Овтӧминысь израильсаяс мӧдӧдчисны Маттанаӧ.

¹⁹ Маттанаысь мунісны Нагалиэлӧ, а Нагалиэлысь – Вамотӧ.

²⁰ Вамотысь локтісны Моав муӧ, ковтысӧ, мый паськӧдчӧма овтӧминлань видзӧдысь Фасга керӧс бокӧ.

²¹ Израильсаяс ыстісны йӧзӧс аморейяслӧн Сигон ӧксы дінӧ, медым [бурпырысь] висьтавны:

²² «Лэдз миянӧс мунны тэнад муӧд. Ми [мунам туй кузяыс,] огӧ талялӧй видз-муястӧ да виноград йӧръястӧ, огӧ юӧй [тэнад] юкмӧсъясысь ватӧ. Ми мунам Ӧксыяслӧн туйӧд, кытчӧдз огӧ петӧй тэнад муысь».

²³ Но Сигон эз лэдз Израиль войтырлы мунны аслас муӧд. Сійӧ чукӧртіс ассьыс войтырсӧ да мӧдӧдчис овтӧминӧ. Яхацӧ воӧм бӧрын сійӧ петіс тышӧ Израильлы паныд.

²⁴ Израиль вермис Сигонӧс, босьтіс сылысь мусӧ Арнон юсянь Явок юӧдз, кысянь заводитчис аммон войтырлӧн муыс. Аммон войтыр бура видзис ассьыс мудорсӧ.

²⁵ Израиль войтыр босьтіс аморейяслысь став карсӧ да овмӧдчис тайӧ каръясас, тшӧтш Хешбон карӧ да сыгӧгӧрса сиктъясӧ.

²⁶ Хешбон вӧлі аморей Сигон ӧксылӧн кар. Сигон водзынджык тышкасьліс моавса ӧксыкӧд да босьтіс сылысь став мусӧ Арнон юӧдз.

²⁷ Та вӧсна мойдысь-сьылысьяс шулӧмаӧсь: – Локтӧй Хешбонӧ, лэптӧй-сувтӧдӧй Сигонлысь карсӧ.

²⁸ Сигонлӧн Хешбон карысь ыпнитіс-петіс би, ньылыштіс Ар-Моав, сотіс найӧс, кодъяс ыджыдалісны Арнон мылькъяс вылын.

²⁹ Курыд шог тэныд, Моав! Тэнӧ, Кемош идоллӧн войтыр, лоӧ бырӧдӧма. Тэнад пияныд пышйисны, тэнсьыд нывъястӧ аморейяслӧн Сигон ӧксы нуӧдіс пленӧ.

³⁰ Но ми лыйлім аморейясӧс ньӧвъясӧн, Хешбон карсянь Дивон карӧдз ставнысӧ виалім, Медева кардорса Нофаӧдз ставнысӧ бырӧдім.

³¹ Тадзи Израиль войтыр овмӧдчис аморейяслӧн муӧ.

³² Мӧисей мӧдӧдіс видзӧдлыны Язер кар. Израильсаяс босьтісны [карсӧ да] сыгӧгӧрса сиктъяссӧ, вӧтлісны сэтысь аморейясӧс.

³³ Та бӧрын израильсаяс кежисны Васан муӧ нуӧдысь туй вылӧ. Эдрей кар дорын васанса Ог ӧксы аслас тышкайӧзкӧд петіс тышӧ израильсаяслы паныд.

³⁴ Господь шуис Мӧисейлы: «Эн пов сыысь. Тэнад киӧ Ме сета сійӧс, сылысь войтырсӧ да мусӧ. Пасьварт сійӧс, кыдзи тэ пасьвартін аморей войтырлысь Сигон ӧксысӧ, коді юраліс Хешбонын».

³⁵ Израильсаяс пасьвартісны Ог ӧксыӧс, сылысь пиянсӧ да тышкайӧзсӧ, некод ловйӧн эз коль. Израильсаяс босьтісны Оглысь мусӧ.